កូនក្រៅស្បូន គឺជាការបង្កកំណើតរបស់កូន ដែលស្ថិតនៅខាងក្រៅប្រហោងស្បូន ហើយកូនក្រៅស្បូននេះដែរ ភាគច្រើននៅក្នុងបំពង់ដៃស្បូន ដែលបង្កលក្ខណៈមិនអាចមានផ្ទៃពោះដូចមនុស្សធម្មតា។ នេះបើតាមការឲ្យដឹងពីលោកវេជ្ជបណ្ឌិត សូ សំណាង ឯកទេសទូទៅ បម្រើការងារនៅគ្លីនិក មង្គលទួលសង្កែ។

លោកបន្តថា វាមិនត្រឹមតែនៅក្នុងបំពង់ដៃស្បូនប៉ុណ្ណោះទេ ពេលខ្លះក៏អាចកើតនៅក្នុងក្រពេញអូវែ មាត់ស្បូន ឬក្នុងពោះជាដើម ហើយមានកត្តាជាច្រើនដែលនាំឲ្យស្ត្រីជួបបញ្ហាកូនក្រៅស្បូននេះ ហើយក្នុងនោះមានដូចជា៖

– ជក់បារី

– រលាកដៃស្បូន

– មានប្រវត្តិកូនក្រៅស្បូន

– ធ្លាប់ឆ្លងមេរោគនៅអាងត្រគៀកពីមុន

– មានជំងឺ Endometriosis

– ធ្លាប់វះកាត់ដៃស្បូនពីមុន

– ធ្លាប់វះកាត់ពោះពីមុន

– ការប្រើប្រាស់ឧបករណ៍ពន្យារកំណើត ធ្វើនៅក្នុងស្បូន (IUCD ឬ IUD)

កូនក្រៅស្បូន

ចំពោះរោគសញ្ញាទូទៅវិញវេជ្ជបណ្ឌិតរូបនោះ បានឲ្យដឹងថាមិនមានអ្វីច្រើនឡើយ គឺបាត់រដូវ ឈឺពោះ និងមានហូរឈាមតាមទ្វារមាសពណ៌ក្រម៉ៅ ដែលនេះជារោគសញ្ញាទូទៅពេលកូនក្រៅស្បូនមិនទាន់ធ្លាយ។ ប៉ុន្តែពេលខ្លះរោគសញ្ញាទាំងនោះ មិនទាន់ប្រាកដ ១០០% ដែរ ទាល់តែតាមដានជាមួយគ្រូពេទ្យជំនាញសិន ទើបអាចវិនិច្ឆ័យតាមបានច្បាស់។

ដើម្បីឲ្យដឹងច្បាស់ថាមានកូនក្រៅស្បូនឬអត់ គ្រូពេទ្យនឹងពិនិត្យទៅលើ៖

– ឧបករណ៍មើលក្នុងស្បូន (Coeliosopie)

– ពិនិត្យអត្រាអ័រម៉ូន

-ពិនិត្យអេកូពោះ និងអេកូក្នុងទ្វារមាស

-ពិនិត្យឈាម-ទឹកនោម។

រីឯវិធីព្យាបាលវិញ គឺមើលតាមស្ថានភាពកូននោះ បើមិនទាន់ធ្លាយអាចចោះយកតាមដៃស្បូន ហើយបើធ្លាយគឺប្រើវិធីវះកាត់។

អត្ថបទពាក់ព័ន្ធ៖

ធ្វើយ៉ាងម៉េច ទើបដឹងថាមានកូនក្រៅស្បូន?