ការចាក់វ៉ាក់សាំងមុនពេលពពោះ និងអំឡុងពពោះ ពិតជាមានសារសំខាន់ណាស់ គឺជួយបង្ការការឆ្លងមេរោគ ឬជំងឺផ្សេងៗ ដែលប៉ះពាល់ដល់សុខភាពម្តាយ និងកូនក្នុងពោះ។ មុនពេលពពោះ និងពេលកំពុងពពោះ ស្រីៗត្រូវចាក់វ៉ាក់សាំងអីខ្លះ? តើវ៉ាក់សាំងនីមួយៗចាំបាច់យ៉ាងណាខ្លះចំពោះម្តាយ និងកូន?
មកដឹងពីប្រភេទវ៉ាក់សាំង ស្រីៗត្រូវចាក់មុនពេលពពោះ និងពេលពពោះ
១. វ៉ាក់សាំងត្រូវចាក់មុនពេលពោះ
ស្រីៗដែលត្រៀមលក្ខណៈយកកូន ចាំបាច់ត្រូវចាក់វ៉ាក់សាំងការពារជំងឺស្អូច និងអុតស្វាយ ឲ្យបាន ៣ ខែ មុនមានផ្ទៃពោះ ទើបមានប្រសិទ្ធភាព និងមិនគ្រោះថ្នាក់។ នេះបើតាមការអះអាងរបស់លោកស្រីវេជ្ជបណ្ឌិត ទី សុវណ្ណរដ្ឋ សញ្ញាបត្រមកពីប្រទេសបារាំង។
លោកស្រីវេជ្ជបណ្ឌិតបានបន្តថា វ៉ាក់សាំងបង្ការជំងឺស្អូច វ៉ាក់សាំងអុតស្វាយ មិនអាចចាក់អំឡុងពេលកំពុងមានផ្ទៃពោះនោះទេ។ ដើម្បីបង្ការជំងឺឆ្លងទាំង ២ មុខនេះ ស្រីៗដែលមានបំណងយកកូន ត្រូវចាក់វ៉ាក់សាំងបង្ការជំងឺស្អូច វ៉ាក់សាំងអុតស្វាយ ឲ្យបាន៣ខែ មុនពេលមានផ្ទៃពោះ នោះទើបមានសុវត្ថិភាពទាំងម្តាយទាំងកូន។
អត្ថបទពាក់ព័ន្ធ៖ ស្រីៗកំពុងពពោះ បើកើតស្អូច គ្រោះថ្នាក់ធំដល់កូនក្នុងផ្ទៃណាស់
២. វ៉ាក់សាំងត្រូវចាក់ពេលពពោះ
មានតែវ៉ាក់សាំង ២ មុខប៉ុណ្ណោះដែលតម្រូវឲ្យស្រីៗចាក់ពេលកំពុងពពោះ វ៉ាក់សាំងទាំងនោះមាន វ៉ាក់សាំងការពារជំងឺតេតាណុស និងវ៉ាក់សាំងផ្តាសាយ។
– វ៉ាក់សាំងតេតាណុស
ជំងឺតេតាណូសបង្កដោយបាក់តេរីឈ្មោះ Clostrium tetani ធ្វើឲ្យប៉ះពាល់ដល់ប្រព័ន្ធសរសៃប្រសាទ នាំឱ្យសាច់ដុំកន្ត្រាក់ មានការឈឺចាប់សាច់ដុំថ្គាម និងក ។ ជំងឺនេះក៏អាចបណ្តាលមកពីសត្វឆ្កែ ឆ្មា ស្វា ឬជ្រូកខាំ និងរបួសដោយសារការមុតអំបែង វត្ថុមិនស្អាត ឬច្រែះជាដើម។ ចំពោះទារកវិញមេរោគតេតាណូសចូលតាមផ្ទិតដោយសារតែការខ្វះអនាម័យ ឬយករបស់មិនស្អាតមិនរុំផ្ចិតកូន។
ស្រីៗពពោះ គ្រូពេទ្យនឹងណែនាំឲ្យចាក់វ៉ាក់សាំងការពារជំងឺតេតាណុស នៅត្រីមាសដំបូង ដើម្បីការពារការកើតជំងឺនេះទាំងម្តាយទាំងកូន។
– វ៉ាក់សាំងផ្តាសាយ
អង្គការសុខភាពពិភពលោក (WHO) បានណែនាំឲ្យស្រីៗមានផ្ទៃពោះចាក់វ៉ាក់សាំងផ្តាសាយទោះក្នុងត្រីមាសណាដោយ។ ម្តាយដែលចាក់វ៉ាក់សាំងការពារជំងឺផ្តាសាយ អាចបង្ការកូនពីជំងឺគ្រុនផ្តាសាយនៅប៉ុន្មានខែដំបូងនៃជីវិតរបស់ពួកគេ។
អត្ថបទពាក់ព័ន្ធ៖ ចង់ចាក់វ៉ាក់សាំងផ្ដាសាយ ទាំងមនុស្សទូទៅ ក្មេង ស្ត្រីមានផ្ទៃពោះ ត្រូវដឹងរឿងទាំងនេះសិន
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
Hello Health Group និង “Hello គ្រូពេទ្យ” មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
ផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្ម