មាតិកា

រង្វាស់សុខភាព

ចែករំលែក

Thyroidectomy Subtotal (វះកាត់ផ្នែកខ្លះនៃក្រពេញទីរ៉ូអ៊ីត)

ចំណេះដឹងមូលដ្ឋាន

១- អ្វីទៅជាក្រពេញទីរ៉ូអ៊ីត?

ក្រពេញទីរ៉ូអ៊ីត ជាសរីរាង្គមួយមានទីតាំងនៅខាងមុខបំពង់ក មាននាទីផលិតអ័រម៉ូនទីរ៉ុកស៊ីន (Tyroxine) ដែលសំខាន់ណាស់រក្សាតុល្យភាពមេតាប៉ូលីស (ប្រតិកម្មបំប្លែងអាហារ) រាងកាយ។ ពេលក្រពេញទីរ៉ូអ៊ីត ធ្វើការសកម្មពេក នាំឲ្យការបញ្ចេញអ័រម៉ូនទីរ៉ូអ៊ីតច្រើនលើសពីធម្មតា បណ្ដាលឲ្យមានបញ្ហា ដូចជា ស្រកទម្ងន់ បែកញើស និងមានបញ្ហាភ្នែក។

២- ហេតុអ្វីត្រូវវះកាត់ក្រពេញទីរ៉ូអ៊ីត?

ការវះកាត់យកក្រពេញទីរ៉ូអ៊ីត ដោយរក្សាទុកជាលិកាទីរ៉ូអ៊ីតឲ្យនៅសល់ខ្លះ ក្នុងគោលបំណងពីរ៖

– បន្ថយកម្រិតអ័រម៉ូនទីរ៉ូអ៊ីត ឲ្យចុះមកត្រឹមកម្រិតធម្មតា ឬទាបជាងមុន

– ជាលិកាសេសសល់ នៅតែអាចបញ្ចេញអ័រម៉ូនទីរ៉ូអ៊ីត គ្រប់គ្រាន់សម្រាប់បំពេញនាទីចាំបាច់ក្នុងរាងកាយ។

កត្តាប្រឈម

៣- កត្តាប្រឈមមានអ្វីខ្លះ?

ក្រោយវះយកក្រពេញទីរ៉ូអ៊ីតចេញខ្លះ ជាលិកានៅសល់តិចតួចពេក ពេលខ្លះអាចផលិតអ័រម៉ូន ទីរ៉ូអ៊ីត មិនគ្រប់គ្រាន់ ករណីនេះតម្រូវឲ្យយើងលេបថ្នាំអ័រម៉ូន ទីរ៉ូអ៊ីត អស់មួយជីវិត។

វិធីព្យាបាលផ្សេងទៀតក្រៅពីវះកាត់

– ព្យាបាលដោយប្រើ អ៊ីយ៉ូតវិទ្យុសកម្ម អាចប្រើសម្រាប់អ្នកជំងឺមួយចំនួន

– ថ្នាំ Carbimazole ឬ Propylthiouracil អាចប្រើដើម្បីគ្រប់គ្រងសកម្មភាពក្រពេញទីរ៉ូអ៊ីត មិនឲ្យផលិតអ័រម៉ូនលើសតម្រូវការ។

មុនសម្រេចចិត្តវះកាត់ ត្រូវដឹងឲ្យច្បាស់ពីផលចំណេញ និងផលវិបាក អាចកើតមានក្រោយការវះកាត់។ ប្រសិនបើមានចម្ងល់ សូមពិគ្រោះយោបល់ជាមួយគ្រូពេទ្យ ឬពេទ្យវះកាត់។

ស្វែងយល់មុនវះកាត់

៤- គួរត្រៀមអ្វីខ្លះមុនពេលវះកាត់?

– ត្រូវដឹងលក្ខខណ្ឌញ៉ាំអាហារ និងផឹកទឹកពេលវះកាត់៉

– ត្រូវជួបគ្រូពេទ្យជំនាញខាងវះកាត់ ដើម្បីឲ្យគាត់ពិនិត្យ អាចសួរនាំឲ្យច្បាស់ទាក់ទងការវះកាត់ ឬផលវិបាកក្រោយវះកាត់ជាដើម។

– ត្រូវជួបពិគ្រោះជាមួយគ្រូពេទ្យដាក់ថ្នាំសណ្ដំ ដើម្បីធានាថាសុខភាពយើងអាចទទួលថ្នាំសណ្ដំបាន ឬអាចព្យាបាលយ៉ាងណាបន្ត ករណីសុខភាពមានបញ្ហា។

៥- មានអ្វីកើតឡើងពេលកំពុងវះកាត់?

