ការលូតលាស់គភ៌
ដល់ពេលត្រៀមខ្លួនហើយ អាអូនមានទម្ងន់ប្រហែល ៣,៤គីឡូក្រាម ប្រវែងប្រហែល ៥០,៨ សង់ទីម៉ែត្រ ទំហំប៉ុនផ្លៃល្ពៅ ហើយអាចនឹងសម្រាលគ្រប់ពេល។ រយៈពេលជាច្រើនសប្តាហ៍ដែលម៉ាក់ប៉ាគ្រប់រូបទន្ទឹងរង់ចាំយ៉ាងអន្ទះសា ដើម្បីបានឃើញមុខមាត់ រូបរាងបេប៊ីដែលនឹងកើតក្នុងពេលឆាប់ៗនេះ។ ត្រឹមតែ ៥% នៃស្រ្តីមានផ្ទៃពោះប៉ុណ្ណោះបានសម្រាលត្រូវតាមកាលបរិច្ឆេទកំណត់ ហើយស្រីៗយើងមួយចំនួនដែលមានផ្ទៃពោះជាលើកដំបូងអាចហួសកាលបរិច្ឆេទសម្រាលររហូតដល់ ២សប្តាហ៍។
ធម្មតាទារកកើតមកមានរូបរាង ក្បាលមិនមូលស្អាតនោះទេ អាចមានពណ៌ស្បែកប្រែប្រួល ស្បែកស្ងួត និងកន្ទួលក្រហម។ នេះគ្រាន់តែបណ្ដោះអាសន្នប៉ុណ្ណោះ។ បន្ទាប់ពីអាអូនកើត គ្រូពេទ្យនឹងលាងសម្អាតទឹករម្អិលក្នុងមាត់ និងច្រមុះរបស់បេប៊ី ហើយយើងនឹងឮសម្រែកយំរបស់កូនលើកដំបូង។ បន្ទាប់មកគ្រូពេទ្យនឹងដាក់អាអូនលើពោះហើយកាត់ទងផ្ចិត រួចថ្លឹងទម្ងន់ និងវាស់ប្រវែងបេប៊ី។ ប្រសិនបើផ្ទៃពោះមានបញ្ហា ឬត្រូវចាំបាច់វះកាត់ដើម្បីសម្រាលនោះ នឹងមានគ្រូពេទ្យផ្នែកកុមារនៅក្នុងពេលសម្រាលថែទាំអាអូនកើតមកភ្លាមៗ ហើយបន្ទាប់មកយកកូនយើងទើបនឹងកើតដាក់នៅក្នុងដៃកំពុងរង់ចាំរបស់យើង។
បម្រែបម្រួលរាងកាយ
១- រាងកាយប្រែប្រួលអីខ្លះ?
បើការឈឺពោះមិនវិវត្តទៅមុខ សុខភាពយើង ឬកូនមិនល្អនោះ គ្រូពេទ្យអាចឲ្យយើងឈឺពោះសម្រាលដោយការចោះបំបែកទឹកភ្លោះ ឬចាប់ផ្តើមផ្តល់ពពួកអ័រម៉ូន អុកស៊ីតូស៊ីន (Oxytocin) ឬថ្នាំផ្សេងទៀត។ ក្នុងករណីកាន់តែធ្ងន់ធ្ងរ ផ្ទៃពោះស្ថិតក្នុងស្ថានភាពគ្រោះថ្នាក់ ការសម្រាលអាចវះកាត់។
ម៉ាក់ៗមួយចំនួនបានដឹងខ្លួនឯងមុនថាត្រូវសម្រាលតាមវិធីវះកាត់ ដូច្នេះអាចកំណត់ថ្ងៃកំណើតកូនបានល្អ តាមការចង់បាន។ ទោះបីជាតម្រូវឲ្យសម្រាលដោយវះកាត់មិនបានព្រៀងទុកក្តីក៏ទំនាក់ទំនងម្តាយ និងកូននៅតែមានដូចការសម្រាលលតាមធម្មជាតិ។ វាមិនមែនជាការសម្រាលកូនដែលយើងស្រមៃក៏ដោយ ប៉ុន្តែបេប៊ីដ៏ស្រស់ប្រិមប្រិយនឹងចេញពីផ្ទៃបានឃើញពន្លឺព្រះអាទិត្យនៃពិភពលោកថ្មី។
ចំណុចអីខ្លះគួរបារម្ភ?
