ចូលចិត្តព័ត៌មាន “Hello គ្រូពេទ្យ” សូមចូលរួមស្ទង់មតិនៅទីនេះ។ មតិអ្នកទាំងអស់គ្នា ពិតជាមានតម្លៃសម្រាប់ “Hello គ្រូពេទ្យ” អាចកែលម្អព័ត៌មានឲ្យកាន់តែប្រសើរ!

មានស្ត្រីពពោះមិនតិចទេដែលរាប់ថ្ងៃកំណត់សម្រាលកូនខុស ហើយនោះក៏មកពីភាន់ច្រឡំមួយចំនួន។ បើយោងតាមការបកស្រាយពីខាងមន្ទីរពេទ្យកាលមែ៉តបានឲ្យដឹងថា ថ្ងៃឈឺពោះសម្រាលកូន ជាថ្ងៃដែលឈឺពោះមានចង្វាក់ឈឺបាត់ៗ ក្នុងនោះមានធ្លាក់រម្អិលលាយឈាមផងដែរ ហើយឈឺរហូតដល់កូនកើតចេញពីផ្ទៃ។

ការសម្រាលកូនគ្រប់ខែ គឺសម្រាលកូនក្នុងចន្លោះពេលដែលកូនមានអាយុ ៣៧ សប្ដាហ៍ពេញ នៃការបាត់រដូវ និង ៤១ សប្ដាហ៍ ៣ ថ្ងៃ។ ចំណែកសម្រាលកូនមិនគ្រប់ខែវិញ៖

ក្រោម ៦ ខែ = រលូត
ពី ៦ ខែទៅ ៨ ខែកន្លះ = សម្រាលមុនខែ
កូនលើសខែ = គឺពី ៤១ សប្ដាហ៍នៃការបាត់រដូវឡើងទៅ

ចំពោះថ្ងៃទី១ នៃរដូវចុងក្រោយ គឺជាថ្ងៃទី១ ដែលឈាមរដូវធ្លាក់ មិនមែនជាថ្ងៃអស់ឈាមរដូវទេ ចំណែកខែវិញ គឺជាខែចុងក្រោយគេដែលរដូវមក មិនមែនខែដែលអត់មករដូវទេ។ ចំណែករដូវទៀងទាត់វិញ គឺរដូវដែលមក ២៨ ថ្ងៃម្ដង ឧទាហរណ៍៖

– ខែមុន រដូវមកថ្ងៃទី ៣០

– ខែបន្ទាប់ត្រូវមកថ្ងៃទី ២៨

– ខែបន្ទាប់ទៀតត្រូវមកថ្ងៃទី ២៦

របៀបរាប់ គឺគិតចាប់សប្ដាហ៍នៃការបាត់រដូវ គឺយើងគិតអាយុកូនក្នុងផ្ទៃជាសប្ដាហ៍ ដោយរាប់ពីថ្ងៃទី១ នៃរដូវដែលមកខែចុងក្រោយគេ មិនមែនថ្ងៃអស់រដូវខែចុងក្រោយ។ រីឯថ្ងៃបង្កកំណើតកូនគឺ ១៤ ថ្ងៃបន្ទាប់ពីថ្ងៃទី១ នៃរដូវដែលមកខែចុងក្រោយគេ។

ការកំណត់ថ្ងៃសម្រាលកូនតាមរដូវទៀងទាត់ (២៨ថ្ងៃ) តាមអេកូបីខែដំបូងក្ដី គឺកំណត់យក ៤០ សប្ដាហ៍នៃការបាត់រដូវជាថ្ងៃសម្រាល។ តែកូនអាចសម្រាលមុន ១០ ថ្ងៃ ឬក្រោយ ១០ ថ្ងៃ។ ការកំណត់ថ្ងៃសម្រាលកូនតាមអេកូបីខែដំបូងក្តី និងតាមរដូវដែលទៀងទាត់ក្តី គឺពុំមានខុសគ្នាឡើយ ឬ ខុសគ្នាយ៉ាងច្រើន ៣-៤ ថ្ងៃប៉ុណ្ណោះ។ ដូច្នេះបើស្ត្រីណាមិនចាំរដូវ ប្អូនត្រូវយកថ្ងៃសម្រាលកូនតាមអេកូ ៣ខែដំបូង។

សម្រាលកូន

បើដល់ថ្ងៃសម្រាលហើយ គឺ ៤០ សប្ដាហ៍ពុំទាន់ឈឺពោះសម្រាលស្ត្រីត្រូវមើលអេកូម្ដងទៀត បើទឹកភ្លោះនៅគ្រប់គ្រាន់ សុខភាពកូននៅល្អ អាចទុកតាមដានបាន ១០ ថ្ងៃទៀត តែត្រូវមកតាមដានផ្ទៃពោះរាល់ ២ ឬ៣ ថ្ងៃម្តង រហូតដល់ថ្ងៃឈឺពោះសម្រាលកូន។ រយៈពេល ១០ថ្ងៃហ្នឹង មិនទាន់ឈឺពោះសម្រាលទៀត ម៉ាក់ៗចាំបាច់ត្រូវសម្រាកពេទ្យ ដើម្បីដាក់ថ្នាំឲ្យឈឺពោះសម្រាល ទៅតាមបច្ចេកទេសវេជ្ជបណ្ឌិតផ្នែកសម្ភព។

កូនដែលនៅក្នុងផ្ទៃនេះយើងអាចទុកបានត្រឹមតែ ៤១ សប្តាហ៍ ៣ ថ្ងៃប៉ុណ្ណោះ លើសពីថ្ងៃនេះទារកនៅក្នុងផ្ទៃនឹងទ្រោមបន្តិចម្ដងៗរហូតស្លាប់នៅក្នុងពោះ។

លម្អិតពីរបៀបរាប់ថ្ងៃសម្រាលកូនឲ្យបានត្រឹមត្រូវ តាំងពីថ្ងៃបាត់រដូវ