ត្រូវដឹងថា អាហារកំប៉ុង ដំបូងគេផលិតដើម្បីប្រើប្រាស់អំឡុងពេលសង្គ្រាម កុំឲ្យដាច់ស្បៀង ខណៈបច្ចុប្បន្នបែរជាប្រើសម្រាប់គ្នាយើងរវល់ការងារខ្លាំង គ្មានពេលចម្អិនអាហារទៅវិញ នាំឲ្យកើតចេញជាសំណួរច្រើនពាក់ព័ន្ធអាហារកំប៉ុង ល្អ ឬមិនល្អ? ប៉ះពាល់សុខភាពអីខ្លះ? គ្មានជម្រើស គួរជ្រើសរើសអាហារកំប៉ុងបែបណាទើបល្អ? “Hello គ្រូពេទ្យ’ នឹងបកស្រាយក្នុងអត្ថបទនេះ។

១- អាហារកំប៉ុងមិនសូវមានសារធាតុចិញ្ចឹម?

មនុស្សភាគច្រើនតែងសន្និដ្ឋានថា អាហារកំប៉ុងមិនសូវមានសារធាតុចិញ្ចឹម ដូចអាហារស្រស់ទេ យ៉ាងណា ការសន្និដ្ឋាននេះមិនត្រូវទាំងអស់ដែរ។ តាមការសិក្សាបានបង្ហាញថា អាហារកំប៉ុងអាចរក្សាសារធាតុចិញ្ចឹម ដូចជា ប្រូតេអ៊ីន កាបូអ៊ីដ្រាត សារធាតុរ៉ែ និងវីតាមីនរលាយក្នុងខ្លាញ់ ប៉ុន្តែដោយសារអាហារកំប៉ុងត្រូវឆ្លងកាត់កំដៅខ្ពស់ ហេតុនេះក៏មិនអាចរក្សាវីតាមីនរលាយក្នុងទឹកមួយចំនួនដូចជា វីតាមីន C និង B ដែរ។ យ៉ាងណា វីតាមីនប្រភេទនេះ ក្នុងអាហារស្រស់ ក៏នឹងបាត់បង់ពេលយើងយកមកចម្អិនធម្មតា ឬទុកក្នុងទូទឹកកក ដូចគ្នា។ អ្វីគួរឲ្យភ្ញាក់ផ្អើលនោះ គឺថា អាហារកំប៉ុងមួយចំនួន មានសារធាតុផ្តល់ប្រយោជន៍ច្រើនចំពោះសុខភាពទៅវិញ ជាក់ស្តែងប៉េងប៉ោះកំប៉ុង បញ្ចេញសារធាតុប្រឆាំងអុកស៊ីតកម្ម នៅក្រោមសីតុណ្ហភាពខ្ពស់ ច្រើនជាងផ្លែប៉េងប៉ោះធម្មតា។

២- បើអ៊ីចឹងអាហារកំប៉ុងល្អ ឬអត់?

យ៉ាងណា យើងនៅតែមិនអាចសន្មត់ថា ល្អ ឬអាក្រក់ ១០០% នោះដែរ ព្រោះអាហារកំប៉ុង មានផ្ទុកសារធាតុគីមី Bisphenol-A (BPA) អាចទៅរំខានដំណើរការអ័រម៉ូនក្នុងខ្លួន។ ទោះបីមានស្ថាប័នផលិតចំណីអាហារជាច្រើន អះអាងថា អាហារកំប៉ុង មានកម្រិតសារធាតុ BPA តិចតួចប៉ុណ្ណោះ មិនអាចប៉ះពាល់ដល់សុខភាពយើងក៏ពិតមែន តែមានភ័ស្តុតាងបែបវិទ្យាសាស្ត្រជាក់ស្តែង បង្ហាញពីទំនាក់ទំនងរវាងសារធាតុ BPA កម្រិតទាប ជាមួយជំងឺសរសៃឈាមបេះដូង ជំងឺទឹកនោមផ្អែមប្រភេទ ២ បញ្ហាផ្លូវភេទ និងជំងឺមហារីកជាដើម។

ក្រៅពីសារធាតុ BPA នៅមានបាក់តេរីច្រើនទៀតក្នុងអាហារកំប៉ុង ព្រោះនៅពេលដំណើរការច្រកកំប៉ុង មិនមានអនាម័យត្រឹមត្រូវ អាចឲ្យមានបាក់តេរី Clostridium botulinum បាន។ សព្វថ្ងៃ ករណីនេះមិនសូវមាននោះទេ តែយើងក៏មិនអាចមើលរំលងបានដែរ ហើយកុំញ៉ាំអាហារកំប៉ុងហួសកាលកំណត់ ឬខូចខាតទ្រង់ទ្រាយដើម។

អត្ថបទពាក់ព័ន្ធ៖

ញ៉ាំអាហារកំប៉ុងកំប៉ឹតសម្បក អាចមានស្ថានភាពសុខភាពបែបនេះ
ចូលចិត្តញ៉ាំអាហារខាងក្រៅ ឬ Street food គួរដឹងពីផលលំបាកទាំងនេះ!

៣- វិធីញ៉ាំអាហារកំប៉ុងឲ្យបានត្រឹមត្រូវ

គួរអានការណែនាំឲ្យបានត្រឹមត្រូវ ព្រោះអាហារកំប៉ុងភាគច្រើន បានបន្ថែមគ្រឿងបង្កើនរសជាតិ ដូចជា អំបិល ស្ករ និងសារធាតុបន្ថែមមួយចំនួនទៀត អាចធ្វើឲ្យប៉ះពាល់ដល់សុខភាព។ គួរលាងជម្រះទឹកមុនញ៉ាំ ដើម្បីឲ្យសារធាតុទាំងនេះចេញពីអាហារ។ យ៉ាងណា អាហារកំប៉ុងខ្លះ ក៏គ្មានសារធាតុបន្ថែមបង្កើនរសជាតិដូចគ្នា។

អ្វីយើងត្រូវធ្វើមុនសម្រេចចិត្តទិញអាហារកំប៉ុងទាំងនោះមកញ៉ាំ គឺត្រូវមើលគ្រឿងផ្សំឲ្យបានគ្រប់ជ្រុងជ្រោយ។ ហើយក៏ត្រូវចាំដែរថា អាហារកំប៉ុង ជម្រើសល្អមួយចំពោះសុខភាព ពេលយើងគ្មានចម្អិនអាហារស្រស់។

ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ។

រវល់ខ្លាំងដល់​គ្មានពេលចម្អិនម្ហូប ញ៉ាំអាហារកំប៉ុងល្អអត់?

រវល់ខ្លាំងដល់គ្មានពេលចម្អិនម្ហូប ញ៉ាំអាហារកំប៉ុងល្អអត់?