យើងប្រាកដជាមានបទពិសោធន៍ជាច្រើនដូចជា ការទន្ទឹងរង់ចាំជួបមុខកូន មុនពេលបានជួបមុខកូន ត្រូវឆ្លងកាត់ការឈឺពោះ និងការសម្រាលយ៉ាងលំបាកលំបិន ស្ទើរស្លាប់រស់។ ដូច្នេះយើងត្រូវរៀនពីដំណាក់កាលទាំង៣ នៃការសម្រាលក្នុងវគ្គថែទាំស្រ្តីមានផ្ទៃពោះ។
ដំណាក់កាលទី១៖ ការឈឺពោះសម្រាល គឺការកន្រ្តាក់ស្បូនដែលធ្វើឲ្យមាត់ស្បូនបើក និងស្តើងក្នុងចន្លោះពេលទៀងទាត់។
ដំណាក់កាលទី២៖ ការឈឺពោះសម្រាល គឺការប្រឹងបង្កើតកូនរហូតដល់ក្បាលអាអូនចេញមកក្រៅ ។
ដំណាក់កាលទី៣៖ ការឈឺពោះសម្រាល គឺពេលដែលយកសុកចេញ។ បើការឈឺពោះសម្រាលមិនប្រព្រឹត្តិតាមដំណាក់កាលនោះទេ គ្រូពេទ្យនឹងមានវិធីផ្សេងសម្រាប់ជួយឲ្យយើងដើរតាមដំណាក់កាល ឬឲ្យយើងឈឺពោះសម្រាលដោយប្រើប្រាស់ថ្នាំបើក និងធ្វើឲ្យមាត់ស្បូនទន់។ គ្រូពេទ្យនឹងចោះបំបែកថង់ទឹកភ្លោះដោយប្រើឧបករណ៍ពេទ្យដូចទំពក់ជ័រសម្រាប់ចោះបង្ហូរថង់ទឹកភ្លោះ។
ការជួបគ្រូពេទ្យ
២- ប្រាប់អីខ្លះទៅពេទ្យ?
សម្រាលរួចថ្មីៗអ៊ីចឹង យើងគួរសួរគ្រូពេទ្យអំពីការពន្យារកំណើត ដើម្បីជៀសវាងភ្លាត់ស្នៀតមានកូនញឹកពេក ឬមិនសមតាមបំណងប្រាថ្នា។ ពេទ្យនឹងប្រាប់ពីមធ្យោបាយពន្យារកំណើតមួយណាដែលយើងចង់បាន។
តេស្តអីខ្លះចាំបាច់?
ប្រសិនបើលើស ១ សប្តាហ៍នៃកាលបរិច្ឆេទសម្រាល គ្រូពេទ្យនឹងណែនាំឲ្យយើងធ្វើតេស្តតាមដានចង្វាក់បេះដូង និងចលនាកម្រើកកូនដើម្បីប្រាកដថា បេប៊ីទទួលអុកស៊ីសែនបានគ្រប់គ្រាន់សម្រាប់ខួរក្បាលដំណើរការ។
សុខភាព និងសុវត្ថិភាព
៣- ត្រូវដឹងពីអីខ្លះ?
ការធ្វើដំណើរតាមយន្តហោះ៖ បើត្រូវធ្វើដំណើរតាមយន្តហោះក្នុងត្រីមាសទី ៣ យើងត្រូវជជែកជាមួយគ្រូពេទ្យមុននឹងកក់សំបុត្រយន្តហោះ។
ការធ្វើដំណើរផ្លូវឆ្ងាយ៖ ត្រូវហាមដាច់ឃាត់ចំពោះស្រីៗមានផ្ទៃពោះ នៅពេលដែលមាន៖
– មានផ្ទៃពោះកូនភ្លោះ ឬកូនច្រើន
– មានជំងឺទឹកនោមផ្អែម ឬលើសឈាម
– សុកតោងខុសប្រក្រតី ឬធ្លាក់ឈាម
– មានសញ្ញាគំរាមកើតមិនគ្រប់ខែ
– មានប្រវត្តិឈាមកក
ស្រីៗត្រូវរឹងមាំណា មិនត្រូវតក់ស្លុកនោះទេ ប្រសិនបើយើងមានអារម្មណ៍ភ័យខ្លាច ឬប្រែប្រួលអ្វីមួយគួរតែប្រាប់ និងសាកសួរគ្រូពេទ្យ។ Helloគ្រូពេទ្យ នៅទីនេះដោយក្តីរីករាយដើម្បីជួយស្រីៗយើងយល់ដឹងបន្ថែមទៀតលើកូនដែលទើបសម្រាលក្នុងឆ្នាំដំបូងទៀត។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
[embed-health-tool-pregnancy-weight-gain]
