អាយុ ៣៨សប្តាហ៍៖ នេះៗងាយសោះ តិចនិកយករបស់លេងពីកូនមិនឲ្យយំ
ការលូតលាស់ និងអាកប្បកិរិយា
កូនយើងកាន់តែធំបន្តិចម្តងៗ ដឹងច្រើនជាងមុន ឯការចងចាំក៏ចាប់ផ្តើមមាន និងចេះចែករំលែកនំចំណីឲ្យម៉ាក់ប៉ា។ បើយើងយករបស់លេងចេញ អាអូននឹងយំទារវិញមិនខាន យកល្អគួរតែឲ្យរបស់ថ្មីទៅកូនមុនសិន ចាំយករបស់នោះមក។ ម៉ាក់ប៉ាដឹងទេ កូនយើងវ័យនេះភាគច្រើនចូលចិត្តលេងបោះចុះឡើង ដូចនេះយើងអាចលេងជាមួយកូនដោយរមៀលបាល់ទៅវិញទៅមក។
នៅក្នុងសប្តាហ៍ទី ៣៨ កូនយើងអាច៖
– តោងឈរ
– ចេះវារ
– ងើបអង្គុយ
– យំពេលយករបស់លេងចេញ
– ប្រើម្រាមដៃចាប់យករបស់
– និយាយថា “ម៉ាម៉ា” ឬ”ដាដា”
– ចេះលេងបិទមុខ
– ចាំកន្លែងមួយចំនួន ពិសេសកន្លែងទុករបស់លេង
– ធ្វើត្រាប់តាមសកម្មភាពដែលបានឃើញ។
១- បង្រៀនកូនដោយរបៀបណា?
កូនយើងចេះទុក និងយករបស់លេងចេញពីប្រអប់ ដូច្នេះម៉ាក់ប៉ាគួរទិញធុងជ័រ ប្រដាប់លេង និងពណ៌ផ្គុំឲ្យកូន បែបនេះអាអូនអាចលេងផ្គុំបាន ប៉ុន្តែកុំយកតូចៗពេកខ្លាចកូនយកលេប។ អាអូនក៏ចូលចិត្តលេងរបស់មានចលនាដូចជា ទ្វារ ដែលអាចបើកបិទបាន យើងត្រូវប្រយ័ត្ន អាចកៀបដៃជើងកូន។
សុខភាព និងសុវត្ថិភាព
២- ពិភាក្សាជាមួយគ្រូពេទ្យរឿងអីខ្លះ?
គ្រូពេទ្យមានតិចនិចក្នុងការពិនិត្យកូនយើងផ្សេងៗពីគ្នា ហើយរបៀបនិងបែបបទក្នុងការពិនិត្យក៏ទៅតាមក្មេងនីមួយៗដែរ ប៉ុន្តែជាទូទៅគ្រូពេទ្យនឹងពិនិត្យតាមជំហានខាងក្រោមនេះ។
– ពិនិត្យរាងកាយ រួមទាំងពិនិត្យបញ្ហាពីមុនៗ
– ពិនិត្យការលូតលាស់របស់អាអូន
– ធ្វើតេស្តមួយចំនួនដូចជាឲ្យអង្គុយ ចាប់យករបស់ ហៅម៉ាក់ប៉ា -ល-។
៣- ចំណុចត្រូវដឹង
ម៉ាក់ៗដែលមានមានអាអូនពីមុនមក ធ្លាប់ជួបករណីកូនរករឿងចង់ឈប់បៅដោះទេ? តើមកពីអ្វី? យើងត្រូវធ្វើបែបណា?
ផ្តាច់ដោះខ្លួនឯង៖ នៅសុខៗ កូនបៅតែប៉ុន្មាននាទីក៏ឈប់។ កុំចម្លែកចិត្តអី អាអូនមិនចង់បៅរយៈពេលខ្លីទេ អាចនឹងត្រលប់មកម៉ឹមវិញដូចដើម។ ភាគច្រើនចាប់ពីខែទី ៩-១០ ទៅ ទើបអាអូនឈប់ចង់បៅដោះដោយខ្លួនឯង។ យើងអាចផ្តាច់ដោះកូនម្តងបន្តិចៗដោយចាប់ផ្តើមលាយអាហាររឹង និងទឹកដោះគោកំប៉ុងឲ្យកូនបណ្តើរៗ។ ដំបូងយើងអាចចាប់ផ្តើមដោយបញ្ឈប់បំបៅដោះពេលថ្ងៃ បន្ទាប់មកពេលព្រឹក ពេលយប់ចាំឈប់ក្រោយគេ រួចបង្វែរឲ្យកូនមកបៅដបទឹកដោះគោវិញ។
ជួយលើកកូន៖ កូនយើងពុំទាន់អាចទប់ខ្លួនជាប់នៅឡើយទេ ដូចនេះអ្នកគួរតែជួយទប់កូន ជូយឲ្យកូនដាក់ខ្លួនអង្គុយចុះថ្នមៗ។ ការដែលធ្វើបែបនេះ កូនយើងរៀនចេះធ្វើខ្លួនឯង។
ការព្រួយបារម្ភ
៤- រឿងអ្វីខ្លះត្រូវបារម្ភ?
ក្នុងសប្តាហ៍ទី ២ នៃខែទី ៩ នេះ អាអូនញ៉ាំអាហារបានច្រើន តែក៏រើសប្រភេទនំចំណីខ្លាំងណាស់ដែរ របស់មិនចូលចិត្តមិនញ៉ាំទេ។ បើជួបបញ្ហានេះ ម៉ាក់ប៉ាអាចដោះស្រាយតាមគន្លឹះខាងក្រោមនេះ។
- ឲ្យកូនញ៉ាំអ្វីដែលចង់ ដូចជា ចេក នំប៉័ង គ្រាប់ធញ្ញជាតិ
- លួចបន្ថែមអាហារផ្សេងៗទៅកូន
- កូនធុញនឹងអាហារកិន អាចឲ្យអាហារទន់ៗកាន់ញ៉ាំបាន
- ដូរអាហារកូនឲ្យបានញឹកញាប់
- ឲ្យកូនញ៉ាំអាហារដោយខ្លួនឯង
- កុំឲ្យកូនញ៉ាំទឹកក្រូច ឬទឹកដោះគោលើសពី ១២០-១៨០ មិល្លីលីត្រ
- ឲ្យកូនញ៉ាំទឹកសុទ្ធ ឬទឹកដែលមានជាតិស្ករទាប
- កុំឲ្យកូនញ៉ាំអាហារសម្រន់ច្រើនពេក
- ផ្តល់ស្នាមញញឹមដល់កូនដើម្បីឲ្យកូនសប្បាយចិត្ត ញ៉ាំបានច្រើន។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
បដិសេធ
Hello Health Group និង “Hello គ្រូពេទ្យ” មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
Murkoff, Heidi. What to Expect, The First Year. New York: Workman Publishing Company, 2009. Print version. Page 416-434.
កំណែប្រែបច្ចុប្បន្ន
23/01/2019
អត្ថបទដោយ Duk Panharat
ត្រួតពិនិត្យដោយ គឹម កាណែល
បច្ចុប្បន្នភាពដោយ៖ ដេត ធន្នី
ត្រួតពិនិត្យដោយ
គឹម កាណែល
ផ្សព្វផ្សាយពាណិជ្ជកម្មតើអត្ថបទនេះមានប្រយោជន៍ដែរទេ?
ផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្ម