ម៉ាក់ប៉ាបើ​ឃើញសញ្ញាទាំងនេះ អាចថាកូនកំពុង​ខ្វះជាតិទឹក​ហើយ

    ម៉ាក់ប៉ាបើ​ឃើញសញ្ញាទាំងនេះ អាចថាកូនកំពុង​ខ្វះជាតិទឹក​ហើយ

    ខ្វះ​ជាតិទឹក​អាច​កើត​មាន​ពេល​ដែល​រាងកាយ​ប្រើប្រាស់ ឬ​បាត់បង់​ជាតិ​ទឹក​ច្រើន​ជាង​បរិមាណ​ដែល​ទទួល​បាន។ បញ្ហា​ខ្វះ​ជាតិ​ទឹក​អាច​ប៉ះពាល់​ទៅ​លើ​មនុស្ស​គ្រប់គ្នា​រួម​ទាំង​ក្មេង​អាយុ១-៣ឆ្នាំ​ដែរ ហើយ​បញ្ហា​នេះ​អាច​បង្ក​ដោយ​អាការៈ​រាករូស ក្អួត ជំងឺ និង​អាកាសធាតុ​ក្ដៅ។ បញ្ហា​ខ្វះ​ជាតិ​ទឹក​អាច​ប៉ះពាល់​សុខភាព​ក្មេង​ធ្ងន់ធ្ងរ និង​ក្នុង​ករណី​ធ្ងន់ធ្ងរ​អាច​ស្លាប់បាន​។

    ក្មេង​ដែល​ក្អួត រាករូស និង​មិន​ផឹកទឹក​ ឬ​ញ៉ាំ​អ្វី​សោះ ម៉ាក់ប៉ា​គួរ​តាមដាន​រោគសញ្ញា​នៃ​ការ​ខ្វះ​ជាតិទឹក​ព្រោះ​ក្មេង​អាច​នឹង​មាន​ការ​លំបាក​ក្នុង​ទំនាក់ទំនង​ជាមួយ​ម៉ាក់ប៉ា​ថា​គេ​ស្រេកទឹក។ ម៉ាក់ប៉ា​ក៏​មិន​ចាំ​បាច់​ចាំ​ទាល់តែ​ក្មេង​ស្រេកទឹក​ខ្លាំង​មុន​នឹង​ឲ្យ​កូន​ផឹក​ទឹក​ទេ។ រោគសញ្ញា​មួយ​ចំនួន​នៃ​បញ្ហា​ខ្វះ​ជាតិទឹក​រួមមាន៖

    • នោម​តិច​ជាង​មុន
    • ខោ​ទឹកនោម​ស្ងួត ឬ​មិន​នោម​ច្រើន​ជាង៣ម៉ោង​
    • ពេល​យំ​មិន​មាន​ទឹកភ្នែក
    • ប្រេះ​បបូរមាត់ និង​មាត់​ស្ងួត
    • ភ្នែក​ខូង
    • ស្ពឹក​ស្រពន់ និង​ធ្វើ​សកម្មភាព​តិច
    • ងងុយ​គេង
    • ដកដង្ហើម​ញាប់ៗ
    • ចង្វាក់​បេះដូង​ញាប់។

    ក្នុង​ករណី​មួយ​ចំនួន ក្មេង​ខ្វះ​ជាតិ​ទឹក​មក​ពី​ផឹក​ទឹក​មិន​គ្រប់គ្រាន់ ប៉ុន្តែ​ពេល​ខ្លះ​ក៏​បង្ក​ដោយ​ការ​ឆ្លង​មេរោគ និង​មាន​ជំងឺ​ផ្សេងៗ។ កត្តា​ដែល​បង្ក​ឲ្យ​មាន​បញ្ហា​ខ្វះ​ជាតិទឹក​ទៅ​លើ​ក្មេង​មាន៖

