ជំងឺមហារីកគ្រាប់ឈាមMyeloid រ៉ាំរ៉ៃ (CML) គឺជាប្រភេទមហារីកលើកោសិកាឈាមស ដែលមានការលូតលាស់យឺត ដែលពេលខ្លះត្រូវចំណាយពេលរាប់ឆ្នាំដើម្បីវិវត្ត។ ជំងឺនេះច្រើនកើតលើមនុស្សចាស់អាយុច្រើនជាង ៦០ឆ្នាំ។ អ្នកដែលមានជំងឺនេះ អាចរស់នៅជាមួយជំងឺរហូតដល់វ័យកាន់តែចាស់ប្រសិនបើអាចគ្រប់គ្រងស្ថានភាពជំងឺ ជាជាងព្យាបាលវាឲ្យជាដាច់។
ថ្នាំប្រភេទថ្មីព្យាបាលជំងឺមហារីកគ្រាប់ឈាម សង្ឃឹមថាជួយអ្នកជំងឺបានកាន់តែច្រើន
នៅចក្រភពអង់គ្លេស មានមនុស្សប្រហែល ៧៥០នាក់ និងនៅសហរដ្ឋអាមេរិក ប្រហែល ៩០០០នាក់ រៀងរាល់ឆ្នាំដែលធ្វើរោគវិនិច្ឆ័យឃើញថាមានជំងឺមហារីកគ្រាប់ឈាមនេះ។ បច្ចុប្បន្ននេះ អ្នកជំងឺនៅអង់គ្លេសប្រហែល ៦០០០នាក់កំពុងរស់នៅជាមួយនឹងជំងឺមហារីកគ្រាប់ឈាម។
ការស្រាវជ្រាវនេះធ្វើទៅលើប្រភេទថ្នាំថ្មីដែលមានឈ្មោះថា Asciminib ដែលអ្នកស្រាវជ្រាវរកឃើញថា នេះគឺជារបកគំហើញថ្មីមួយដើម្បីផ្ដល់ឲ្យជម្រើសព្យាបាលថ្មីៗដល់អ្នកជំងឺដែលពិបាកក្នុងការប្រើថ្នាំផ្សេងទៀត និងផ្ដល់ផលរំខានតិចជាង ហើយនឹងមិនប៉ះពាល់ដល់កោសិកាដែលមានសុខភាពល្អឡើយ។
បច្ចុប្បន្នថ្នាំព្យាបាលជំងឺមហារីកគ្រាប់ឈាម គឺជាប្រភេទថ្នាំគ្រាប់ ដោយថ្នាំនេះមានសកម្មភាពព្យាបាលតាមរយៈការរាំងខ្ទប់ប្រូតេអ៊ីន ដែលធ្វើឲ្យកោសិកាមហារីកបំបែកខ្លួនបាន។ ការបន្តរាំងខ្ទប់ប្រូតេអ៊ីនក្នុងរយៈពេលកាន់តែយូរ ថ្នាំនេះអាចនឹងគ្រប់គ្រងជំងឺមហារីកបាន និងបញ្ឈប់កុំឲ្យវារាលដាល។ ប៉ុន្តែការរាំងខ្ទប់ប្រូតេអ៊ីន នឹងធ្វើឲ្យខូចមុខងារធម្មតារបស់កោសិកា ដែលនាំឲ្យខូចឬកម្ទេចកោសិកាដែលសំខាន់សម្រាប់បំពេញមុខងារធម្មតាក្នុងរាងកាយ។
កាលទស្សវត្សទី៩០ គ្រូពេទ្យជាច្រើនលើពិភពលោករីករាយដោយសារការបង្កើតថ្នាំព្យាបាលដំបូងក្នុងក្រុមថ្នាំ Tyrosine Kinase inhibitors (TKI) ដែលគេហៅថាថ្នាំ imatinib។ ប៉ុន្តែថ្នាំ Imatinib និងថ្នាំជំនាន់ក្រោយៗរបស់ ក្រុមថ្នាំ TKIs ( Tyrosine kinase inhibitors) អាចបង្កឲ្យមានផលរំខានគ្រោះថ្នាក់ជាច្រើន។ ជាង៩៥ ភាគរយ នៃអ្នកជំងឺដែលប្រើថ្នាំទាំងនេះ អាចនឹងរកគ្រោះដោយផលរំខានរបស់ថ្នាំ និងមានស្ថានភាពធ្ងន់ធ្ងររហូតដល់មានគ្រោះថ្នាក់ដល់ជីវិតដូចជាខ្សោយបេះដូង និងឈឺថ្លើមជាដើម។ ថ្នាំទាំងនោះក៏អាចនឹងលែងមានប្រសិទ្ធភាពផងដែរបើសិនជាប្រើក្នុងរយៈពេលយូរ ហើយបច្ចុប្បន្ននេះជម្រើសក្នុងការប្រើថ្នាំព្យាបាលជំងឺនេះគឺនៅមានតិចនៅឡើយផង។
អត្ថបទពាក់ព័ន្ធ៖
- Childhood Leukemia (មហារីកគ្រាប់ឈាមសលើកុមារ)
- នៅអាមេរិកឥឡូវអាចលក់ថ្នាំព្យាបាលមហារីកឈាមលើទីផ្សារបានហើយ
- ជំងឺមហារីកសាហាវបែបនេះ បណ្តាលមកពីអ្វី អាចការពារបានទេ?
