ចំណីអាហារគ្រប់មុខ មិនថាបន្លែ ផ្លែឈើ ឬត្រីសាច់នោះទេ កាលណាយើងទុកដាក់មិនបានត្រឹមត្រូវ លាងសម្អាតមិនបានដិតដល់ ចម្អិនមិនបានឆ្អិនល្អ ញ៉ាំទៅអាចធ្វើឲ្យរាករូស ឬពុល ដោយសារតែពពួកមេរោគ ឬជាតិគីមីដែលមាននៅក្នុងចំណីអាហារទាំងនោះ។

ខាងក្រោមនេះជាគន្លឹះ ៥ យ៉ាងជួយឲ្យចំណីអាហារមានសុវត្ថិភាព ញ៉ាំទៅមិនឈឺពោះ រាករូស ឬពុល ណែនាំដោយក្រសួងសុខាភិបាល៖

១- ស្អាតជានិច្ច

ត្រូវលាងសម្អាតដៃយើងមុននឹងញ៉ាំអាហារ រៀបចំចំណីអាហារ ឬក្រោយបន្ទោរបង់។ បោស លាងសម្អាត ផ្ទះបាយ និងសម្ភារៈផ្ទះបាយឲ្យស្អាតជានិច្ច ជាពិសេសត្រូវការពារផ្ទះបាយ ចំណីអាហារពីសត្វល្អិតផ្សេងៗ និងសត្វកណ្តុរ។

២- ទុកដាក់អាហារឆ្អិន និងឆៅ ដោយឡែកពីគ្នា

ពពួកសាច់ឆៅគ្រោះថ្នាក់ខ្លាំងណាស់ អ៊ីចឹងហើយយើងត្រូវទុកដាក់អាហារឆ្អិន និងឆៅ ដាច់ដោយឡែកពីគ្នា ពិសេសសាច់ឆៅ មានដូចជា សាច់មាន់ទា គ្រឿងសមុទ្រ ត្រូវដាក់កន្លែងផ្សេងពីគេ មិនត្រូវឲ្យប៉ះជាមួយអាហារឆ្អិនឡើយ។ ចំពោះជ្រញ់ ឬកាំបិតសម្រាប់ហាន់សាច់ក៏ត្រូវមានដោយឡែកដែរ ធ្វើបែបនេះទើបមេរោគមិនអាចឆ្លងទៅចំណីអាហារផ្សេងទៀត។

សុវត្ថិភាពចំណីអាហារ

៣- ចម្អិនអាហារឲ្យបានឆ្អិនល្អ

ញ៉ាំអាហារឆ្អិនទើបមានសុវត្ថិភាព ដូច្នេះយើងត្រូវចម្អិនអាហារឲ្យបានឆ្អិនល្អ ជាពិសេសសាច់សត្វស្លាប ស៊ុត និងគ្រឿងសមុទ្រ។ ចំពោះស៊ុប ឬសម្ល បើយើងទុកយូរ មុននឹងញ៉ាំត្រូវយកទៅកម្តៅឡើងវិញឲ្យពុះ។

អត្ថបទពាក់ព័ន្ធ៖

៤- ទុកដាក់ម្ហូបអាហារក្នុងកម្រិតកម្តៅសុវត្ថិភាព

កុំរក្សាទុកអាហារក្នុងកម្តៅធម្មតាលើសពី ២ ម៉ោង។ បើយើងចង់រក្សាទុកអាហារក្នុងកម្រិតត្រជាក់ គឺត្រូវឲ្យទាបជាង ៥ អង្សារសេ ទើបមានសុវត្ថិភាព តែបើទុកដាក់អាហារក្នុងកម្រិតក្តៅវិញ ត្រូវក្នុងកម្រិតលើសពី ៦០ អង្សារសេ។ យើងមិនត្រូវទុកអាហារនៅក្នុងធុង ឬទូរទឹកកកយូរពេកនោះទេ

៥- ប្រើប្រាស់ទឹកស្អាត

យើងត្រូវប្រើប្រាស់ទឹកស្អាត ឬច្នៃទឹកឲ្យស្អាត មុនប្រើប្រាស់ដើម្បីលាងបន្លែ ផ្លែឈើ ត្រីសាច់ ឬដាំស្ល។

ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕

៥ យ៉ាងជួយឲ្យចំណីអាហារមានសុវត្ថិភាព ញ៉ាំទៅមិនងាយរាករូស ឬពុល