សម្រាប់ប្រជាជនយើង ជាពិសេសចាស់ៗចូលចិត្តញ៉ាំតែ ឬកាហ្វេនៅពេលព្រឹក ហើយចំពោះយុវវ័យឥឡូវក៏និយមញ៉ាំកាហ្វេនៅពេលព្រឹក ដើម្បីចាប់ផ្ដើមថ្ងៃថ្មីដែរ។ បើតាមពេទ្យជំនាញ ការដែលញ៉ាំកាហ្វេ ឬតែរាល់ថ្ងៃ អាចមានប្រយោជន៍ជួយដល់សុខភាពរបស់យើងបានដែរ ប៉ុន្តែបើមានដំបៅក្រពះ ត្រូវចៀសឆ្ងាយពីកាហ្វេ។

លោកវេជ្ជបណ្ឌិត អ៊ុង ចក្រាវុធ ឯកទេសជំងឺថ្លើម ក្រពះ ពោះវៀន បានឲ្យដឹងថា ក្នុងករណីដែលយើងមានជំងឺដំបៅក្រពះធ្ងន់ធ្ងរ អ៊ីចឹងពេទ្យតម្រូវឲ្យតមញ៉ាំកាហ្វេហើយ ព្រោះវាអាចបង្កឲ្យមានផលពិបាកដល់អ្នកឈឺ (កាហ្វេអាចធ្វើឲ្យក្រពះចេញទឹកអាស៊ីដច្រើន)។ ប៉ុន្តែ សម្រាប់អ្នកដែលមានបញ្ហាក្រពះស្រាលដូចជា ឈឺក្រពះ ឬរលាកក្រពះ អាចញ៉ាំកាហ្វេបានធម្មតា តែក៏អាចបណ្ដាលឲ្យឆ្អល់ពោះ ពេលខ្លះដែរ។

ប៉ុន្តែ ពពួកតែ ឬកាហ្វេដែលល្អ ហើយសុទ្ធ មានផ្ទុកសារធាតុប្រឆាំងអុកស៊ីតកម្ម ឬ Anti-oxidant ដែលជួយប្រឆាំងដល់ភាពវ័យចាស់ និងការពារជំងឺមហារីក ដូចនេះ វាមិនផ្ដល់ផលប៉ះពាល់ដល់ក្រពះអីទេ។ លោកបន្តថា ប្រសិនបើយើងញ៉ាំកាហ្វេដែលល្អហើយសុទ្ធ អាចជួយការពារថ្លើមបានល្អទៀតផង។

លោកសាស្ត្រាចារ្យបង្រៀននៅសកលវិទ្យាល័យ វិទ្យាសាស្ត្រសុខាភិបាលរូបនេះ បានបញ្ជាក់ដែរថា ចំពោះប្រយោជន៍ដល់សុខភាពយើងដែលទទួលបានពីការញ៉ាំកាហ្វេនេះ គឺសំដៅលើតែ និងកាហ្វេដែលសុទ្ធល្អ មិនមែនតែ ឬកាហ្វេក្លែងក្លាយ (ឧទាហរណ៍ កាហ្វេថ្មពិល…) ទេ។

មាន​ជំងឺ​ក្រពះ​មួយ​នេះ ពេទ្យ​ឲ្យ​តម​ញ៉ាំ​កាហ្វេ​ហើយ

មានជំងឺក្រពះមួយនេះ ពេទ្យឲ្យតមញ៉ាំកាហ្វេហើយ