បច្ចេកវិទ្យារីកចម្រើន ស្រីៗដែលមិនពេញចិត្តនឹងរូបរាងខាងក្រៅរបស់ខ្លួន បានសម្រេចចិត្តទៅកែកុនកន្លែងមិនពេញចិត្តនោះ ដូចជាច្រមុះ មាត់ ដើមទ្រូងជាដើម។ ទាក់ទងនឹងការកែកុនដើមទ្រូងញឹកញាប់នោះ មានមតិមួយចំនួនលើកឡើងថា ស្ត្រីអាចប្រឈមនឹងជំងឺមហារីកសុដន់។

ចំពោះបញ្ហានេះលោកសាស្ត្រាចារ្យ អ៊ាវ សុខា គ្រូពេទ្យជំនាញជំងឺមហារីក និងឈាមបានឲ្យដឹងថា ការវះកាត់ពង្រីកដើមទ្រូងឲ្យធំមានបច្ចេកទេសកែច្រើនយ៉ាង ហើយបញ្ហាប្រឈម ឬមិនប្រឈមនឹងជំងឺមហារីកសុដន់ គឺអាស្រ័យទៅលើបច្ចេកទេសដែលប្រើដើម្បីកែដើមទ្រូងនោះ។

លោកវេជ្ជបណ្ឌិតបានឲ្យឧទាហរណ៍ថា “មានបងប្អូនស្រ្តីខ្លះនៅកម្ពុជា គាត់ចាក់សីលីកូន (Silicone) ទៅក្នុងដើមទ្រូង ដើម្បីឲ្យសីលីកូនពង្រីកទំហំសុដន់របស់គាត់ ហើយសីលីកូននោះទៅប៉ះនឹងខ្លាញ់ ប៉ះទៅលើសាច់ដុំ និងប៉ះទៅលើក្រពេញទឹកដោះផ្ទាល់ បច្ចេកទេសបែបនេះអាចមានហានិភ័យ តែមិនមែនទាំងស្រុងទេ អាចមាន ២ករណី ក្នុង១០០ករណី”។

អត្ថបទពាក់ព័ន្ធ៖

លោកវេជ្ជបណ្ឌិតបានបញ្ចាក់ដែរថា ផ្ទុយទៅវិញ បច្ចេកទេសដែលធ្វើការវះកាត់ញាត់ថង់សីលីកូនចូលទៅក្នុងដើមទ្រូង នៅខាងក្រោយខ្លាញ់ ពីលើសាច់ដុំដើមទ្រូង បើសិនជាថង់ប្លាស្ទិចសីលីកូននោះមិនធ្លាយទេ គ្មានហានិភ័យអ្វីដែលគួរឲ្យបារម្ភទេ។ ឥឡូវនេះដោយសារវិទ្យាសាស្ត្រទំនើបមែនទែន ដូចនេះគេវះយកខ្លាញ់នៅក្នុងក្បាលពោះស្រ្តី ទៅដាក់នៅក្នុងសុដន់ដើម្បីឲ្យធំ វិធីនេះគឺគ្មានបញ្ហាទេ ព្រោះខ្លាញ់គឺជារបស់ស្ត្រីផ្ទាល់។

ដើម្បីបញ្ចៀសហានិភ័យជំងឺមហារីកសុដន់លោកវេជ្ជបណ្ឌិតក៏បានឲ្យយោបល់ថា ស្រ្តីគួរជ្រើសរើសបច្ចេកទេសទី៣ ហើយរកពេទ្យដែលមានជំនាញ វះកាត់ពង្រីកសុដន់ដោយប្រើខ្លាញ់របស់ខ្លួនផ្ទាល់ ដើម្បីពង្រីកសុដន់ ព្រោះវាគ្មានហានិភ័យប្រឈមនឹងការកើតជំងឺមហារីកសុដន់។

អត្ថបទពាក់ព័ន្ធ៖

នៅកម្ពុជា ស្រ្តីប្រឈមនឹងជំងឺមហារីកសុដន់លំដាប់ទី២ បន្ទាប់ពីជំងឺមហារីកមាត់ស្បូន ហើយមកទល់សព្វថ្ងៃនេះ នៅមិនទាន់មានមូលហេតុច្បាស់លាស់នៅឡើយទេថា អ្វីដែលធ្វើឲ្យស្រី្តកើតជំងឺមហារីកសុដន់ តែក្នុងការសិក្សាវិទ្យាសាស្រ្តគេរកឃើញថា ការកើតមហារីកសុដន់លើស្រ្តីអាចបណ្តាលមកពីបម្រែបម្រួលហ្សែននៅក្នុងរាងកាយ។

ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕

ស្រីៗវះកាត់ពង្រីកដើមទ្រូងញឹកញាប់ អាចប្រឈមមហារីកសុដន់?