កំពុងពពោះធ្ងន់មុខស្រាលក្រោយស្រាប់ផង បែរជាឲ្យហាត់ប្រាណទៀត កុំថាឡើយហាត់ប្រាណ សូម្បីតែដើរក៏ពិតបាកផង នៅចង់បានរាងស្អាតអីទៀត? មិនអ៊ីចឹងអីស្រីៗគ្នាយើង ប៉ុន្តែបើគ្នាយើងពិតជាគិតចឹងមែន ខុសធ្ងន់ហើយ ព្រោះថា ហាត់ប្រាណអំឡុងពេលពពោះ មិនមែនដើម្បីរាងស្អាតទេ គឺដើម្បីសុខភាពល្អ ទាំងម៉ាក់ៗ និងបេប៊ី។ “Hello គ្រូពេទ្យ” នឹងប្រាប់ពីអត្ថប្រយោជន៍ល្អៗពីការហាត់ប្រាណពេលពពោះឲ្យគ្នាយើងបានដឹង។

ការហាត់ប្រាណ ៣០នាទី រាល់ថ្ងៃ អាចផ្ដល់អត្ថប្រយោជន៍ដល់សុខភាពរបស់ម៉ាក់ៗ អំឡុងពេលពពោះ។ ប៉ុន្តែបើគ្មានពេល ឬដោយសារលក្ខខណ្ឌអ្វីមួយនោះ ហាត់តែ ២០នាទី ៣-៤ ថ្ងៃ/សប្ដាហ៍ នៅតែផ្ដល់ផលអត្ថប្រយោជន៍ដូចគ្នា។ អ្វីសំខាន់បំផុតអំឡុងពេលពពោះ ត្រូវធ្វើសកម្មភាព ដើម្បីឲ្យឈាមរត់ស្រួល។

១- អំឡុងពេលពពោះគួរហាត់ប្រាណបែបណា?

មុនចាប់ផ្ដើមហាត់ប្រាណ រឿងសំខាន់ គឺម៉ាក់ៗ ត្រូវពិភាក្សាជាមួយអ្នកផ្ដល់សេវាថែទាំសុខភាពជាមុន ខណៈវិធីហាត់ប្រាណសាមញ្ញៗ ងាយៗត្រូវគេនិយមធ្វើមានដូចជា៖

– ដើរ៖ ធម្មតា ហាត់ប្រាណតិចៗ ដូចជាដើរ ជាលំហាត់ប្រាណល្អបំផុត ដើម្បីចាប់ផ្ដើមអនុវត្ត។ ការដើរហាត់ប្រាណ មានសុវត្ថិភាពទាំងម៉ាក់ៗ និងបេប៊ី ងាយស្រួលសម្រាប់រាងកាយ ក៏មិនត្រូវការឧបករណ៍បន្ថែមនោះដែរ។

– អង្គុយចុះ-ងើបឡើង (Squatting)៖ហាត់ប្រាណដោយអង្គុយចុះ-ងើបឡើង អាចជួយដល់ត្រគាកយើង ងាយស្រួលនៅពេលសម្រាល។ ដើម្បីហាត់ប្រាណដូច្នេះ យើងត្រូវឈរឲ្យត្រង់ស្មា និងអោនចុះក្រោមតិចៗ ទៅរកជំហរអង្គុយ។ ស្រីៗ ត្រូវធ្វើខ្នងឲ្យត្រង់ ដាក់កែងជើងឲ្យជាប់កម្រាល ហើយជង្គង់ មិនត្រូវចេញទៅខាងមុខប្រអប់ជើងទេ។ រក្សាការអង្គុយ ពី ១០-៣០ វិនាទី ហើយអាចយកដៃ ច្រត់លើជង្គង់បាន បន្ទាប់មកងើបឈឡើងយឺតៗ ដោយប្រើដៃច្រត់ជង្គង់ ប្រសិនបើម៉ាក់ៗត្រូវការ។ អនុវត្តដដែលៗបែបនេះ ចំនួន ៥ដង ឬច្រើនជាងនេះ។

