ស្រីៗគ្នាយើងជាធម្មតាមានផ្ទៃពោះដំបូង តែងឮគ្នីគ្នាប្រាប់ ឬដេញឲ្យទៅពិនិត្យអេកូ។ ប៉ុន្តែ ហេតុផលចាំបាច់នៅពីក្រោយការពិនិត្យផ្ទៃពោះដោយឆ្លុះអេកូ ជាអ្វីឲ្យប្រាកដ ប្រហែលគ្នាយើងអត់ទាន់ដឹងនៅឡើយ ក្រៅពីចង់ឃើញការវិវត្តកូនក្នុងពោះ។ បើចឹងទុកឲ្យ “Hello គ្រូពេទ្យ” ជាអ្នកស្រាយចម្ងល់នេះចុះ។
ការទាមទារមើលអេកូពីគ្រូពេទ្យ សំខាន់បំផុតគឺចង់ដឹងច្បាស់ សរីរាង្គក្នុងអាងត្រគាកស្ត្រី និងពេលមានផ្ទៃពោះ ដើម្បីដឹងពីការលូតលាស់របស់អូនអូន ក៏ដូចជា ថង់ទឹកភ្លោះ និងសុក ជាដើម។
១- ពេលណាល្អបំផុតដើម្បីមើលអេកូ?
ជាទូទៅ ស្រីៗមានផ្ទៃពោះ ចាំបាច់ត្រូវមើលអេកូនៅសប្ដាហ៍ទី២០ ឬអំឡុងខែទី ៤ ព្រោះជាពេលល្អបំផុតដើម្បីតាមដានការលូតលាស់អូនអូន និងភាពមិនប្រក្រតីមួយចំនួន។ ម្យ៉ាងទៀត យើងអាចដឹងពីភេទរបស់អូនអូនថែមទៀតផង។ ទោះយ៉ាងណា ត្រូវចាំថាអេកូសាស្ត្រមិនប្រាកដ ១០០% នោះទេ ហើយចំណុចមួយចំនួនយើងអាចដឹងពីការពិនិត្យអេកូមានដូចជា៖
– ចំនួនកូនក្នុងផ្ទៃ
– អាយុគភ៌
– ទម្ងន់ទារក
– សុខភាពទារក
– ទីតាំងរបស់សុក
– ចំនួនទឹកភ្លោះ
– កំណត់ទីតាំងទារក
– ថ្ងៃសម្រាល (ប្រហាក់ប្រហែល)។
២- ពេលអេកូត្រូវធ្វើម៉េចខ្លះ?
គឺតម្រូវឲ្យយើងសម្រាកលើគ្រែ បន្ទាប់មកគ្រូពេទ្យនឹងលាបជែលទៅលើទីតាំងត្រូវពិនិត្យ ដើម្បីងាយស្រួលបញ្ជូនរូបភាពទៅលើអេក្រង់បានច្បាស់ល្អ ព្រោះវាទទួលរូបភាពដោយការបាញ់ និងទទួលសូរដែលមានហ្វ្រេកង់ទាបតាមក្បាលសុងទៅលើតំបន់ដែលត្រូវពិនិត្យ ហើយអំឡុងពេលនោះ យើងអាចដឹងពីសុខភាពអូនអូន រូបរាងនៅលើអេក្រង់ផ្ទាល់តែម្ដង។ លើសពីនេះ អាចផ្តិតរូបភាពចេញមកក្រៅភ្លាមៗ និងព័ត៌មានចាំបាច់មួយចំនួន។
ពេលខ្លះ យើងអាចត្រូវទុកទឹកនោមសិន ឬទប់ដង្ហើមរយៈពេលខ្លី ពេលមើលអេកូទៅតាមការណែនាំរបស់គ្រូពេទ្យ ហើយជាធម្មតា ការមើលអេកូ ត្រូវប្រើពេលយ៉ាងយូរ ៣០នាទី។
៣- ពិនិត្យអេកូប៉ះពាល់សុខភាពឬអត់?
គ្មានអ្វីមានសុវត្ថិភាព ១០០% នោះទេ ហើយក៏មិនទាន់មានការសិក្សាណាបង្ហាញថា មើលអេកូប៉ះពាល់ធ្ងន់ធ្ងរដល់ម្ដាយនិងទារកដែរ បើការពិនិត្យនោះត្រឹមត្រូវតាមក្បួនច្បាប់វេជ្ជសាស្ត្រ។ មើលអេកូ ត្រូវធ្វើដោយគ្រូពេទ្យឯកទេសជំនាញច្បាស់លាស់។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
[embed-health-tool-pregnancy-weight-gain]
