ទារកដែលមិនគ្រប់គីឡូ អាចមានការវិវត្តន៍មិនប្រក្រតី ដូច្នេះហើយការផ្ដល់សារធាតុចិញ្ចឹមគ្រប់គ្រាន់ មានសារសំខាន់ខ្លាំងណាស់ចំពោះពួកគេ។ ជាធម្មតា ទារកត្រូវការអាហារចាប់ពី ៨-១២ដង/២៤ម៉ោង នៅខែដំបូង។ នៅពេលពួកគេកាន់តែធំ ទារកត្រូវការអាហារមិនសូវញឹកញាប់ឡើយ ដោយកាត់បន្ថយមិនត្រឹម ៧-៨ដង/ថ្ងៃ នៅខែទីពីរ និងទីបី។ នៅពេលទារកអាយុបាន៦ខែ ពួកគេអាចត្រូវការអាហារត្រឹមតែ ៥-៦ដង/ថ្ងៃ។ យ៉ាងណាមិញ នៅពេលឈានដល់អាយុបាន ៦-១២ខែ ទារកអាចត្រូវការបៅទឹកដោះម្ដាយ ឬទឹកដោះគោចាប់ពី ៤-៥ដង រួមជាមួយនឹងការបញ្ចុកអាហារបន្ថែម។
មូលហេតុទារកមានចំណង់អាហារយឺត
ប្រសិនបើទារកស្រាប់តែបៅតិច តែមានសុខភាពល្អ និងចាប់អារម្មណ៍ក្នុងការបៅដដែលនោះ ពួកគេអាចនឹងមានចំណង់អាហារយឺត។ ចំពោះទារកដែលមានអាយុចាប់ពី៤-៧ខែ ការបៅតិច អាចបង្ហាញថា អាអូនចាប់ផ្ដើមដុះធ្មេញ។ ប៉ុន្តែនៅក្នុងករណីខ្លះទៀត ការញ៉ាំតិចរបស់ក្មេងអាចបង្ហាញពីបញ្ហាសុខភាពធ្ងន់ធ្ងរ។ ដូច្នេះហើយ ប្រសិនបើម៉ាក់ៗសង្ស័យថាមានអ្វីមិនប្រក្រតី ចូរពិគ្រោះយោបល់ជាមួយគ្រូពេទ្យកុមារភ្លាមៗ។
សញ្ញាបង្ហាញថាទារកមានសុខភាពល្អ
ការដែលអាអូនប្រែប្រួលទៅជាមិនសូវឃ្លាន អាចជារឿងធម្មតាប៉ុណ្ណោះ។ ម៉ាក់ៗគួរយកចិត្តទុកដាក់ទៅលើការផ្លាស់ប្ដូរខោទឹកនោមរបស់ពួកគេ។ ចំពោះទារកដែលទទួលបានអាហារបំប៉នគ្រប់គ្រាន់ អាចត្រូវការប្ដូរខោទឹកនោមពី ៥-៦ដង និងបន្ទោបង់យ៉ាងហោចណាស់ ១ដង/ថ្ងៃ។ បន្ថែមពីនេះ ពួកគេហាក់មានអារម្មណ៍សុខស្រួល និងសប្បាយចិត្តបន្ទាប់ពីបៅរួច ហើយស្បែករបស់ទារកម៉ដ្តខៃ និងគ្មានស្នាមជ្រួញ។ ជាពិសេស មុខរបស់ទារកពេញស្អាត នៅពេលដែលពួកគេអាយុបាន៣សប្តាហ៍។ ករណីដែលម៉ាក់ៗបំបៅដោះកូន សុដន់របស់យើងគួរតែមានភាពទន់ល្មើយ ក្រោយបំបៅរួច។
សញ្ញាបង្ហាញថាទារកមានបញ្ហាសុខភាព
ទារកដែលមិនបានទទួលអាហារបំប៉នគ្រប់គ្រាន់ប្រចាំថ្ងៃ ពួកគេមិនសូវនោមញឹកញាប់ឡើយ ហើយទឹកនោមវិញ អាចមានពណ៌លឿងចាស់ ឬទឹកក្រូច។ ជាមួយគ្នានេះដែរ ពួកគេអាចបន្ទោបង់ ២-៣ថ្ងៃម្ដងប៉ុណ្ណោះ និងមានលាមករឹង ព្រមទាំងស្ងួតថែមទៀតផង។ ប្រសិនបើអាអូនមានអារម្មណ៍មួម៉ៅ បន្ទាប់ពីបៅរួច ឬមិនចាប់អារម្មណ៍ក្នុងការបៅ អាចបង្ហាញពីបញ្ហាសុខភាព។ ម្យ៉ាងវិញទៀត ម៉ាក់ៗក៏អាចតាមដានទម្ងន់របស់ទារក ដើម្បីឲ្យដឹងថា ពួកគេបៅគ្រប់គ្រាន់ដែរឬទេ។ ជាទូទៅ ទារកដែលមានសុខភាពល្អ គួរតែឡើងទម្ងន់ជាបន្តបន្ទាប់។ ប៉ុន្តែប្រសិនបើពួកគេមិនឡើងទម្ងន់ ឬស្រកទម្ងន់វិញនោះ ចូរពិគ្រោះយោបល់ជាមួយគ្រូពេទ្យកុមារជាបន្ទាន់។
[embed-health-tool-vaccination-tool]