– ត្រូវទទួលថ្នាំសណ្ដំទាំងស្រុង (សន្លប់) តាំងពីចាប់ផ្ដើមវះរហូតដល់ចប់

– ការវះកាត់ប្រព្រឹត្តិទៅប្រហែល ៩០-១២០ នាទី

– គ្រូពេទ្យនឹងធ្វើការវះនៅតំបន់កខាងមុខ ទទឹងតាមភ្លីស្បែក កាត់យកក្រពេញទីរ៉ូអ៊ីត មួយភាគធំចេញ។

៦- មានអ្វីកើតឡើងក្រោយវះកាត់?

– អាចត្រឡប់ទៅផ្ទះក្រោយវះកាត់ពី ១-២ ថ្ងៃ

– អាចធ្វើការ និងសកម្មភាពជាធម្មតាវិញ ក្រោយវះកាត់ ២ សប្ដាហ៍

– ហាត់ប្រាណជួយឲ្យយើងឆាប់ជាសះស្បើយ តែមុននឹងចាប់ផ្ដើមហាត់ប្រាណ សូមសាកសួរយោបល់ពីគ្រូពេទ្យជាមុន

– គ្រូពេទ្យនឹងប្រាប់យើង ពីការព្យាបាលក្រោយវះកាត់ តាមដាន និងការណាត់ជួបលើកក្រោយ។

ផលវិបាកក្រោយវះកាត់

៧- ផលវិបាកក្រោយវះកាត់

ទោះបីមានការវះកាត់ដោយគ្រូពេទ្យជំនាញយ៉ាងណាក៏ដោយ ផលវិបាកនៅតែអាចកើតមានចៀសមិនផុត ហើយករណីមួយចំនួន អាស្រ័យតាមស្ថានភាពជំងឺនីមួយៗ ផលវិបាកទាំងនោះអាចមានដូចជា៖

– ហូរឈាមត្រង់របួសក្រោមស្បែក

– ក្លាយដំបៅ ដោយសារឆ្លងមេរោគ ឬមានជំងឺស៊ាំនិងថ្នាំ

– ប្រតិកម្មផ្សេងៗទៀត ទាក់ទងឥទ្ធិពលថ្នាំសណ្តំ

– និយាយលែងលឺ ឬខ្សោយជាងមុន ដោយសារប៉ះពាល់ដល់សរសៃវិញ្ញាណបញ្ជាបំពង់សំឡេង

– សាច់ដុំទាញ ឬកន្ត្រាក់ខុសប្រក្រតី ដោយសារវះកាត់ប៉ះពាល់ក្រពេញប៉ារ៉ាទីរ៉ូអ៊ីត (Parathyroid) នាំឲ្យកាល់ស្យូមថយចុះ។

ករណីមានបញ្ហាទាំងនេះកើតឡើងក្រោយការវះកាត់ សូមប្រាប់គ្រូពេទ្យឲ្យបានដឹង ដើម្បីគាត់អាចជួយដោះស្រាយតាមបច្ចេកទេសវេជ្ជសាស្ត្រ។

ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕

ត្រួតពិនិត្យដោយ

វេជ្ជ. ចាន់ ស៊ីណេត

ឯកទេសសម្ភព និងរោគស្ត្រី · មន្ទីរពេទ្យបង្អែកមិត្តភាពកម្ពុជា-ចិន សែនសុខ

អត្ថបទដោយ KEO Seng ratha · កែ 24/01/2019

Thyroidectomy Subtotal (វះកាត់ផ្នែក​ខ្លះ​នៃក្រពេញទីរ៉ូអ៊ីត)

ចំណេះដឹងមូលដ្ឋាន

កត្តាប្រឈម

ស្វែងយល់មុនវះកាត់

ផលវិបាកក្រោយវះកាត់

Thyroidectomy Subtotal (វះកាត់ផ្នែកខ្លះនៃក្រពេញទីរ៉ូអ៊ីត)