សម្រាលធម្មតា និងក្នុងទឹក ខុសគ្នាម៉េចខ្លះ? វិធីមួយណាល្អជាង?

    សម្រាលធម្មតា និងក្នុងទឹក ខុសគ្នាម៉េចខ្លះ? វិធីមួយណាល្អជាង?

    ម៉ាក់ៗ​ពពោះ​មួយ​ចំនួន​ច្បាស់​ជា​ធ្លាប់​ដឹង​ហើយ ពី​មធ្យោបាយ​សម្រាល​កូន​នៅ​ក្នុង​ទឹក​ដែល​ភាគ​ច្រើន​ឃើញស្រ្តី​ពពោះ​នៅ​បរទេស​មួយ​ចំនួននិយម​សម្រាល​តាម​វិធី​នេះ។ តើ​ការ​សម្រាល​កូន​ក្នុង​ទឹក ខុស​គ្នា​ពី​ការ​សម្រាល​កូន​ធម្មតា​យ៉ាង​ម៉េចខ្លះ?

    ដើម្បី​ដោះ​ស្រាយ​ចម្ងល់​មួយ​នេះ លោក​វេជ្ជបណ្ឌិត ចាន់ ស៊ីណេត ប្រធាន​ផ្នែក​សម្ភព និង​រោគ​ស្ត្រី ​នៃ​មន្ទីរពេទ្យ​មិត្តភាព​កម្ពុជា-ចិន​ សែន​សុខ បាន​ពន្យល់​ឲ្យ​ដឹង​ថា តាម​ពិត​ទៅ ការ​សម្រាល​ធម្មតា និង​សម្រាល​កូន​នៅ​ក្នុង​ទឹក មិន​មាន​អី​ខុស​គ្នា​នោះ​ទេ តែ​គ្រាន់​ការ​សម្រាល​នៅ​ក្នុង​ទឹក​អាច​លឿន​ជាង និង​មាន​មតិ​លើក​ឡើង​តៗ​គ្នា​ថា ការ​សម្រាល​នៅ​ក្នុង​ទឹក​បែប​នេះ​មិន​សូវ​មាន​ការ​ឈឺ​ចាប់​តែ​ប៉ុណ្ណោះ។

    “ការ​សម្រាល​កូន​តែង​តែ​មាន​ការ​ឈឺ​ចាប់ ក៏​ព្រោះ​តែ​ការ​កន្ទ្រាក់​របស់​ស្បូន។ ទោះ​សម្រាល​បែប​ណា​ក៏​នៅ​តែ​មាន​ការ​ឈឺ​ចាប់​ដែរ”។

    ប្រធានផ្នែកសម្ភព និងរោគស្ត្រី​រូបនេះបន្តថា ការ​សម្រាល​កូន​នៅ​ក្នុង​ទឹក​ក៏​មានគុណសម្បត្តិ និងគុណវិបត្តិ​មួយ​ចំនួន​របស់​វា ហើយ​ក៏​មាន​លក្ខខណ្ឌ​ខ្លះ​ដែល​ពេទ្យ​មិន​តម្រូវ​ឲ្យ​ជ្រើស​យក​មធ្យោ​បាយ​សម្រាល​កូន​នេះ​ដែរ​។

    គុណសម្បត្តិនៃការសម្រាលកូនក្នុងទឹក

    – កាត់បន្ថយការឈឺចាប់
    – ម្តាយមានអារម្មណ៍ធូរស្រាល​
    – ម្តាយផ្លាស់ប្តូរចលនាងាយស្រួល
    – កាត់បន្ថយលើសសម្ពាធឈាម ថប់បារម្ភ
    – កាត់បន្ថយការរហែកតំបន់ទ្វារមាស
    – ងាយសម្រាលលឿន។

    គុណវិបត្តិ​នៃ​ការ​សម្រាល​កូនក្នុង​ទឹក

    – អាច​ឆ្លង​មេរោគ​តាម​រយៈ​ទឹក
    – កូន​កើត​មក​ពិបាក​ដកដង្ហើម
    – សីតុណ្ហភាព​កូន​អាច​ក្ដៅ​ខ្លាំង ឬ​ត្រជាក់​ខ្លាំង
    – អាច​ប្រកាច់​ជាដើម។

    លក្ខខណ្ឌមិនគួរសម្រាលកូននៅក្នុងទឹក

    – ម្ដាយ​មាន​អាយុ​តិច​ជាង ១៧ឆ្នាំ និង​លើ​៣៥​ឆ្នាំ
    – ម្ដាយ​មាន​ជំងឺ​បម្រុង​ក្រឡា​ភ្លើង
    – ពពោះ​កូន​ភ្លោះ កូន​បញ្ជ្រាស កូន​មិន​គ្រប់​ខែ ឬ​កូន​ធំ​ពេក។

    យក​ល្អលោកវេជ្ជណ្ឌិតបាន​ណែនាំ​ដល់​ម៉ាក់​ៗ​ពពោះ គួរ​សម្រាល​កូន​តាម​បែប​ធម្មតា​ទៅ ពី​ព្រោះ​នៅ​កម្ពុជា​យើង​មិន​និយម​ការ​សម្រាល​នៅ​ក្នុង​ទឹក​នេះ ហើយ​ក៏​មិន​មាន​ការ​អនុវត្ត​វិធី​នេះញឹក​ញាប់​ដែរ។

    អត្ថបទពាក់ព័ន្ធ៖

    ក្នុង​ករណី​មាន​សំណួរ ឬ​មន្ទិលសង្ស័យ​ជុំវិញ​សុខភាព​អ្នក ជម្រើស​ល្អ​បំផុត សូម​ពិគ្រោះ និង​ប្រឹក្សា​យោបល់​ផ្ទាល់​ជាមួយ​ពេទ្យ​ជំនាញ។ Hello Health Group មិន​ចេញ​វេជ្ជបញ្ជា មិន​ធ្វើ​រោគវិនិច្ឆ័យ ឬ​ព្យាបាល​ជូន​ទេ៕

    Hello Health Group និង “Hello គ្រូពេទ្យ” មិន​ចេញ​វេជ្ជបញ្ជា មិន​ធ្វើ​រោគវិនិច្ឆ័យ ឬ​ព្យាបាល​ជូន​ទេ៕

    រូបថត​របស់​អ្នក​និពន្ធbadge
    ដោយ នាង សុខុមដាលីញ៉ា កែសម្រួល​ចុងក្រោយ 11/06/2020
    ត្រួតពិនិត្យដោយ វេជ្ជ. ចាន់ ស៊ីណេត