ទោះម្នាស់សម្បូរដោយវីតាមីនក្តី ប៉ុន្តែវាមានផ្ទុកអង់ហ្ស៊ីម Bromelain ជាសារធាតុមានទំនាក់ទំនងជាមួយការកន្ត្រាក់ស្បូន។ ហេតុនេះហើយ ទើបចាស់ៗពីដើមជឿថា បើស្រីៗមានផ្ទៃពោះញ៉ាំម្នាស់ អាចរលូតកូន។ មិនថាតែស្រីៗគ្នាយើងទេ សូម្បីតែប្រុសៗ គ្រាន់តែឮក៏បារម្ភជំនួសដែរ មិនអ៊ីចឹង?
រឿងដ៏ចម្រូងចម្រាស! ពិតអត់ដែលថា ញ៉ាំម្នាស់ រលូតកូន?
ត្រួតពិនិត្យដោយ វេជ្ជ. ចាន់ ស៊ីណេត · មន្ទីរពេទ្យបង្អែកមិត្តភាពកម្ពុជា-ចិន សែនសុខ
ឈប់! បើចង់ដឹងម្នាស់ និងការរលូតកូន ទាក់ទងគ្នាយ៉ាងណា អានអត្ថបទ “Hello គ្រូពេទ្យ” សិនទៅ។
តាមការស្រាវជ្រាវបែបវិទ្យាសាស្ត្របញ្ជាក់ថា គ្មានហេតុផលសមរម្យណាមួយបង្ហាញថា ម្នាស់នាំឲ្យរលូតអូនៗក្នុងផ្ទៃម៉ាក់ៗនោះទេ ដូច្នេះចម្លើយ គឺ «អត់ទេ»! ផ្ទុយទៅវិញ ម្នាស់នៅតែជាផ្លែឈើល្អបំផុតសម្រាប់សុខភាព។
១- គុណប្រយោជន៍ម្នាស់
គាំទ្រប្រព័ន្ធភាពស៊ាំក្នុងរាងកាយ៖ ម្នាស់មានផ្ទុកវីតាមីន C ជួយពង្រឹងប្រព័ន្ធភាពស៊ាំ និងផ្តល់ការការពារសម្រាប់គ្នាយើងមានផ្ទៃពោះ។ បន្ថែមពីលើនេះ អង់ហ្ស៊ីម Bromelain ក៏មានប្រសិទ្ធភាពខ្ពស់ប្រឆាំងជំងឺផ្តាសាយ។ មានន័យថា បើម៉ាក់ៗកើតផ្តាសាយ ឬឈឺបំពង់ក ម្នាស់មួយដុំអាចនឹងធ្វើឲ្យម៉ាក់ៗមានអារម្មណ៍ប្រសើរឡើងវិញ។
ពង្រឹងឆ្អឹងឲ្យរឹងមាំ៖ ម្នាស់មានផ្ទុកជាតិ ម៉ង់កាណែស យ៉ាងច្រើន ជាសារធាតុដើរតួនាទីសំខាន់ក្នុងការអភិវឌ្ឍឆ្អឹង និងជាលិកាសន្ធាន។
បង្ការករណីទល់លាមក៖ ម្នាស់មានជាតិកាកសរសៃច្រើន ជួយបង្ការការទល់លាមកក្នុងអំឡុងពេលមានផ្ទៃពោះ។ លើសពីនេះ អង់ហ្ស៊ីម Bromelain ពង្រឹងបង្កើនដំណើរការរំលាយអាហារឲ្យខ្លាំងក្លា។
កាត់បន្ថយអាការៈចាញ់កូន៖ ក្នុងករណីខ្លះ ញ៉ាំម្នាស់អាចជួយកាត់បន្ថយរោគសញ្ញាចាញ់កូនបាន។
២- ស្រីៗមានផ្ទៃពោះគួរញ៉ាំម្នាស់ដែរអត់?
