នៅពេលដែលប្រព័ន្ធភាពស៊ាំរបស់យើងរឹងមាំ និងមានសុខភាពល្អ យើងអាចប្រយុទ្ធប្រឆាំងជាមួយនឹងជំងឺ ក៏ដូចជាមេរោគផ្សេងៗបានយ៉ាងមានប្រសិទ្ធភាព ក៏ដូចជាធ្វើឲ្យយើងមិនងាយឈឺផ្ដេសផ្ដាសថែមទៀតផង។ ហេតុដូច្នេះហើយ ការការពារប្រព័ន្ធភាពស៊ាំនៃរាងកាយ គឺជាកត្តាដ៏សំខាន់បំផុត។ ជាមួយនឹងការអនុវត្តវិធីសាស្រ្តងាយៗខាងក្រោមនេះ យើងអាចជំរុញឲ្យប្រព័ន្ធភាពស៊ាំរបស់យើងបំពេញតួនាទីបានល្អប្រសើរជាងមុនទ្វេដង។
ចង់ឲ្យប្រព័ន្ធភាពស៊ាំរឹងមាំ សាកល្បងវិធីសាស្ត្រងាយៗទាំង៥នេះ
ត្រួតពិនិត្យដោយ វេជ្ជ. ចាន់ ស៊ីណេត · មន្ទីរពេទ្យបង្អែកមិត្តភាពកម្ពុជា-ចិន សែនសុខ
១.របបអាហារត្រឹមត្រូវ
សារធាតុចិញ្ចឹមនៅក្នុងអាហារ ជាពិសេសបន្លែ ផ្លែឈើ និងគ្រឿងទេសផ្សេងៗ មានអត្ថប្រយោជន៍ដ៏ច្រើនលើសលប់ក្នុងការការពារប្រព័ន្ធភាពស៊ាំរបស់យើងឲ្យមានដំណើរការល្អ។ លើសពីនេះ ស័ង្កសី ជាតិដែក វីតាមីនA, C, E, B6 និង B12 ក៏ជួយទ្រទ្រង់ប្រព័ន្ធភាពស៊ាំរបស់យើងទៅតាមមុខងាររបស់វាផងដែរ។ រីឯប្រូតេអ៊ីន ក៏រួមចំណែកជួយដល់សុខភាពប្រព័ន្ធភាពស៊ាំ ដោយការបង្កើត និងថែទាំកោសិកាភាពស៊ាំបានយ៉ាងល្អប្រសើរថែមទៀតផង។
២. កាត់បន្ថយស្រ្តេស
ជាទូទៅ បញ្ហាស្រ្តេសប៉ះពាល់ដល់សុខភាពផ្លូវកាយ ក៏ដូចជាផ្លូវចិត្តរបស់យើងផងដែរ។ លើសពីនេះ វាក៏ជះឥទ្ធិពលដល់ប្រព័ន្ធភាពស៊ាំរបស់យើងដូចគ្នា។ នៅពេលដែលយើងស្រ្តេស ជាពិសេសបញ្ហាស្រ្តេសរ៉ាំរ៉ៃ រាងកាយយើងនឹងចាប់ផ្ដើមបញ្ចេញប្រតិកម្មប្រឆាំងនឹងវា ហើយប្រតិកម្មស្រ្តេសនេះ នឹងបង្ក្រាបទៅលើប្រព័ន្ធភាពស៊ាំរបស់យើង ព្រមទាំងបង្កើនឱកាសនៃការឆ្លងមេរោគ និងជំងឺផ្សេងបានផងដែរ។
៣. គេងគ្រប់គ្រាន់
ការគេងមានអត្ថប្រយោជន៍ដ៏ច្រើនលើសលប់ដល់រាងកាយរបស់យើង។ ជាក់ស្តែង ម៉ូលេគុលដែលប្រយុទ្ធប្រឆាំងនឹងការឆ្លងមេរោគដ៏សំខាន់ៗត្រូវបានបង្កើតឡើងនៅពេលដែលយើងគេងលក់។ ដូចនេះ ដើម្បីធ្វើឲ្យប្រព័ន្ធភាពស៊ាំរបស់យើងរឹងមាំល្អ យើងចាំបាច់ត្រូវគេងឲ្យបានគ្រប់គ្រាន់ជារៀងរាល់យប់។
៤. លំហាត់ប្រាណជាទៀងទាត់
ពិតណាស់លំហាត់ប្រាណ មិនត្រឹមតែធ្វើឲ្យរាងកាយរបស់យើងរឹងមាំ និងជួយកាត់បន្ថយស្រ្តេសប៉ុណ្ណោះទេ វាថែមទាំងជួយទ្រទ្រង់ដល់ប្រព័ន្ធភាពស៊ាំនៃរាងកាយថែមទៀតផង ដោយជួយជំរុញដល់ចរន្តឈាមទាំងមូល និងធ្វើឲ្យកោសិកាភាពស៊ាំ ក៏ដូចជាម៉ូលេគុលប្រឆាំងនឹងការឆ្លងមេរោគផ្សេងៗ ធ្វើដំណើរបានស្រួលពាសពេញរាងកាយរបស់យើង។
៥. ញ៉ាំទឹកឲ្យបានគ្រប់គ្រាន់
ទឹកមានតួនាទីដ៏សំខាន់ចំពោះរាងកាយរបស់យើង ព្រមទាំងអាចជួយទ្រទ្រង់ប្រព័ន្ធភាពស៊ាំបានផងដែរ។ សារធាតុរាវនៅក្នុងប្រព័ន្ធចរន្តឈាមដែលមានផ្ទុកកោសិកាភាពស៊ាំប្រឆាំងនឹងការឆ្លងមេរោគ ត្រូវបានបង្កើតឡើងដោយទឹក។ ប៉ុន្តែប្រសិនបើយើងខ្វះជាតិទឹកវិញនោះ ចលនានៃប្រព័ន្ធចរន្តឈាមនឹងថយចុះ ដែលអាចបណ្ដាលឲ្យប្រព័ន្ធភាពស៊ាំរបស់យើងចុះខ្សោយ។ ហេតុនេះហើយ ការបំពេញជាតិទឹកគ្រប់គ្រាន់ដល់រាងកាយ គឺជាអ្វីដែលយើងមិនគួរមើលរំលងឡើយ។
បដិសេធ
Hello Health Group និង “Hello គ្រូពេទ្យ” មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
ផ្សព្វផ្សាយពាណិជ្ជកម្មតើអត្ថបទនេះមានប្រយោជន៍ដែរទេ?
ផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្ម