ស្រ្តីពពោះជាច្រើនតែងមានអាការៈក្តៅ ឬក្រហាយទ្រូង ហើយច្រើនសំដៅលើការច្រាលអាស៊ីដក្រពះ ឬអាហារមិនរំលាយល្អ។ អាការៈនេះមិនមានគ្រោះថ្នាក់ឡើយតែវារំខាន។ សំណាងល្អដែរ យើងអាចបំបាត់អាការៈនេះបាន ដោយការប្រើថ្នាំបានយ៉ាងងាយ និងមានសុវត្ថិភាពទៀតផង។
ស្រីៗពពោះ ប្រើថ្នាំបន្សាបអាស៊ីដក្រពះមានសុវត្ថិភាពអត់?
ទោះយ៉ាងណា ស្រីៗយើងក៏ត្រូវផ្លាស់ប្តូរទម្លាប់នៃការញ៉ាំអាហារ និងការរស់នៅមួយចំនួនផងដែរ។ សម្រាប់អ្នកដែលត្រូវការថ្នាំសម្រាប់អាការៈនេះ ថ្នាំមួយចំនួនមានសុវត្ថិភាពល្អបំផុតសម្រាប់ស្រ្តីពពោះយើង។ ថ្នាំបន្សាបអាស៊ីដក្រពះភាគច្រើនមានសុវត្ថិភាពសម្រាប់ស្រ្តីពពោះ តែក៏មានថ្នាំខ្លះអាចបណ្តាលឲ្យមានគ្រោះថ្នាក់ផងដែរ។ ដូចនេះមុនប្រើ គួរពិគ្រោះជាមួយគ្រូពេទ្យ ឬឱសថការី ឲ្យបានច្បាស់ជាមុនសិន។
១- ថ្នាំបន្សាបអាស៊ីដក្រពះជាអ្វី?
ជម្រើសដំបូងសម្រាប់ស្រីៗកំពុងពពោះនោះគឺ ថ្នាំបន្សាបអាស៊ីដក្រពះគ្រាប់ទំពារ ដែលផ្សំឡើងពីកាល់ស្យ៉ូមកាបូណាត។ ថ្នាំនេះមានសកម្មភាពលឿន ងាយយកតាមខ្លួន និងមានប្រសិទ្ធភាព ហើយក៏ជាអ្វីដែលយើងត្រូវការដែរ។ ថ្នាំប្រភេទនេះមួយចំនួនមានរសជាតិឆ្ញាញ់ទៀតផង។ ពពួកថ្នាំបន្សាបអាស៊ីដក្រពះ ម៉ាញ៉េស្យ៉ូមអ៊ីដ្រុកស៊ីត ឬម៉ាញ៉េស្យ៉ូមអុកស៊ីត ក៏ជាជម្រើសល្អសម្រាប់ស្រ្តីពពោះដូចគ្នា។ ថ្នាំនេះមានទម្រង់ទាំងជាគ្រាប់ និងទឹក។
យ៉ាងណាស្រីៗយើងត្រូវចាំថា ទោះបីជាញ៉ាំថ្នាំទឹកក៏ដោយ ក៏ក្រពះយើងនៅតែបញ្ចេញទឹកក្រពះដដែលដែរ។ ដូចនេះមិនគួរញ៉ាំទឹក តាមក្រោយច្រើននោះទេ ព្រោះវាអាចធ្វើឲ្យច្រាលទឹកក្រពះមកវិញទៀតបាន។
ថ្នាំបន្សាបអាស៊ីដក្រពះទាំងនេះនឹងបន្សាបអាស៊ីដដែលមានស្រាប់ក្នុងក្រពះ។ ថ្នាំគ្រាប់ទំពារ និងថ្នាំទឹកធ្វើការបានរហ័សជាងថ្នាំគ្រាប់លេប ដោយសារវាត្រូវបានបំបែក និងងាយរលាយជាង។
២- ពេលញ៉ាំថ្នាំបន្សាបអាស៊ីដក្រពះត្រូវដឹងអ្វីខ្លះ?
