គ្នាយើង​មួយ​ចំនួនបានអនុវត្ត​តាម​វិធី​ផ្សេងៗ​ ​​ដើម្បី​​ឲ្យ​រោមភ្នែក​ដុះ​វែង​​ ប៉ុន្តែ​វិធី​ដែល​ងាយ​ស្រួល​បំផុត​គឺ​របប​អាហារ។ ការ​ញ៉ាំ​អាហារ​ល្អ​សម្រាប់​សុខភាពមិន​ត្រឹម​តែ​ជួយ​ដល់រោមភ្នែក​ទេ​ តែនៅ​ជួយ​ដល់​រាងកាយ​ផង​ដែរ។ អត្ថបទ​នេះ​នឹង​ប្រាប់​គ្នា​យើង​ពី​អាហារ​​ប៉ុន្មាន​ប្រភេទ​ដែល​មាន​ពួក​វីតាមីន​​ជួយ​ឲ្យ​រោមភ្នែក​ដុះ​វែង។

១. ស៊ុត

ស៊ុត​សម្បូរ​ដោយ​ប្រូតេអ៊ីន។ សក់ និង​រោមភ្នែក​បង្កើត​ដោយ​សារធាតុ​ keratin ។ ​អាហារ​ដែល​សម្បូរ​ដោយ​ប្រូតេអ៊ីន​អាច​ផ្តល់​អាស៊ីដ​អាមីណូ​គ្រប់គ្រាន់​ដើម្បី​ផលិត​ keratin បានដែល​នេះ​អាច​ជួយ​ឲ្យ​រោមភ្នែក​រឹងមាំ និង​ដុះ​វែង​។

២. ត្រី​សាល់ម៉ុន

ត្រី​សាល់ម៉ុន​ជា​ប្រភព​នៃ​អាស៊ីដ​ខ្លាញ់​អូមេហ្គា៣ វីតាមីន D និង​ពពួក​វីតាមីន B។ អាស៊ីដ​ខ្លាញ់​អូមេហ្គា​៣​ការពារ​រោមភ្នែក​មិន​ឲ្យ​ដាច់ ឬ​ជ្រុះ រីឯ​វីតាមីន D និង​ពពួក​វីតាមីន B ជួយ​ជំរុញ​ការ​លូតលាស់​របស់​រោមភ្នែក។

៣. គ្រាប់​ផ្លែឈើ (Nuts)

គ្រាប់ផ្លែឈើផ្តល់​អាស៊ីដ​ខ្លាញ់​អូមេហ្គា៣ និង​វីតាមីន E ដល់​រាងកាយ។ អាស៊ីដ​ខ្លាញ់ និង​វីតាមីន E ជួយ​ជញ្ជូន​ឈាម និង​អុកស៊ីសែន​ទៅ​កាន់​ឫស​រោម​ភ្នែក។ អ្វីទាំង​នេះ​ជួយ​បង្កើន​លំហូរ​ឈាម និង​ពង្រឹង​ឫស​រោម​ភ្នែក ហើយ​នៅ​ជួយ​រក្សា​រោមភ្នែក​ឲ្យ​នៅ​បាន​យូរ និង​ដុះ​លឿន។ គ្រាប់ផ្លែឈើមានដូចជាគ្រាប់ almonds គ្រាប់ hazelnuts និង​គ្រាប់ walnuts ជាដើម។

៤. បន្លែ និង​ផ្លែឈើ

បន្លែ និង​ផ្លែឈើ​មាន​ផ្ទុក​វីតាមីន A និង C។ វីតាមីន​ទាំង​ពីរ​នេះ​មាន​ប្រយោជន៍​ជួយ​ដល់​ការ​លូតលាស់​រោមភ្នែក និង​ការ​ផលិត​ខូឡាជែន។ រីឯ​សំបក​ផ្លែឈើ និង​បន្លែ​មាន​ Silica ដែល​ជា​ជាតិរ៉ែ​ជួយ​​ឲ្យ​រោមភ្នែក​ដុះវែង និង​មាន​សុខភាព​ល្អ។

៥. ផ្សិត

ផ្សិត​សម្បូរ​ដោយ​វីតាមីន B3។ វីតាមីន​នេះ​ជួយ​ឲ្យ​ចរន្តឈាម​ប្រសើរ​ឡើង​ និង​ជួយ​ដល់​ការ​ផលិត​ keratin។ បន្ថែម​ពី​នេះ​ទៀត វីតាមីន B3​ ជំរុញ​ដល់​ការ​លូតលាស់​របស់​រោមភ្នែក និង​ជម្រុះ​​រោមភ្នែក​ដែល​ស្ងួត ឬ​ដាច់ ហើយ​នៅ​ជា​ជំនួយ​ដល់​ការ​ផលិត​កោសិកា​​ និង​បង្ការ​មិន​ឲ្យ​ជ្រុះ​រោមភ្នែក​ផង​ដែរ។

៦. គ្រាប់​សណ្ដែក

គ្រាប់​សណ្ដែក​មាន​វីតាមីន H (Biotin) និង​អាស៊ីដ​ហ្វូលិក។ វីតាមីន H បង្កើន​លំហូរ​ឈាម​ទៅ​កាន់​ឫស​រោម​ភ្នែក និង​ជួយ​ឲ្យ​រោមភ្នែក​ក្រាស់​ជាង​មុន រួម​ទាំង​បង្ការ​មិន​ឲ្យ​ស្ងួត ឬ​ជ្រុះ។ លើស​ពី​នេះ​នៅអាច​ជួយ​រាងកាយ​ស្រូប​យក​អាស៊ីដ​អាមីណូ និង​ជាតិ​ខ្លាញ់​ដែល​​សំខាន់​សម្រាប់​រោមភ្នែក។ ចំណែក​ឯ​អាស៊ីដ​ហ្វូលិក​បង្ការ​រោមភ្នែក​មិន​ឲ្យ​ដាច់។