– ហាត់ប្រាណត្រគាក៖ វិធីនេះ អាចជួយពង្រឹងសាច់ដុំពោះ និងជួយបញ្ជៀសអាការៈឈឺខ្នងអំឡុងពេលពពោះ។ ហាត់ប្រាណត្រគាក អាស្រ័យលើដៃ និងជើង ដោយគេងដាក់ខ្នង ដៃ និងប្រអប់ជើងស្មើកម្រាល យកជង្គង់ឡើងលើ ប្រឹងលើកត្រគាកឡើងយឺតៗ ដោយរក្សាជំហរនេះ ២-៣ វិនាទី បន្ទាប់មកសម្រាកបាន ប៉ុន្ដែកុំឲ្យខ្នងធ្លាក់ចុះក្រោម។ បើពិបាកធ្វើ អាចឈរឲ្យត្រង់ខ្លួន ដៃច្រត់ត្រគាក រុញពោះទៅមុខបន្តិច ថយក្រោយបន្តិច ឲ្យបាន ២-៣ នាទី ២-៣ ដងក្នុងមួយថ្ងៃ។

ហាត់ប្រាណពេលពពោះ Hello គ្រូពេទ្យ

២- បម្រែបម្រួលរាងកាយពេលពពោះប៉ះពាល់ការហាត់ប្រាណ

អំឡុងពេលពពោះ រាងកាយរបស់យើង នឹងមានបម្រែបម្រួលយ៉ាងច្រើន។ បម្រែបម្រួលជារួម អាស្រ័យលើអ័រម៉ូន ដែលបណ្ដាលឲ្យសាច់ដុំនានា អសកម្មភាព។ ចំណុចកណ្ដាល នៃទំនាញ ឬលំនឹង ប្រែប្រួលដោយសារឡើងទម្ងន់ នៅផ្នែកខាងមុខ ក៏ដូចជា បម្រែបម្រួលត្រគាក។ ការឡើងទម្ងន់ នឹងធ្វើឲ្យរាងកាយរបស់ម៉ាក់ៗ កាន់តែលំបាកជាងមុន។ កត្ដាទាំងអស់នេះ ប៉ះពាល់ដល់ការហាត់ប្រាណនិងក្បួនហាត់ប្រាណ ដែលយើងគួរហាត់។ ល្អបំផុត គឺត្រូវពិភាក្សាជាមួយអ្នកផ្ដល់សេវាថែទាំសុខភាព ពីការហាត់ប្រាណ សម្រាប់ស្ថានភាពជាក់ស្ដែង។

៣- អត្ថប្រយោជន៍ពីការហាត់ប្រាណអំឡុងពេលពពោះ

– ជួយកាត់បន្ថយអាការៈឈឺខ្នង ទល់លាមក ហើមពោះ និងហើមដៃ ជើង

– ជួយបង្ការ និងព្យាបាលទឹកនោមផ្អែមពេលពពោះ

– បង្កើនថាមពល

– ធ្វើឲ្យឥរិយាបទ និងអារម្មណ៍ប្រសើរ

– ធ្វើឲ្យសាច់ដុំហាប់ រឹងមាំ និងធន់

– ជួយឲ្យគេងបានស្រួល។

ការហាត់ប្រាណទៀងទាត់ ជួយឲ្យគ្នាយើង មានរាងសមសួន អំឡុងពេលពពោះ និងជួយលើកកម្ពស់សមត្ថភាពពេលសម្រាល ជួយឲ្យធ្វើគ្នាយើង ឆាប់វិលត្រឡប់មកមានរាងដូចដើមវិញ ក្រោយទារកកើត។

"ហាត់​ប្រាណ​ពេលពពោះ" មិនដើម្បី​រាង​ស្អាត​ទេ គឺ​ដើម្បី​សុខភាព

១- អំឡុង​ពេល​ពពោះគួរហាត់ប្រាណបែបណា?

២- បម្រែបម្រួល​រាងកាយពេលពពោះប៉ះពាល់ការហាត់ប្រាណ

៣- អត្ថប្រយោជន៍​ពី​ការ​ហាត់ប្រាណអំឡុង​ពេល​ពពោះ

"ហាត់ប្រាណពេលពពោះ" មិនដើម្បីរាងស្អាតទេ គឺដើម្បីសុខភាព

១- អំឡុងពេលពពោះគួរហាត់ប្រាណបែបណា?

២- បម្រែបម្រួលរាងកាយពេលពពោះប៉ះពាល់ការហាត់ប្រាណ

៣- អត្ថប្រយោជន៍ពីការហាត់ប្រាណអំឡុងពេលពពោះ