ដេកត្រាំទឹកក្តៅ ជាវិធីសាស្ត្ររំសាយអារម្មណ៍ ធ្វើឲ្យមានផាកសុភាព ទាំងផ្លូវកាយ និងផ្លូវចិត្ត និងពេញនិយមបំផុត ពិសេសស្រីៗអំឡុងពេលងូតទឹកម្តងៗ។ គ្នាយើងខ្លះ ចំណាយពេលរាប់សិបនាទី ដើម្បីត្រាំទឹកក្តៅ ហើយមានអារម្មណ៍ថា ពិតជាស្រួលខ្លួនណាស់ មិនអ៊ីចឹង? ប៉ុន្តែបើកំពុងពពោះ ហើយបន្តដេកត្រាំទឹកក្តៅឧណ្ហៗដូចសព្វដង ប៉ះពាល់គភ៌ក្នុងផ្ទៃអត់? សំណួរនេះ “Hello គ្រូពេទ្យ” ទទួលបានច្រើនណាស់ ទើបសម្រេចចិត្តបកស្រាយក្នុងអត្ថបទនេះ ឲ្យគ្នាយើងដឹង អាចចេះប្រុងប្រយ័ត្នទាំងអស់គ្នា។
ងូត ឬដេកត្រាំទឹកក្តៅពេលពពោះ ប៉ះពាល់កូនក្នុងផ្ទៃ?
ត្រួតពិនិត្យដោយ វេជ្ជ. ចាន់ ស៊ីណេត · មន្ទីរពេទ្យបង្អែកមិត្តភាពកម្ពុជា-ចិន សែនសុខ
១- ងូត ឬ ត្រាំទឹកក្តៅពេលពពោះប៉ះពាល់ដែរអត់?
យោងតាមមហាវិទ្យាល័យផ្នែកសម្ភព និងរោគស្រ្តីអាមេរិក (ACOG) ការកើនឡើងសីតុណ្ហភាព ត្រឹម ១,៨ អង្សារសេ ឬសីតុណ្ហភាពខ្ពស់ជាងក្នុងខ្លួនម៉ាក់ៗ អំឡុងត្រីមាសទី១ នៃការពពោះ អាចធ្វើឲ្យគភ៌ក្នុងផ្ទៃប្រឈមបញ្ហាខូចរូបរាងពីកំណើត។ លើសពីនេះ កូនយើងអាចមានជំងឺលានខួរឆ្អឹងខ្នង (Spina bifida)។ អំណះអំណាងនេះ ក៏ត្រូវគេទទួលស្គាល់ និងយល់ស្រប ក្នុងការសិក្សាជាច្រើនផ្សេងទៀត។
សីតុណ្ហភាពទឹកក្តៅពេក ជាកត្តាចម្បងធ្វើឲ្យសម្ពាធឈាមធ្លាក់ចុះ ក៏អាចធ្វើឲ្យលំហូរឈាមទៅកាន់កូនថយចុះដូចគ្នា។ ហេតុនេះហើយ គេចាត់ទុកការដេកត្រាំទឹកក្តៅ ឬងូត គ្មានសុវត្ថិភាព មិនថាក្នុងដំណាក់កាលណាក៏ដោយ អំឡុងពពោះ។ ក្រៅពីនេះ ត្រាំ ឬងូតទឹកក្តៅពេក អាចធ្វើយើងឈឺក្បាលទៀតផង។ នៅស្រីៗគ្នាយើង ងើបចេញពីទឹកក្តៅ អាចធ្វើសីតុណ្ហភាពរាងកាយប្រែប្រួលយ៉ាងខ្លាំង បណ្តាលឲ្យវិលមុខ និងដួលបាន ហើយបើដួលអំឡុងពេលពពោះ គឺគ្រោះថ្នាក់ខ្លាំង ពិសេសនាំឲ្យរលូតកូនតែម្តង។
អ្នកជំនាញបានណែនាំឲ្យចៀសវាងត្រាំទឹកពពុះសាប៊ូ ឬប្រើពពួកអំបិលសម្រាប់មុជទឹក ឬក៏ប្រេងផ្សេងៗ ដោយសារសារធាតុគីមីផ្សំក្នុងផលិតផលទាំងនេះ អាចធ្វើកើតរោគផ្សិតលើរាងកាយ។ ជំនួសមកវិញ ទៀនក្រអូប អាចប្រើជំនួសវិធីខាងលើបាន និងមានសុវត្ថិភាពទៀតផង។
២- គួរការពារផលប៉ះពាល់ពីការត្រាំទឹកក្តៅដោយវិធីណា?
បើសិនគ្នាយើងមានទម្លាប់ចូលចិត្តត្រាំទឹកក្តៅ ឬងូតទឹកក្តៅ ត្រូវតែចងចាំគន្លឹះទាំងនេះ៖
– ពិនិត្យ ឬស្ទាបមើលកម្តៅទឹកសិន មុននឹងចុះត្រាំ ឬងូត។ បើក្តៅពេក ចាំ ២-៣ នាទីសិន ដើម្បីឲ្យទឹកត្រជាក់បន្តិច។
– កុំត្រាំឲ្យលិចខ្លួន ដោយត្រាំត្រឹមក្រោមដើមទ្រូងបានហើយ។
– ត្រូវងើបចេញដោយប្រុងប្រយ័ត្ន បើសិនមានអារម្មណ៍ថាវិលមុខ ចង់ក្អួត ជាសញ្ញាបញ្ជាក់ថាសម្ពាធឈាមយើងចុះខ្លាំង។
– កុំត្រាំទឹកលើសពី ១០នាទី ដើម្បីការពារការឡើងកម្តៅរាងកាយ។
– កុំត្រាំទឹកក្តៅ បើមិនស្រួលខ្លួនទេនេះ ពិសេសបើមានក្តៅខ្លួន ឬហូរឈាមតាមទ្វារមាស។
អត្ថបទពាក់ព័ន្ធ៖
- ស្រីៗញ៉ាំទុរេនពេលពពោះ អាចមានបញ្ហាអត់?
- ងូតទឹកក្ដៅ ត្រាំទឹកក្ដៅ ឬស្ទីមយូរ អាចងាប់មេជីវិត?
៣- ងូតទឹកក្តៅមានសុវត្ថិភាពដែរអត់?
ងូតទឹកក្តៅ ក៏ដូចគ្ត្រាំទឹកក្តៅដែរ វាមានសុវត្ថិភាពល្អណាស់ បើគ្នាយើងកំពុងពពោះ ដឹងពីចំណុចសំខាន់ និងការប្រុងប្រយ័ត្ន។ មួយទៀត ទោះបីមិនស្រួលខ្លួន ដូចត្រាំទឹកក្តៅ ប៉ុន្តែងូតទឹកក្តៅ អាចមានសុវត្ថិភាពជាង ដោយសារកម្តៅខ្លួនយើងកើនឡើងតែមួយរយៈពេលខ្លីប៉ុណ្ណោះ។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយគ្រូពេទ្យជំនាញ។Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
បដិសេធ
Hello Health Group និង “Hello គ្រូពេទ្យ” មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
ផ្សព្វផ្សាយពាណិជ្ជកម្មតើអត្ថបទនេះមានប្រយោជន៍ដែរទេ?
ផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្ម