    • ផឹកទឹកមិនគ្រប់គ្រាន់
    • រាករូស និងក្អួត
    • ឆ្លង​វីរុស ឬ​បាក់តេរី
    • មាន​ប៉ារ៉ាសិត
    • បែកញើស​ខ្លាំង​ដោយសារ​គ្រុនក្ដៅ ឬ​អាកាសធាតុ​ក្ដៅ
    • គ្រុនក្ដៅ
    • ជំងឺរ៉ាំរ៉ៃ​ដូចជា​ជំងឺ​ទឹកនោមផ្អែម បញ្ហា​ពោះវៀន ជំងឺ​ខូចជ្រាំង​ពោះវៀនតូច (Celiac disease) និងជំងឺ​ស៊ីស្ទីកហ្វាយប្រូស៊ីស (Cystic fibrosis)
    • ប្រតិកម្ម​នឹង​ថ្នាំ។

    យ៉ាងណាមិញ ការ​ដឹង​ពី​កត្តា​បង្ក​បញ្ហា​ខ្វះ​ជាតិទឹក និង​ផ្តល់​ទឹក​ដល់​ក្មេង​ឲ្យ​បាន​ត្រឹមត្រូវ​អាច​បង្ការ​បញ្ហា​ខ្វះ​ជាតិ​ទឹក​បាន។ ម៉ាក់ប៉ា​អាច​ឲ្យ​កូន​ញ៉ាំ​ទឹក​អូរ៉ាលីត​បើ​កូន​ក្អួត រាករូស និង​បញ្ហា​ពី​រោគសញ្ញា​ដំបូង និង​ឲ្យ​កូន​ផឹក​ទឹក​ឲ្យ​បាន​គ្រប់គ្រាន់​រាល់ថ្ងៃ ជាពិសេស​ពេល​កូន​ឈឺ ឬ​ពេល​អាកាសធាតុ​ក្ដៅ។ ម៉្យាងទៀត ម៉ាក់ប៉ា​គួរ​ឲ្យ​ទឹក​ធម្មតា​ទៅ​កូន​ជំនួស​ឲ្យ​ភេសជ្ជៈ​មាន​ជាតិ​ស្ករ​ ព្រោះ​ជាតិ​ស្ករ​ក្នុង​អាហារ ឬ​ភេសជ្ជៈ​អាច​បណ្ដាល​ឲ្យ​ខ្វះ​ជាតិទឹក។

    យ៉ាង​ណាមិញ ម៉ាក់ប៉ា​គួរ​នាំ​កូន​ទៅ​ជួប​ពេទ្យ​ប្រសិនជា​កូន​មាន​រោគសញ្ញា​ដូច​ខាងក្រោម៖

    • មិន​នោម​ច្រើន​ជាង​៣ម៉ោង
    • នោម​ញឹក​ជាង​ធម្មតា
    • រាក​យូរ​ជាង​២៤​ម៉ោង
    • មាត់​ស្ងួត
    • យំ​មិនមាន​ទឹកភ្នែក
    • លាមក​មាន​ឈាម
    • គ្រុនក្ដៅ​ចាប់​ពី​៣៨,៨​អង្សាសេ
    • ឈឺពោះ។

    Hello Health Group និង “Hello គ្រូពេទ្យ” មិន​ចេញ​វេជ្ជបញ្ជា មិន​ធ្វើ​រោគវិនិច្ឆ័យ ឬ​ព្យាបាល​ជូន​ទេ៕

    ត្រួតពិនិត្យដោយ

    វេជ្ជ. ចាន់ ស៊ីណេត

    · ម​ន្ទីរពេទ្យបង្អែកមិត្តភាពកម្ពុជា-ចិន សែនសុខ


    អត្ថបទ​ដោយ ថាត់ រ័ត្នមូនីតា · កែ 04/09/2020

    ផ្សព្វផ្សាយពាណិជ្ជកម្ម
    ផ្សព្វផ្សាយពាណិជ្ជកម្ម
    ផ្សព្វផ្សាយពាណិជ្ជកម្ម
    ផ្សព្វផ្សាយពាណិជ្ជកម្ម