អាអូនតូចៗ ចូលចិត្តណាស់ពេលមានអ្នកពដើរទៅនេះទៅនោះ ពេលខ្លះកិកកុករករឿងម៉ាក់ប៉ាឲ្យពរដើរ។ ដូចនេះហើយទើបប៉ាម៉ាក់ចូលចិត្តប្រើកាបូបស្ពាយកូន ព្រោះវាផ្ដល់ភាពងាយស្រួលច្រើនដល់ម៉ាក់ប៉ា អាចស្ពាយកូនផង ធ្វើកិច្ចការបានទៀត។ ប៉ុន្តែបើប្រើកាបូបស្ពាយនេះញឹកញាប់អាចប៉ះពាល់ដល់ទម្រង់ឆ្អឹងខ្នងកូនអត់?
ម៉ាក់ប៉ានិយមប្រើកាបូបស្ពាយទារករយៈពេលយូរ អាចប៉ះពាល់ឆ្អឹងខ្នងកូនអត់?
សម្រាប់បញ្ហានេះ លោកវេជ្ជបណ្ឌិត ចាន់ ស៊ីណេត ឯកទេសជំងឺទូទៅ ពន្យល់ឲ្យដឹងថា កាបូបស្ពាយកូននោះវាជួយសម្រួលដល់ម៉ាក់ប៉ាបានខ្លាំង ហើយបើម៉ាក់ប៉ាចូលចិត្តប្រើច្រើនក៏មិនមានអីប៉ះពាល់ដល់កូនទេ បើសិនដាក់កូនឲ្យអង្គុយនៅក្នុងទម្រង់សមស្របមួយ។
យើងអាចប្រើកាបូបស្ពាយអាអូនដោយមិនបាច់បារម្ភនឹងផលប៉ះពាល់មែន ក៏ប៉ុន្តែប្រសិនបើដាក់កូនស្ពាយនៅក្នុងទម្រង់ខុស វាអាចបង្កជាផលពិបាកដល់កូនបានហើយទម្រង់ដែលស័ក្តិសម គឺ៖
១.ជើងកូនគួរតែអាចកន្ធែកដាក់អមសងខាងរាងកាយយើង
២.ចង្កេះកូនគួរតែបត់
៣.មានចន្លោះឲ្យកូនស្រួលដកដង្ហើម
និយាយរួម ជាទម្រង់ដូចកូនអង្គុយធម្មតា។ បើយើងស្ពាយកូនផ្អឹបជាប់នឹងដើមទ្រូង ហើយជើងកូនត្រង់ស្លូស្មើដងខ្លួន វាអាចប៉ះពាល់ទៅដល់ការលូតលាស់ឆ្អឹងត្រគាករបស់កូន។
លោកបញ្ជាក់ថា កាបូបស្ពាយកូននេះមិនមែនប្រើបានគ្រប់ទារកទេ អាអូនក្រោមអាយុ៤ខែ ឬអាអូនដែលកមិនទាន់រឹង ម៉ាក់ប៉ាកុំទាន់ប្រញាប់ប្រើកាបូបស្ពាយនេះ ព្រោះវាអាចប៉ះពាល់កកូន។ សម្រាប់ការប្រើកាបូបនេះ អាចប្រើបានចំពោះទារកចាប់ពី ១ខួបឡើងទៅ ឬអាអូនចេះដើរតេះតះ។
បន្ថែមពីលើនេះ ដើម្បីចៀសវាងបញ្ហាដូចជា កាបូបស្ពាយធ្វើឲ្យកូនហប់ ឬតឹងពេកសម្រាប់កូន ម៉ាក់ប៉ាគួរដឹងតិចនិកជ្រើសរើសកាបូបស្ពាយស័ក្តិសមសម្រាប់អាអូន៖
– ពេលទៅទិញកាបូបស្ពាយ គួរយកកូនទៅជាមួយដើម្បីងាយស្រួលជ្រើសរើសកាបូបឲ្យត្រូវ
– ពេលស្ពាយហើយ កូនអាចកម្រើកដៃជើង ក្បាលដោយស្រួល មិនតឹង ឬឈឺចាប់
– កូនអាចមើលឃើញទេសភាពពេលដែលប្រើកាបូបស្ពាយ
– ជ្រើសរើសកាបូបស្ពាយដែលងាយស្រួលពាក់ (ម៉ាក់ប៉ាអាចពាក់បានដោយខ្លួនឯង)។ល។
Hello Health Group និង “Hello គ្រូពេទ្យ” មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
ផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្ម