ការប្រែប្រួលអ័រម៉ូន ធ្វើឲ្យស្ត្រីមានផ្ទៃពោះធ្លាក់សច្រើនជាងស្ត្រីធម្មតា ហើយប្រភេទសដែលស្ត្រីពពោះជួបប្រទះញឹកញាប់ គឺធ្លាក់សដោយពពួកផ្សិត។ នេះបើតាមការលើកឡើងរបស់លោកស្រីវេជ្ជបណ្ឌិត ថៃ សុវណ្ណរ៉ា បម្រើការងារនៅ Singapore Medical Center។
លោកស្រីវេជ្ជបណ្ឌិតថា ធ្លាក់សដោយសារពពួកផ្សិត មិនមានធុំក្លិននោះទេ តែជាការធ្លាក់ច្រើន មានសភាពដុំក្រាស់ ដូចតៅហ៊ូ ហើយថែមទាំងរមាស់នៅទ្វារមាស ទៅជារលាកទ្វារមាស។
![មេរោគផ្សិត](https://cdn.hellokrupet.com/wp-content/uploads/2020/07/មេរោគផ្សិត.jpg)
ទោះជាធ្លាក់សប្រភេទនេះមិនមានក្លិនក្តី លោកស្រីវេជ្ជបណ្ឌិតថា ស្ត្រីពពោះត្រូវទៅជួបគ្រូពេទ្យដើម្បីពិនិត្យមើល ដោយការបៀកទឹករម្អិលនៅទ្វារមាសទៅពិនិត្យ តើការធ្លាក់សនោះអាចបណ្តាលមកពីការជំងឺកាមរោគឬទេ ?
បើលទ្ធផលបញ្ជាក់ថា ការធ្លាក់សដោយពពួកផ្សិត គ្រូពេទ្យនឹងឲ្យថ្នាំសុល ឬថ្នាំលេបដើម្បីកម្ចាត់ផ្សិត ដែលថ្នាំនោះលោកស្រីវេជ្ជបណ្ឌិតថា មិនប៉ះពាល់ដល់កូនទេ។ ផ្ទុយទៅវិញបើស្រ្តីពពោះមានធ្លាក់សបណ្តាលមកជំងឺកាមរោគ ត្រូវព្យាបាលឲ្យបានដិតដល់ បើមិនអ៊ីចឹងទេអាចប្រឈមមានកូនក្រៅស្បូន បែកទឹកភ្លោះមុនសម្រាល ឬកូនកើតមកជួបបញ្ហាឈឺភ្នែក។