សម្តេច ហ៊ុន សែន ស្នើឲ្យពិចារណាការព្យាបាលអ្នកជំងឺកូវីដ ១៩ កម្រិតស្រាល នៅតាមផ្ទះ

ក្នុងសារជាសំឡេងនៅព្រឹកនេះ សម្តេចនាយករដ្ឋមន្ត្រីឲ្យពិចារណាវិធីសាស្ត្រព្យាបាលអ្នកជំងឺកូវីដ ១៩ កម្រិតស្រាលនៅតាមផ្ទះ ដូចបណ្តាប្រទេសមួយចំនួនដែលមានអ្នកជំងឺកូវីដ ១៩ ច្រើន រួមមាននៅសហរដ្ឋអាមេរិក និងអឺរ៉ុបជាដើម។

ប្រមុខរដ្ឋាភិបាលកម្ពុជាបានបញ្ជាក់ថា កាលពីពេលប្រជុំអន្តរក្រសួង រដ្ឋមន្ត្រីក្រសួងសុខាភិបាលបានស្នើឲ្យមានការរៀបចំព្យាបាលតាមផ្ទះ ឥឡូវនេះដល់ពេលត្រូវព្យាករណ៍សភាពការណ៍ជាមុន អំពីលទ្ធភាពទ្រទ្រង់បាននៃមន្ទីរពេទ្យ ប្រសិនបើជំងឺមិនថមថយទេនោះ មន្ទីរពេទ្យនឹងពេញហៀរ ជោរជន់ទៅដោយអ្នកជំងឺទាំងស្រាលទាំងធ្ងន់។

“យើងមិនអាចទទួលអស់ទេ ក្នុងករណីកើនឡើងថែមទៀត អ្នកជាតិច អ្នកចូលច្រើន ទោះបីជាយើងរៀបចំមន្ទីរពេទ្យប៉ុន្មានទៀតក៏មិនគ្រប់ដែរ អ៊ីចឹងវិធីដោះស្រាយ មានតែទុកអ្នកដែលមានវិជ្ជមានកូវីដ ១៩ ប៉ុន្តែស្រាល ទុកព្យាបាលនៅតាមផ្ទះ”។

សម្តេចនាយករដ្ឋមន្ត្រីបានស្នើឲ្យរៀបចំក្រមប្រណិបត្តិសម្រាប់ការព្យាបាលអ្នកជំងឺកូវីដ ១៩ កម្រិតស្រាលនៅតាមផ្ទះឲ្យហើយ។ ក្នុងករណីអ្នកជំងឺមានផ្ទះតូច ដែលអាចឆ្លងរាលដាលដល់ក្រុមគ្រួសារ ត្រូវតែយកមកព្យាបាលនៅមន្ទីរពេទ្យ។