ជារៀងរាល់ឆ្នាំ មានកុមាររាប់សែននាក់ដែលជួបប្រទះការប៉ះទង្គិចខួរក្បាលពីការដួល លេងកីឡា ឬបុកជាមួយនឹងវត្ថុអ្វីមួយ។ ការប៉ះទង្គិចខួរក្បាលកើតឡើង មិនត្រឹមតែនៅពេលវត្ថុពីរប៉ះទង្គិចគ្នាប៉ុណ្ណោះទេ ប៉ុន្តែវានៅមានចលនាដូចជាកន្ត្រាក់ចុះឡើងថែមទៀតផង។ ដូច្នេះហើយ ទើបមួកសុវត្ថិភាពមិនអាចការពារការប៉ះទង្គិចខួរក្បាលនេះបាន។ ពិតណាស់ មួកសុវត្ថិភាពអាចការពារការបែកឆ្អឹងលលាដ៍ក្បាល និងការរងរបួសដទៃទៀត ប៉ុន្តែវាមិនអាចទប់ក្បាលឲ្យនៅនឹងបានឡើយ។

រោគសញ្ញានៃការប៉ះទង្គិចខួរក្បាល

ការដឹងពីវត្តមាននៃការប៉ះទង្គិចខួរក្បាលគឺជារឿងសំខាន់មួយ។ ទោះបីជាមិនមានការព្យាបាលជាក់លាក់ណាមួយ ប៉ុន្តែការឲ្យកូនសម្រាកទាំងរាងកាយ និងផ្លូវចិត្តអាចជួយឲ្យរោគសញ្ញាបាត់ទៅវិញយ៉ាងឆាប់រហ័ស។ ម្យ៉ាងវិញទៀត ប៉ាម៉ាក់ចាំបាច់ការពារកូនពីការប៉ះទង្គិចខួរក្បាលបន្ថែមទៀត ជាពិសេសគឺនៅអំឡុងពីរបីសប្ដាហ៍ ឬខែដំបូង បន្ទាប់ពីមានការប៉ះទង្គិចរួច ពីព្រោះថាខួរក្បាលគឺកំពុងតែជាសះស្បើយ។ ផ្ទុយទៅវិញ ប្រសិនបើមានការប៉ះទង្គិចខួរក្បាលបន្ថែមទៀត វាអាចបណ្ដាលខូចខួរក្បាលជារៀងរហូត។

នៅពេលខ្លះ វាអាចមានសញ្ញាភ្លាមៗបន្ទាប់ពីរងរបួស ដែលបញ្ជាក់ថាក្មេងមានការប៉ះទង្គិចខួរក្បាល។ សញ្ញាដែលកើតឡើងភ្លាមៗទាំងនេះមានដូចជា៖

សន្លប់ ឬងងុយគេងខ្លាំង ព្រមទាំងពិបាកភ្ញាក់ពីគេង
ឈឺក្បាលធ្ងន់ធ្ងរ
វិលមុខ និងពិបាកឈរ ឬដើរ
ភ័ន្តច្រឡំ ឬមិនចងចាំរឿងរ៉ាវដែលបានកើតឡើង
ក្អួតចង្អោរខ្លាំង

ប្រសិនបើមានសញ្ញាទាំងនេះកើតឡើង ប៉ាម៉ាក់ត្រូវនាំកូនទៅជួបជាមួយនឹងគ្រូពេទ្យជាបន្ទាន់។

ប៉ះទង្គិចខួរក្បាល២

សញ្ញាមួយចំនួនទៀតនៃការប៉ះទង្គិចខួរក្បាល

ជាមួយគ្នានេះដែរ សញ្ញាមួយចំនួនអាចមានភាពស្រពិចស្រពិល និងអាចបន្តរហូតដល់ជាច្រើនសប្ដាហ៍ ឬជាច្រើនខែបន្ទាប់ពីមានការប៉ះទង្គិចខួរក្បាលរួច ដែលមានដូចជា៖

ឈឺក្បាលជាប់ជាប្រចាំ
ក្អួតចង្អោរតិចតួចជាប្រចាំ
ពិបាកក្នុងការផ្ចង់អារម្មណ៍
ពិបាកក្នុងការចងចាំ និងរៀនអ្វីថ្មីៗ
អស់កម្លាំង ថាមពលចុះខ្សោយ
មានអារម្មណ៍មិនល្អ ឬឆាប់ខឹង
មានបញ្ហានៅក្នុងការគេង
វិលមុខ
ព្រិលភ្នែក ឬមានបញ្ហាភ្នែកផ្សេងទៀត

ពិតណាស់ មានបញ្ហាសុខភាពជាច្រើនទៀត ដែលអាចឲ្យកុមារកើតមានអាការៈទាំងនេះ ប៉ុន្តែទោះយ៉ាងនេះក្ដី ប៉ាម៉ាក់គប្បីនាំកូនទៅជួបជាមួយនឹងគ្រូពេទ្យ ដើម្បីស្វែងរកអំពីមូលហេតុឲ្យបានច្បាស់លាស់។ យ៉ាងណាមិញ ប្រសិនបើកូនមានរោគសញ្ញាទាំងនេះ បន្ទាប់ពីមានការប៉ះទង្គិចក្បាលរួច និងទោះបីជាមើលទៅមិនធ្ងន់ធ្ងរក្ដី វាអាចបង្ហាញពីសញ្ញានៃការប៉ះទង្គិចខួរក្បាលដែលប៉ាម៉ាក់មិនគួរបណ្ដែតបណ្ដោយឡើយ។

គួរដឹង​!​ សញ្ញា​ទាំង​នេះ​បញ្ជាក់​ថា​ក្មេង​មាន​ការ​ប៉ះ​ទង្គិច​ខួរ​ក្បាល

រោគ​សញ្ញា​នៃ​ការ​ប៉ះ​ទង្គិច​ខួរ​ក្បាល​

សញ្ញា​​​មួយ​ចំនួន​ទៀត​នៃ​ការ​ប៉ះ​ទង្គិច​ខួរ​ក្បាល​

គួរដឹង! សញ្ញាទាំងនេះបញ្ជាក់ថាក្មេងមានការប៉ះទង្គិចខួរក្បាល

រោគសញ្ញានៃការប៉ះទង្គិចខួរក្បាល

សញ្ញាមួយចំនួនទៀតនៃការប៉ះទង្គិចខួរក្បាល