ជាទូទៅ ក្មេងអាចមានលាមកពណ៌ខុសៗគ្នា ដែលភាគច្រើនមានលក្ខណៈធម្មតា ហើយវាកើតឡើងដោយសារតែអាហារដែលពួកគេញ៉ាំ។ ប៉ុន្តែ នៅក្នុងករណីដែលក្មេងមានលាមកពណ៌ស អាចជាសញ្ញាគ្រោះថ្នាក់ដែលប៉ាម៉ាក់គប្បីយកចិត្តទុកដាក់ឲ្យបានដិតដល់។ សម្រាប់កុមារ ពួកគេកម្រមានលាមកពណ៌សនេះណាស់ ប៉ុន្តែវាអាចជាកត្តានៃការកើតមានជំងឺធ្ងន់ធ្ងរ ដូច្នេះហើយ ប៉ាម៉ាក់គប្បីពិគ្រោះយោបល់ជាមួយនឹងគ្រូពេទ្យភ្លាមៗ។
លក្ខណៈពិសេសនៃលាមកពណ៌ស
លាមកពណ៌ស ជាមួយនឹងស្នាមអុជពណ៌លឿង ឬពណ៌ប្រផេះស្រាល អាចកើតមាននៅពេលដែលកូនមានអាការៈរាករូស ឬជាលាមកធម្មតា។ ប៉ាម៉ាក់គួរតែរក្សាខោទឹកនោមដែលមានលាមកបែបនេះ ហើយយកវាទៅឲ្យគ្រូពេទ្យធ្វើការពិនិត្យឲ្យបានល្អិតល្អន់។
មូលហេតុចម្បងធ្វើឲ្យក្មេងមានលាមកពណ៌ស
ទឹកប្រមាត់ត្រូវបានផលិតដោយថ្លើម និងរក្សាទុកនៅក្នុងថង់ទឹកប្រមាត់។ នៅអំឡុងពេលនៃដំណើរការរំលាយអាហារ វាត្រូវបានបញ្ចេញទៅក្នុងពោះវៀនតូច។ អង្គធាតុរាវនេះមានពណ៌ស្រអាប់ និងធ្វើឲ្យលាមកធម្មតាក្លាយទៅជាពណ៌ប្រផេះ។ ប៉ុន្តែ ប្រសិនបើលាមកមានពណ៌ស មានន័យថា ទឹកប្រមាត់មិនអាចទៅកាន់លាមកបាន ពីព្រោះតែថ្លើមមិនបានផលិតទឹកប្រមាត់ ឬវាត្រូវបានរាំងស្ទះមិនឲ្យទៅកាន់ពោះវៀនតូចបាន។
![លាមកពណ៌ស២](https://cdn.hellokrupet.com/wp-content/uploads/2021/03/លាមកពណ៌ស២.jpg)
មូលហេតុផ្សេងទៀត
ប្រសិនបើក្មេងញ៉ាំទឹកដោះគោគ្រប់ប្រភេទ លេបថ្នាំបន្សាបជាតិអាស៊ីដ ថ្នាំអង់ទីប៊ីយូទិក ឬថ្នាំប្រឆាំងនឹងរោគផ្សិត ឬទើបតែបញ្ចុះលាមករួច កត្តាទាំងនេះក៏អាចបណ្ដាលឲ្យលាមកមានពណ៌ស ដោយពុំមានពាក់ព័ន្ធនឹងថ្លើមឡើយ។
បញ្ហាធ្ងន់ធ្ងរទាក់ទងនឹងលាមកពណ៌ស
មូលហេតុភាគច្រើននៃលាមកពណ៌សដែលកើតឡើងចំពោះកុមារ អាចជាសញ្ញានៃជំងឺធ្ងន់ធ្ងរ ដែលបណ្ដាលមកពីបញ្ហាថ្លើម ពោះវៀនតូច ឬថង់ទឹកប្រមាត់។ លើសពីនេះ វាអាចរួមបញ្ចូលទាំងជំងឺរលាកថ្លើម ឬការឆ្លងមេរោគថ្លើមផ្សេងទៀត ខូចទ្រង់ទ្រាយថង់ប្រមាត់ពីកំណើត គ្រួសក្នុងថង់ទឹកប្រមាត់ ដុំសាច់ ឬគីស ក្រិនថង់ប្រមាត់ រឹងថង់ប្រមាត់ ថង់ប្រមាត់តូចពេក និងជំងឺមេតាបូលីសជាដើម។ ដូច្នេះហើយ ប៉ាម៉ាក់ចាំបាច់នាំកូនទៅជួបជាមួយនឹងគ្រូពេទ្យជាបន្ទាន់ ដើម្បីស្វែងរកការព្យាបាល និងការទប់ស្កាត់ពីជំងឺធ្ងន់ធ្ងរទាំងនេះឲ្យបានទាន់ពេលវេលា។