ក្មេងត្រូវការវីតាមីនចាប់ពីពេលកើតភ្លាមមកម្ល៉េះ ដើម្បីការលូតលាស់រាងកាយ និងខួរក្បាល ខណៈនៅ៦ ខែដំបូងៗ ទារកទទួលបានវីតាមីនទាំងនោះតាមរយៈទឹកដោះម្ដាយ ឬម្សៅទឹកដោះគោដែលគេម៉ឹម។ បន្ទាប់ពី ៦ ខែទៅ កុមារត្រូវការជាចាំបាច់នូវវីតាមីនចម្រុះមុខ ដែលបានពីទឹកដោះម្ដាយ ទឹកដោះគោ ការញ៉ាំបបរខាប់គ្រប់គ្រឿង និងអាហារផ្សេងៗ មានទាំងត្រី សាច់ បន្លែ ផ្លែឈើ។ ម៉ាក់ប៉ាត្រូវចាំថា រាងកាយ ភ្នែក ឆ្អឹង ខួរក្បាលកូន លូតលាស់បានល្អ អាស្រ័យទៅការរៀបចំអាហារបន្ថែមឲ្យបានត្រឹមត្រូវ សម្បូរទៅដោយវីតាមីនដែរ។ ខាងក្រោមនេះជាពពួកវីតាមីនដែលកូនត្រូវការជាចាំបាច់។
១- វីតាមីន A
វីតាមីន A ជួយពង្រឹងប្រព័ន្ធការពារ ជំរុញជួសជុលជាលិកាឆ្អឹង ធ្វើឲ្យស្បែក និងភ្នែកមានសុខភាពល្អ។ វីតាមីន A អាចរកបានក្នុងផលិតផលមួយចំនួន ដូចជា ទឹកដោះគោ ឈីស ស៊ុត បន្លែពណ៌លឿង ពណ៌ទឹកក្រូច មានការ៉ុត ឬល្ពៅ។
២- ក្រុមវីតាមីន B
វីតាមីនបានពីក្រុម B ជាពិសេស B2 B3 B6 និងវីតាមីន B12 មានតួនាទីសំខាន់ជំរុញដល់ការរំលាយអាហាររបស់ក្មេង បង្កើនការផលិតថាមពល និងជួយដល់ប្រព័ន្ធសរសៃប្រសាទ។ អាហារមានផ្ទុកវីតាមីន B មានដូចជា សាច់សត្វ ស៊ុត ទឹកដោះគោ សណ្តែក សណ្តែកសៀង និងសាច់ត្រីជាដើម។
អត្ថបទពាក់ព័ន្ធ៖ ស្វែងយល់ពីកំពូលគុណប្រយោជន៍ពីវីតាមីន B Complex
៣- វីតាមីន C
វីតាមីន C ល្អសម្រាប់ស្បែក ជាលិកា និងការរីកលូតសាច់ដុំរបស់ក្មេងៗ ដោយវីតាមីនប្រភេទនេះសម្បូរនៅក្នុងប៉េងប៉ោះ បន្លែពណ៌បៃតង ឬផ្លែឈើមានរសជាតិជូរ មានក្រូច ត្របែក ជាដើម។
៤- វីតាមីន D
វីតាមីន D អាចធ្វើឲ្យឆ្អឹងរឹងមាំ ព្រោះជួយរាងកាយស្រូបយកកាល់ស្យូមបានច្រើន។ ពន្លឺព្រះអាទិត្យនៅពេលព្រឹក ជាប្រភពនៃវីតាមីន D ដ៏ល្អបំផុត ហើយក្រៅពីនេះ អាហារសម្បូរវីតាមីន D មានខ្លាញ់ត្រី ស៊ុតពណ៌លឿង គ្រប់ធញ្ញជាតិ និងក្រូច។
អត្ថបទពាក់ព័ន្ធ៖ វីតាមីន D មិនត្រឹមល្អចំពោះឆ្អឹងទេ អាចការពារជំងឺទឹកនោមផ្អែមទៀត!
៥- វីតាមីន K
វីតាមីន K ជាក្រុមវីតាមីនដែលរលាយក្នុងខ្លាញ់ មានតួនាទីសំខាន់ក្នុងការធ្វើឱ្យឈាមកក ជួយឲ្យឆ្អឹងស្រូបយកកាល់ស្យូម និងគ្រប់គ្រងកាល់ស្យូមនៅក្នុងឈាម។ គ្មានវីតាមីន K រាងកាយរបស់យើងមិនអាចផលិតប្រូត្រូប៊ីន សារធាតុបង្កក ដែលចាំបាច់ក្នុងការធ្វើឱ្យឈាមកក។ វីតាមីន K មាននៅក្នុងថ្លើមសត្វ សាច់មាន់ ប្រូខូលី ស្ពៃក្តោប ផ្លីគីវី ផ្លែប៊ើរ ប៉េងប៉ោះ ទំពាំងបាយជូ។
៦- វីតាមីន E
វីតាមីន E ជាក្រុមនៃសារធាតុប្រឆាំងអុកស៊ីតកម្មដែលការពារកោសិកាពីភាពតានតឹង ចាំបាច់សម្រាប់រាងកាយដំណើរការធម្មតា និងជួយប្រឆាំងភាពចាស់។ បើរាងកាយក្មេងទទួលបានវីតាមីន E មិនគ្រប់គ្រាន់ទេ អាចងាយនឹងឆ្លងរោគ ខ្សោយភ្នែក ឬសាច់ដុំ។ វីតាមីន E នៅក្នុងគ្រាប់ផ្កាឈូករ័ត្ន គ្រាប់អាល់ម៉ុន សណ្តែកដី គ្រាប់ល្ពៅ គ្រាប់ស្វាយចន្ទី ត្រីសាលម៉ុន ផ្លែស្វាយ គីវី មឹក បង្កង។
៧- កាល់ស្យូម
ជាតិកាល់ស្យូមជំរុញឲ្យឆ្អឹង ធ្មេញ លូតលាស់រឹងមាំបានល្អ វាមានប្រភពចេញពីទឹកដោះគោជូរ ទឹកដោះគោស្រស់ ឈីស តៅហ៊ូ យ៉ាអួ ស៊ុត សណ្តែកខៀវ សណ្តែកសៀង ប្រូខូលី។
៨- ជាតិដែក
ខ្វះជាតិដែក អាចធ្វើឲ្យសាច់ដុំ និងកោសិកាឈាមក្រហមមានបញ្ហា ព្រោះជាតិដែក មានតួនាទីសំខាន់ ពិសេសចំពោះស្រីៗពេញវ័យ ដោយសារវាមានទំនាក់ទំនងជាមួយវដ្តរដូវមនុស្សស្រី ព្រោះផលិតគ្រាប់ឈាមក្រហមបានលឿនឡើងវិញ។ គួរផ្តល់អាហារមានជាតិដែកឲ្យក្មេង ដូចជា សាច់ក្រហម មាន់ទួរគី ស្ពៃពួយឡេង និងសណ្តែក។
អត្ថបទពាក់ព័ន្ធ៖ បើទារក-ក្មេងខ្វះវីតាមីន និងជាតិរ៉ែ សុខភាពគ្នាប៉ះពាល់អីខ្លះ?
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
[embed-health-tool-vaccination-tool]
