សាច់ឆ្ងាញ់ តែបើញ៉ាំច្រើនហួសកម្រិត ប្រឈមនឹងជំងឺកាចសាហាវមួយនេះ

ដោយ ដេត ធន្នី កែសម្រួលចុងក្រោយ 10/01/2020

ត្រួតពិនិត្យដោយ វេជ្ជ. ចាន់ ស៊ីណេត

សាច់ឆ្ងាញ់ តែបើញ៉ាំច្រើនហួសកម្រិត ប្រឈមនឹងជំងឺកាចសាហាវមួយនេះ

គ្នាយើងដែលចូលចិត្តញ៉ាំសាច់ច្រើនហួសកម្រិត (សាច់ក្រហម) មានសាច់ជ្រូក គោ ក្របី ចៀម ពិសេសសាច់កំប៉ុង សាច់អាំង ឬបំពង ទៅថ្ងៃមុខអាចប្រឈមនឹងជំងឺមហារីកពោះវៀនធំ។ សាច់ក្រហម ជាអាហារបណ្ដាលឲ្យយើងទល់លាមក យូរៗទៅវិវត្តទៅជាជំងឺមហារីកពោះវៀន។ ទី១ សាច់ក្រហម មានផ្ទុកជាតិកាកសរសៃតិច ទី២ វាមានផ្ទុកបរិមាណជាតិខ្លាញ់ខ្ពស់ ដែលរាងកាយត្រូវការរយៈពេលយូរ ដើម្បីរំលាយ និងទី៣ វាបន្ថយការញ៉ាំអាហារជាតិកាកសរសៃប្រចាំថ្ងៃ នៅពេលយើងញ៉ាំសាច់ក្រហមច្រើន។

បើតាមការបកស្រាយនៅផេកផ្លូវការរបស់មន្ទីរពេទ្យកាល់ម៉ែត ក្រៅពីការបរិភោគសាច់ច្រើន នៅមានមូលហេតុផ្សេងទៀតដែលជំរុញមានជំងឺមហារីកពោះវៀនធំ ក្នុងនោះរួមមាន កត្តាអាយុ (លើសពី៥០ឆ្នាំ) ការផឹកស្រា ជក់បារី និងការប្រែប្រួលហ្សែន។ ជំងឺនេះបើបង្កឡើងដោយការប្រែប្រួលហ្សែន នោះគឺអាចចម្លងទៅសមាជិកគ្រួសារជំនាន់ក្រោយ ក្លាយជាជំងឺតំណពូជ។

ចំពោះរោគសញ្ញាសំខាន់ៗនៃជំងឺមហារីកពោះវៀនធំ មានដូចជា បន្ទោបង់លាមកមិនទៀងទាត់ ទល់លាមកញឹកញាប់ ទល់លាមករយៈពេលយូរ ធ្លាក់ឈាមពេលបន្ទោបង់លាមក ឈឺពោះ ឬស្រកគីឡូខុសប្រក្រតី។ ចំណែកកត្តាមួយចំនួនអាចឲ្យយើងសង្ស័យថាអ្នកជំងឺមហារីកពោះវៀនដែលបណ្តាលមកពីកត្តាប្រែប្រួលហ្សែននោះរួមមាន៖

– អ្នកជំងឺមានបងប្អូន ឬឪពុកម្តាយបង្កើតមានមហារីកពោះវៀនធំ (យ៉ាងតិច២នាក់)
– អ្នកជំងឺមានអាយុតិចជាង ៦០ឆ្នាំ
– ការឆ្លុះពោះវៀនឃើញថាអ្នកជំងឺមានចំនួនដុំសាច់(ប៉ូលីព) ច្រើនជាង ១០០ ក្នុងពេលឆ្លុះពោះវៀន។

វិធីតែមួយគត់ដែលអាចឲ្យយើងរកឃើញជំងឺមហារីកពោះវៀនធំនៅដំណាក់កាលដំបូង និងបង្ការជំងឺនេះបាន គឺការឆ្លុះពោះវៀន ហើយក្រុមគ្រួសាររបស់អ្នកជំងឺទាំងអស់ តម្រូវឲ្យឆ្លុះពោះវៀន ១-២ឆ្នាំ/ម្តង នៅពេលពួកគេមានអាយុចាប់ពី២០ឆ្នាំឡើងទៅ។

អត្ថបទពាក់ព័ន្ធ៖

ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