តាមជំនឿមិនពិតតៗគ្នាថា ញ៉ាំម្នាស់នឹងបណ្តាលឲ្យរលូតកូន។ ការភាន់ច្រឡំនេះ គឺដោយសារវត្តមានអង់ហ្ស៊ីម Bromelain ក្នុងផ្លែម្នាស់។ ពួកគេអះអាងថា អង់ហ្ស៊ីម Bromelain បំបែកជាតិប្រូតេអ៊ីន ហើយកូនទើបតែបង្កកំណើតថ្មីៗក្នុងផ្ទៃពោះ គឺផ្សំបង្កើតឡើងដោយជាតិប្រូតេអ៊ីន អ៊ីចឹងការញ៉ាំអង់ហ្ស៊ីម Bromelain អាចបណ្តាលឲ្យមានការហូរឈាម និងរលូតអូនៗបាន។ ជាក់ស្តែង គ្មានភស្តុតាងគាំទ្រការអះអាងនេះឡើយ។ ផ្ទុយទៅវិញ ម៉ាក់ៗញ៉ាំម្នាស់ក្នុងបរិមាណសមរម្យ គឺមានសុវត្ថិភាព។
កត្តាគួរប្រុងប្រយ័ត្នពេលញ៉ាំម្នាស់
ញ៉ាំម្នាស់ស្រស់២ ផ្លែ/សប្តាហ៍ អំឡុងដំណាក់កាលនៃការពពោះ មានសុវត្ថិភាព។ បើគ្នាយើងនៅតែបារម្ភពីការញ៉ាំផ្លែម្នាស់ស្រស់ អាចជ្រើសរើសយកផ្លែម្នាស់កំប៉ុង ឬទឹកផ្លែម្នាស់ជំនួសក៏បាន ព្រោះដំណើរការច្រកដាក់កំប៉ុង បានដកយកចេញស្ទើរទាំងស្រុងនូវអង់ហ្ស៊ីម bromelain នៅក្នុងផ្លែម្នាស់។
ដូចអាហារដទៃទៀតដែរ ញ៉ាំផ្លែម្នាស់ច្រើនពេកនឹងធ្វើឲ្យមានផលអាក្រក់ ជាងល្អ ព្រោះវីតាមីន C ច្រើនពេកនឹងបណ្តាលឲ្យរាករូស ចង្អោរ និងឆ្អល់ចុងដង្ហើម។ ជាពិសេស ម៉ាក់ៗត្រូវគេណែនាំមិនឲ្យញ៉ាំ ឬផឹកទឹកម្នាស់ខ្ចីឡើយ ព្រោះវាអាចបណ្តាលឲ្យពុល។
យ៉ាងណាក៏ដោយ អង់ហ្ស៊ីម Bromelain ក្នុងផ្លែម្នាស់មិនគ្រប់គ្រាន់នឹងបណ្តាលឲ្យមានការកន្ត្រាក់ស្បូននោះទេ។ ញ៉ាំច្រើនពេកអាចបណ្តាលឲ្យឈឺអណ្តាត ឬកន្ទួលរោល ដោយសារអាលែកហ្ស៊ី និងពិបាកដកដង្ហើម។
បើគ្នាយើងធាត់លើសទម្ងន់ គួរចៀសវាងញ៉ាំម្នាស់ ដោយសារតែកាឡូរីខ្ពស់ផ្ទុកនៅខាងក្នុង។ អ្នកមានជំងឺទឹកនោមផ្អែម ម្នាស់អាចមិនមែនជាអាហារល្អបំផុតសម្រាប់យើងទេ ព្រោះកម្រិតជាតិស្ករខ្ពស់នឹងធ្វើឲ្យស្ថានភាពកាន់តែធ្ងន់ធ្ងរឡើង។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
Hello Health Group និង “Hello គ្រូពេទ្យ” មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
ផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្ម