ស្ត្រីមានផ្ទៃពោះ គួរចៀសវាងប្រើថ្នាំដែលមានសារធាតុផ្សំ អាលុយមីញ៉ូម (អាលុយមីញ៉ូមអ៊ីដ្រុកស៊ីត ឬអាលុយមីញ៉ូមកាបូណាត) ព្រោះថា អាលុយមីញ៉ូមអាចធ្វើឲ្យទល់លាមក និងពុល បើសិនជាប្រើក្នុងកម្រិតច្រើន ប៉ុន្តែថ្នាំនេះនៅតែអាចប្រើបានដោយមានសុវត្ថិភាព បើប្រើតាមកម្រិតថ្នាំដែលគ្រូពេទ្យបានណែនាំ និងមិនញឹកញាប់។ ថ្នាំនេះក៏ត្រូវបានចាត់ទុកជាថ្នាំល្អបំផុតសម្រាប់ស្រ្តីមានផ្ទៃពោះដែរ។
យើងត្រូវចាំថា ទោះបីជាថ្នាំនេះជាគ្រាប់ទំពារមានរសជាតិឆ្ញាញ់ វានៅតែជាថ្នាំដដែល។ បើសិនជាយើងចាប់អារម្មណ៍ ឬសង្កេតឃើញថាខ្លួនឯងញ៉ាំថ្នាំនេះច្រើនទៅៗ សូមពិគ្រោះជាមួយគ្រូពេទ្យដើម្បីរកថ្នាំបន្សាបអាស៊ីដណាដែលមានប្រសិទ្ធភាពខ្លាំងជាងនិងយូរជាងនេះ។ យើងអាចសួរពី “ថ្នាំបន្ថយអាស៊ីដក្រពះ” ដែលខុសពីថ្នាំបន្សាបអាស៊ីដក្រពះ ព្រោះថ្នាំបន្ថយអាស៊ីដក្រពះ មាននាទីទៅបន្ថយការផលិតអាស៊ីដក្រពះផ្ទាល់តែម្តង។
៣- ថ្នាំបន្ថយអាស៊ីដក្រពះជាអ្វី?
ថ្នាំបន្ថយអាស៊ីដក្រពះ គឺថ្នាំដែលប្រើដើម្បីកាត់បន្ថយអាស៊ីដក្រពះដែលមានស្រាប់ក្នុងក្រពះ ដូចនេះវាមានប្រសិទ្ធភាពខ្ពស់បំផុតនៅពេលប្រើមុនញ៉ាំអាហារ យ៉ាងហោច៣០នាទីមុនអាហារ។ ថ្នាំបន្ថយអាស៊ីដក្រពះខ្លះ មានលាយចូលគ្នាស្រាប់ទាំងបន្ថយ (ដូចជា famotidine)និងបន្សាប (ដូចជា កាល់ស្យ៉ូមកាបូណាត ឬម៉ាញ៉េស្យ៉ូមអ៊ីដ្រុកស៊ីត)។ ថ្នាំនេះអាចបន្ថយអាការៈមិនស្រួលក្នុងពោះបានភ្លាមៗតែម្តង និងបន្ថយការផលិតអាស៊ីដក្រពះបានរហូតដល់ ១២ម៉ោងទៀតផង។
ស្រីៗយើងអាចរកទិញថ្នាំបន្ថយអាស៊ីដក្រពះនេះបានយ៉ាងងាយស្រួល តែក៏មានថ្នាំខ្លះត្រូវការវេជ្ជបញ្ជាផងដែរ។ ថ្នាំទាំងអស់នេះគឺសុទ្ធតែត្រូវបានគេជឿថាមានសុវត្ថិភាពសម្រាប់ស្រ្តីពពោះ ទោះបីក្នុងត្រីមាសទីមួយក៏ដោយ។ តែយ៉ាងណាក៏ដោយ សូមទៅពិគ្រោះជាមួយគ្រូពេទ្យ ឬឱសថការីអំពីកត្តាប្រឈមនានា និងគុណសម្បត្តិរបស់ថ្នាំទាំងនេះ។
Hello Health Group និង “Hello គ្រូពេទ្យ” មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
ផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្ម