ម៉ាក់ប៉ាត្រូវថែទាំផ្ចិតទារកទើបកើតឲ្យដិតដល់ ទើបឆាប់ក្រៀមជ្រុះចេញពីផ្ចិត មិនមានដំបៅខ្ទុះ។ ថ្ងៃនេះ Hello គ្រូពេទ្យនឹងប្រាប់វិធីថែទាំផ្ចិតទារកក្រោយកើត ឲ្យឆាប់ជា មិនឲ្យឆ្លងមេរោគ។
របៀបថែទាំផ្ចិតទារកទើបកើត ឲ្យឆាប់ជ្រុះ គ្មានដំបៅខ្ទុះ
វិធីថែទាំផ្ចិតកូនក្មេងត្រឹមត្រូវតាមក្បូនពេទ្យ លោកវេជ្ជបណ្ឌិត ចាន់ ស៊ីណេត ឯកទេសជំងឺទូទៅ រៀបរាប់ថា ក្រោយចេញពីមន្ទីរពេទ្យ ម៉ាក់ប៉ាត្រូវធ្វើអនាម័យ និងជូតសម្អាតទងផ្ចិតកូនឲ្យស្ងួត ក្រោយពេលងូតទឹករួច បន្ទាប់មកលាបថ្នាំមេតាឌីន និងមិនត្រូវរុំកន្ទប ឬខោទឹកនោមលើវានោះទេ បើសិនជាកន្ទបមិនស្អាតអាចឆ្លងមេរោគ។
ធ្វើតាមវិធីខាងលើនេះ ផ្ចិតកូនក្មេង នឹងក្រៀមជ្រុះដោយឯកឯងក្នុងអំឡុង ៥-១៥ ថ្ងៃក្រោយសម្រាល។ លោកវេជ្ជបណ្ឌិតបន្ថែមថា ម៉ាក់ៗមិនត្រូវឆ្កឹះ ឬប៉ះផ្ចិតនោះទេ បើទោះជាផ្ចិតក្រៀម ក៏មិនត្រូវទាញវាឲ្យដាច់ដែរ ត្រូវទុកឲ្យវាជ្រុះដោយខ្លួនឯង។
អត្ថបទពាក់ព័ន្ធ៖
ចំពោះវិធីបុរាណ ដែលចាស់ៗពីដើម តែងយកផេះ ដីដំបូក ឬម្សៅហុយ មករោយលើផ្ចិត លោកវេជ្ជបណ្ឌិតថា កុំសាកល្បងឲ្យសោះ ព្រោះអាចបង្ករោគ ធ្វើឲ្យផ្ចិតឡើងក្រហម ក្តៅ មានហូរទឹករង៉ៃ ឬអាចមានខ្ទុះ និងអាចឈានទៅឆ្លងមេរោគតេតាណុស។
បើសិនជាផ្ចិតកូនមានសញ្ញាមិនប្រក្រតីទាំងប៉ុន្មានខាងលើនេះ រួមទាំងកូនឧស្សាហ៍យំដោយសារឈឺផ្ចិត ម៉ាក់ៗត្រូវប្រញាប់នាំកូនជួបគ្រូពេទ្យជាបន្ទាន់។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
ត្រួតពិនិត្យដោយ គ្រូពេទ្យឯកទេស.វេជ្ជ. ចាន់ ស៊ីណេតឯកទេសសម្ភព និងរោគស្ត្រី · មន្ទីរពេទ្យបង្អែកមិត្តភាពកម្ពុជា-ចិន សែនសុខ
អត្ថបទដោយ ដេត ធន្នី · កែ 31/07/2019