ស្រោមអនាម័យ ថ្នាំលេប ថ្នាំចាក់ កងដាក់ក្រោមស្បែក កងដាក់ក្នុងស្បូន ចងដៃស្បូន ចងបំពង់មេជីវិត សុទ្ធសឹងជាមធ្យោបាយពន្យារកំណើតទំនើបដែលអាចការពារការមានកូន ឬបញ្ឈប់កំណើតតែម្តង។ ត្បិតតែមានប្រសិទ្ធិភាពខ្ពស់ តែមធ្យោបាយពន្យារកំណើតទាំងនេះក៏មានផលរំខានខ្លះៗដែរ។

១- ថ្នាំគ្រាប់ពន្យារកំណើតបន្ទាន់៖ ជាថ្នាំគ្រាប់មួយប្រភេទដែលអាចបង្ការការមានផ្ទៃពោះភ្លាមៗ។ ការលេបថ្នាំបន្ទាប់ពីរួមភេទរួចបានកាន់តែលឿន ប្រសិទ្ធភាពកាន់តែខ្ពស់ (លេបមិនឲ្យលើស៣ ថ្ងៃ បន្ទាប់ពីរួមភេទរួច)។ ពេលលេបថ្នាំរួចអាចធ្វើឲ្យយើងក្អួតចង្អោរ ធ្លាក់ឈាម ២-៣ថ្ងៃ។ តែស្រីៗគ្នាយើងចាំណា ថ្នាំនេះមិនអាចប្រើបានជាប្រចាំនោះទេ។

ប្រើស្រោមពេលរួម-មធ្យោបាយពន្យារកំណើត

២- ស្រោមអនាម័យ៖ និយាយពីគុណសម្បតិ្តវិញ ស្រោមអនាម័យមិនត្រឹមតែអាចការពារមិនឲ្យមានកូននោះទេ ការប្រើស្រោមអាចបង្ការការឆ្លងជំងឺកាមរោគផ្សេងៗ ពិសេសជំងឺអេដស៍។ តែទស្សនៈមួយចំនួនថា ការប្រើស្រោមអនាម័យមិនសូវស្រណុកសុខស្រួលនោះទេ។

៣- ថ្នាំលេប៖ ជាមធ្យោបាយពន្យារកំណើតពេញនិយមជាងគេ។ ថ្នាំនេះតម្រូវឲ្យស្រីៗគ្នាយើងលេបរៀងរាល់ថ្ងៃ និងទៀងពេល។ នៅពេលលេបអស់មួយបន្ទះ យើងត្រូវលេបបន្ទះថ្មីបន្ត តែវាក៏មានហានិភ័យនៅពេលយើងភ្លេចលេបវាដែរ។ ចំណែកផលរំខានវិញគ្នាយើងមួយចំនួនអាចឈឺពោះ ឬឈឺក្បាលតិចៗ ពេលប្រើថ្នាំនៅខែដំបូងៗ។

៤- ថ្នាំចាក់៖ ជាការចាក់បញ្ចូលអ័រម៉ូនរៀងរាល់ ៣ខែ/ម្តង វាមានប្រសិទ្ធភាពខ្ពស់ តែស្រីៗគ្នាយើងពេលឈប់ចាក់ថ្នាំ ត្រូវចាំរហូតដល់ ៤-៥ ខែ ទើបអាចមានផ្ទៃពោះឡើងវិញ។ ងាកមកផលរំខានវិញ អាចឡើង ឬស្រកគីឡូ មានឈាមរដូវ ឬមិនមានឈាមរដូវខុសប្រក្រតី។

៥- ការចងដៃស្បូន៖ វិធីពន្យារកំណើតនេះសម្រាប់ប្តីប្រពន្ធដែលមិនចង់បានកូនបន្ថែមទៀត។ ការចងដៃស្បូនជាការបញ្ឈប់កំណើតកូនជារៀងរហូត។ ស្ត្រីអាចចងដៃស្បូនបានបន្ទាប់ពីសម្រាលកូនរួច ឯផលរំខានវិញមានតិចតួចបំផុត។

៦- ការចងបំពង់មេជីវិត៖ ដូចគ្នាទៅនឹងការចងដៃស្បូនដែរ គ្រាន់តែវិធីនេះប្រើទៅបុរសវិញ។ ក្រោយចងបំពង់មេជីវិតឈ្មោលរួចភ្លាមៗមិនអាចការពារការមានកូនបានទេ ត្រូវរង់ចាំរយៈពេល ៣ ខែ។

៧- កងដាក់ក្នុងស្បូន៖ មានរាងជាអក្សរ T អាចបត់បែនចុះឡើងបាន។ ការប្រើកងដាក់ក្នុងស្បូនអាចបង្ការកុំឲ្យមានផ្ទៃពោះរហូតដល់ទៅ ១០ ឆ្នាំ។ ប្រសិនបើចង់បានកូនវិញ ត្រូវដកកងចេញ។

៨- កងដាក់ក្រោមស្បែក៖ ជាឧបករណ៍ផ្លាស្ទិចទន់ មាន ២ ដើមតូចៗ ប្រើសម្រាប់ដាក់ក្រោមស្បែកនៅដើមដៃរបស់ស្ត្រី។ កងដាក់ក្រោមស្បែកមានប្រសិទ្ធភាពដល់ទៅ ៥ឆ្នាំ ក្រោយដាក់កងរួចអាចធ្វើឈាមរដូវយើងមានការប្រែប្រួលខ្លះៗ។

ដើម្បីបញ្ចៀសគ្រោះថ្នាក់ផ្សេងៗ ប្តីប្រពន្ធត្រូវតែទៅពិគ្រោះជាមួយគ្រូពេទ្យជំនាញមុននឹងសម្រេចចិត្តជ្រើសរើសមធ្យោបាយពន្យារកំណើតណាមួយខាងលើដែលសក្តិសមសម្រាប់អ្នកទាំងពីរ។

អត្ថបទពាក់ព័ន្ធ៖

ត្រូវដឹង មធ្យោបាយ​ពន្យារ​កំណើត​សម័យថ្មី មាន​ច្រើន​បែប ឯចំណុចល្អ​ផ្សេងៗ​គ្នា

ត្រូវដឹង មធ្យោបាយពន្យារកំណើតសម័យថ្មី មានច្រើនបែប ឯចំណុចល្អផ្សេងៗគ្នា