មិត្តភ័ក្ដិមួយចំនួន គេនៅរក្សារាងនៅស្អាតថេរដដែល ឯឯងវិញ មើលលែងយល់ប្រែទៅជាទ្រលុកទ្រលន់? ធ្វើម៉េចបើចង់បានរាងថេរ នៅតែស្អាតស្លៀកពាក់ឡូយ? ចាំ “Hello គ្រូពេទ្យ” ប្រាប់!

គេមានក្បួនខ្នាត ហើយប្រកាន់ខ្ជាប់រាល់ទម្លាប់ល្អៗ ទាំងហាត់ប្រាណ និងរបបអាហារ មិនចេះតែញ៉ាំឲ្យតែឆ្អែតតាមឃ្លានទេ។

១- កំណត់ការញ៉ាំ

ត្រូវស្វែងយល់ពីមុខងារអាហារឲ្យច្បាស់លាស់ ថាតើរបស់យើងញ៉ាំ ធ្វើឲ្យគីឡូថេរ ស្រកគីឡូ ឬឡើងគីឡូ។ អ៊ីចឹង រៀបចំផែនការគ្រប់គ្រងរបបអាហារ ដើម្បីគ្រប់គ្រងទម្ងន់បានកាន់តែមានប្រសិទ្ធភាព។

២- អាហារពេលព្រឹក

កុំខានអាហារពេលព្រឹក ព្រោះជាអាហារសំខាន់។ អ្នកចង់បានគីឡូស្រក ឬរាងស្អាត តែងគិតខុសត្រង់ចំណុចនេះ (ញ៉ាំទៅ ខ្លាចឡើងគីឡូ)។ អាហារពេលព្រឹកអាចរក្សាទម្ងន់បានល្អ មិនមែនអត់ញ៉ាំ ហើយស្រកទេ។ អ្វីដែលគួរធ្វើ គឺបន្ថយបរិមាណអាហារថ្ងៃត្រង់ និងល្ងាច ឬកាត់បន្ថយការឃ្លានកណ្ដាលយប់ ហើយរត់ទៅដាក់ម៉ាឆ្អែតរហូតហល់។ អាហារព្រឹកដែលល្អ មានផ្លែឈើស្រស់ យ៉ាអ៊ួ (ទឹកដោះគោជូរ) ជាដើម។

៣- ថ្លឹងគីឡូជាប្រចាំ

ត្រូវថ្លឹង និងតាមដានគីឡូប្រចាំ បើចង់គ្រប់គ្រងគីឡូដែលយើងចង់បាន មិនមែនចេះតែញ៉ាំ ហើយអត់បានខ្វល់ទម្ងន់ខ្លួនឯងឡើងចុះប៉ុន្មាននោះទេ។

៤- កុំចូលចិត្តបង្ហើយ

កុំស្ដាយ ឬកំពុងឆ្ងាញ់ត្រូវមាត់ ហើយបង្ហើយខ្ទេចគ្មានសល់ បើមិនចង់ឡើងគីឡូស្រួលៗទេ។ អ្វីដែលគួរធ្វើ ត្រូវកំណត់ការញ៉ាំ កាត់បន្ថយញ៉ាំកាន់តែតិច (ឆ្អែតល្មម)។

៥- ចៀសវាងអាហារបន្ទាប់បន្សំ

បើអាហារបន្ទាប់បន្សំសម្បូរខ្លាញ់ ឬជាប្រភេទអាហារ Fast Food ត្រូវចៀសវាង។ តែបើឃ្លាន អាចញ៉ាំផ្លែឈើ បន្លែ គ្រាប់ធញ្ញជាតិសម្រូប ឬប្រភេទប្រូតេអ៊ីនគ្មានជាតិខ្លាញ់ (សាច់អត់ខ្លាញ់)។

៦- កុំភ្លេចទឹកដោះគោ

កាល់ស្យូមពីទឹកដោះគោ ពិតជាសំខាន់សម្រាប់សុខភាពឆ្អឹង មិនថាយើងស្គម ឬធាត់ទេ។

៧- គិតពីចំនួនកាឡូរី

ទម្ងន់ត្រឹមត្រូវអាចរក្សាបាន តាមរយៈការគិតពីចំនួនកាឡូរីដែលប្រើប្រចាំថ្ងៃ។ មានន័យថា ញ៉ាំចូលប៉ុន្មាន ប្រើប៉ុន្មាន ហើយនៅសល់ប៉ុន្មាន។

៨- ហាត់យកសាច់ដុំ

ចំណុចនេះ ប្រហែលត្រូវជាមួយប្រុសៗច្រើន។ បើស្រលាញ់រាងអត់ខ្លាញ់ អត់មានក្បាលពោះ គួរចាប់ផ្ដើមហាត់ ដើម្បីរំលាយជាតិខ្លាញ់ បង្កើតសាច់ដុំ ឲ្យសមស្របទៅនឹងកម្លាំង និងលទ្ធភាពរាងកាយយើង។

៩- បង្កើនពេលហាត់ប្រាណ

រឿងរវល់ គ្នាយើងណាក៏រវល់ដែរ ប៉ុន្តែខុសគ្នាត្រង់ថា តើការតាំងចិត្ត និងកំណត់ពេលវេលាឲ្យខ្លួនឯងច្បាស់លាស់ប៉ុនណា។ ហាត់ប្រាណចង់បានផល គឺហោចណាស់ ចំណាយពេលឲ្យបាន ៣០ នាទីក្នុងមួយថ្ងៃ ឬ ៥ ថ្ងៃក្នុងមួយសប្ដាហ៍ បើមិនបានរាល់ថ្ងៃ។ អនុវត្តបានច្រើនកាលណា ការគ្រប់គ្រងទម្ងន់ក៏កាន់តែប្រសើរតាមនោះដែរ។

ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕

ចង់​បាន​រាង​ស្អាត គីឡូ​ថេរ អត់​ពិបាក​ទេ

ចង់បានរាងស្អាត គីឡូថេរ អត់ពិបាកទេ