ពេលពពោះ ម៉ាក់ៗ ទទួលបានការយកចិត្តទុកដាក់ និងថែទាំជាពិសេសពីប៉ាៗ ក៏ដូចជាក្រុមគ្រួសារ ទាំងពេលសម្រាក ញ៉ាំអាហារ ហាត់ប្រាណ និងទៅពេទ្យ។ ពេលពពោះនេះ ម៉ាក់ៗ ក៏ដូចក្រុមគ្រួសារ ចាំបាច់ប្រយ័ត្ននឹងជំងឺបេះដូង ព្រោះជាជំងឺបង្កឲ្យស្រីពពោះ ស្លាប់ច្រើនជាងគេ។
អង្គការ American College of Obstetricians and Gynecologists របស់អាមេរិក បញ្ជាក់ថា ជំងឺបេះដូង រួមចំណែក ២៦,៥% បង្កឲ្យស្រីពពោះស្លាប់ ដោយនេះជាអត្រាខ្ពស់បំផុត ក្នុងចំណោមស្រីស្បែកខ្មៅ និងមានចំណូលទាប។ លោកស្រីវេជ្ជបណ្ឌិត Lisa Hollier ប្រធានអង្គការនេះ បញ្ជាក់ថា ជំងឺភាគច្រើន អាចបង្ការបាន ប៉ុន្ដែខ្វះការតាមដាន និងកំណត់រោគសញ្ញា ពេលពពោះ និងក្រោយសម្រាល។
ពេលពពោះប្រព័ន្ធសរសៃឈាមបេះដូង មានបម្រែប្រមួលធំៗ ដើម្បីរក្សាការកើនឡើងបរិមាណឈាម អ៊ីចឹងហើយ វាចាំបាច់ណាស់ ដើម្បីកំណត់កត្ដាបង្កគ្រោះថ្នាក់ជាមុន។ ស្ត្រីពពោះ ហើយដឹងថា មានជំងឺបេះដូង គួរជួបជាមួយពេទ្យបេះដូង មុនប្រឹក្សាពីបញ្ហាពពោះ។ អ្នកប្រឈមជំងឺនេះពីកម្រិតមធ្យម-ខ្លាំង គួរតាមដាន និងពិនិត្យឲ្យបានម៉ត់ចត់ ពេលពពោះ សម្រាល និងក្រោយសម្រាល។
