ពេលពពោះ បើស្រីៗផឹកកាហ្វេតិចតួច ប៉ះពាល់កូនក្នុងផ្ទៃដែរអត់?

កាហ្វេក្លាយជាភេសជ្ជៈពេញនិយមបំផុតនាពេលបច្ចុប្បន្ន មិនថា ក្មេង ឬចាស់ ស្រី ឬប្រុសនោះទេ មួយថ្ងៃៗសឹងតែអត់កាហ្វេមិនបាន។ ដោយហេតុថា កាហ្វេផ្ទុកសារធាតុញៀន កាហ្វេអ៊ីន ចុះបើស្ត្រីមានផ្ទៃពោះ ញ៉ាំទៅអាចប៉ះពាល់ដល់កូនក្នុងផ្ទៃទេ?

បើតាមអង្គការសុខភាពពិភពលោក (WHO) កាហ្វេជាភេសជ្ជៈដែលមានជាតិកាហ្វេអ៊ីនច្រើនជាងគេក្នុងចំណោមភេសជ្ជៈផ្សេងទៀត ដូចជា តែ សូកូឡា ភេសជ្ជៈផ្អែម និងភេសជ្ជៈប៉ូវកម្លាំង។ ដូច្នេះហើយការញ៉ាំកាហ្វេមិនល្អចំពោះស្ត្រីមានផ្ទៃពោះឡើយ កាត់បន្ថយកាន់តែតិច ឬមិនញ៉ាំសោះកាន់តែល្អ។

១- មានអ្វីកើតឡើង បើស្រីៗផឹកកាហ្វេច្រើនពេលពពោះ?

ផឹកកាហ្វេច្រើនលើសកម្រិតនៅអំឡុងពេលពពោះ អាចនាំឲ្យរលូតកូន កូនមិនលូតលាស់ កូនកើតមិនគ្រប់គីឡូ ឬកូនកើតមុនខែ។ ប៉ុន្តែសម្រាប់ស្រីៗចូលចិត្តផឹកកាហ្វេ ពពោះ ហើយអត់មិនបាន គ្រាន់តែផឹកក្នុងកម្រិតត្រឹមត្រូវ តិចជាង ២០០ មិល្លីក្រាម/ថ្ងៃ ឬផឹកយូរៗម្តង ហានិភ័យទាំងនេះស្ថិតក្នុងកម្រិតទាប។

២- ជាតិកាហ្វេអ៊ីនប៉ះពាល់ទារកក្នុងផ្ទៃយ៉ាងម៉េចខ្លះ?

ពេលយើងផឹកកាហ្វេមួយពែង ជាតិកាហ្វេអ៊ីន អាចឆ្លងកាត់ស្បូនទៅក្នុងទឹកភ្លោះ ហើយចូលទៅក្នុងប្រព័ន្ធចរន្តឈាមទារក។ ដូចនេះ ដោយសារជាតិកាហ្វេអ៊ីន ធ្វើឲ្យកើនចង្វាក់បេះដូង និងបង្កើនការធ្វើមេតាបូលីស នាំឲ្យយើងមានអារម្មណ៍ភ្ញាក់ អាចធ្វើឲ្យកូនក្នុងផ្ទៃរងឥទ្ធិពលនេះដូចគ្នា។ មានន័យថា ទារកអាចនឹងប្រែប្រួលបន្ទាប់ពីម៉ាក់ៗផឹកកាហ្វេរួច ខណៈជាតិកាហ្វេអ៊ីនច្រើន នឹងផ្ដល់ផលមិនល្អដល់ទារក។

មានរបាយការណ៍ខ្លះបង្ហាញថា ទារកក្នុងផ្ទៃម៉ាក់ៗញ៉ាំជាតិកាហ្វេអ៊ីនច្រើនជាង ៥០០ មិល្លីក្រាម/ថ្ងៃ អំឡុងពេលពពោះ អាចប្រឈមគ្រោះថ្នាក់ច្រើន ជាងទារកដទៃទៀតដូចជា៖

– ចង្វាក់បេះដូងដើរញាប់

– ចង្វាក់ដង្ហើមកើនឡើងខ្លាំង

– ភ្ញាក់ច្រើនម៉ោង

ទោះយ៉ាងនេះក្ដីការញ៉ាំ កាហ្វេ ឬតែ ១-២ កញ្ចប់/ថ្ងៃ មិនបង្កគ្រោះថ្នាក់អ្វីឡើយ។

៤- គួរញ៉ាំកាហ្វេប៉ុនណាទើបល្អ?

កាហ្វេ តែ រួមទាំងតែបៃតង ភេសជ្ជៈកូឡា (ទឹកក្រូចមានជាតិកាហ្វេអ៊ីន) និងភេសជ្ជៈប៉ូវកម្លាំងខ្លះ សុទ្ធតែមានជាតិកាហ្វេអ៊ីន។ បើយើងទិញកាហ្វេពីខាងក្រៅ ត្រូវចាំថា ជាតិកាហ្វេអ៊ីន រវាងកាហ្វេអេសប្រេសសូ (Espresso) និងកាហ្វេមានប្រភពពីអេសប្រេសសូ ដូចជា កាហ្វេឡាតេ (Latte) អាចមានកម្រិតកាហ្វេអ៊ីនខុសគ្នាខ្លាំង។ ជាតិកាហ្វេអ៊ីនក្នុងអេសប្រេសសូមួយពែង អាចផ្លាស់ប្ដូរពីកម្រិត ៥០-៣០០ មិល្លីក្រាម។ ត្រឹមកាហ្វេកាពូឈីណូ (Cappuccino) កម្រិតខ្លាំងមួយកែវធំ អាចធ្វើឲ្យញ៉ាំលើសកម្រិតកាហ្វេអ៊ីនប្រចាំថ្ងៃទៅហើយ។

គួរផឹកទឹកដោះគោ ទឹកផ្លែឈើ និងទឹកឲ្យបានគ្រប់គ្រាន់ ព្រោះសុទ្ធតែជាភេសជ្ជៈសុខភាព អាចជំនួសឲ្យភេសជ្ជៈកាហ្វេអ៊ីនបាន ពិសេសអំឡុងស្រីៗកំពុងពពោះ។ បើយើងចូលចិត្តតែ ថ្នាំបុរាណ ត្រូវចាំថា ក្នុងតែទាំងនោះ អាចមានជាតិកាហ្វេអ៊ីនដូចគ្នា ហើយតែថ្នាំបុរាណ អាចបញ្ចូលទាំងថ្នាំរុក្ខជាតិបុរាណ និងសារធាតុបន្ថែម ធ្វើឲ្យការពពោះមិនមានសុវត្ថិភាព។

អត្ថបទពាក់ព័ន្ធ៖ 

• ជួបបញ្ហាធ្ងន់ធ្ងរទាំងនេះ ដោយសារតែស្ត្រីពពោះផឹកថ្នាំបុរាណ
• ហេតុផលសំខាន់ៗ ស្រីៗគួរញ៉ាំថ្នាំវីតាមីន មុនពេលមានផ្ទៃពោះ

ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបលផ្ទាល់ជាមួយគ្រូពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