លោកសាស្ត្រាចារ្យ ធីម ហូក អ្នកស្រាវជ្រាវម្នាក់ក្នុងគម្រោងនេះ នៃវិទ្យាស្ថានស្រាវជ្រាវសុខភាព និងវេជ្ជសាស្ត្រ អូស្ត្រាលីខាងត្បូង បាននិយាយថា ថ្នាំ Asciminibនេះនឹងកែប្រែជីវិតរស់នៅរបស់អ្នកជំងឺ។ លោកក៏បានបន្តដែរថា ថ្នាំ Imatinib គឺបានជួយជីវិតមនុស្សពីសេចក្ដីស្លាប់ និងអាចរស់នៅដល់វ័យកាន់តែចាស់បាន។ ប៉ុន្តែលោកថាផលរំខានរបស់វាគឺធ្ងន់ធ្ងរនឹងអាចមិនមានប្រសិទ្ធភាពបើប្រើព្យាបាលរយៈពេលយូរ។ លោកសាស្ត្រាចារ្យក៏បានបន្តដែរថា ប្រសិនបើការស្រាវជ្រាវនេះជោគជ័យ នោះវាគឺជារបកគំហើញថ្មីក្នុងការព្យាបាលជំងឺមហារីកគ្រាប់ឈាមចាប់តាំងពីឆ្នាំ១៩៩០មក។
លោកសាស្ត្រាចារ្យ និងក្រុមរបស់លោកបានធ្វើតេស្តថ្នាំ Asciminib នេះលើអ្នកជំងឺ ១៥០នាក់ ដើម្បីបញ្ជាក់ថាថ្នាំនេះមានសកម្មភាពព្យាបាល និងប្រើបានរយៈពេលយូរ។ ថ្នាំនេះមិនអាចធ្វើតេស្តតែឯងបានទេ ដោយសារតែអ្នកជំងឺកំពុងបន្តការ ព្យាបាលជំងឺមហារីក ផ្សេងៗទៀត។ ការសិក្សានេះត្រូវបានធ្វើដោយផ្ដល់ថ្នាំឲ្យអ្នកជំងឺ ក្នុងកម្រិតដូសចន្លោះពី១០មិល្លីក្រាម និង ២០០មិល្លីក្រាម ដោយប្រើម្ដង ឬពីរដងក្នុងមួយថ្ងៃ ហើយបន្ទាប់មក គឺតាមដានអ្នកទាំងនោះបន្តនៅរយៈពេល ១៤ខែបន្ទាប់។
ជាលទ្ធផលបង្ហាញថា ថ្នាំនេះមានសកម្មភាពនៅក្នុងខ្លួនរបស់អ្នកជំងឺ ទោះបីជាពេលដែលអ្នកជំងឺកំពុងទទួលការព្យាបាលជំងឺមហារីកផ្សេងទៀតក៏ដោយ។ អ្នកជំងឺខ្លះអាចមានបញ្ហាខ្លះដូចជា នឿយហត់ ឈឺក្បាល សម្ពាធឈាមឡើងខ្ពស់ ឈឺសន្លាក់ និងកម្រិតផ្លាកែតធ្លាក់ចុះ ហើយ ក្នុងនោះអ្នកជំងឺប្រាំនាក់ មានបញ្ហារលាកលំពែង។ ក្រៅពីបញ្ហាផលរំខាននេះ អ្នកស្រាវជ្រាវនិយាយថាការធ្វើតេស្តនេះគឺជោគជ័យ។
លោកសាស្ត្រាចារ្យបន្ថែមដែរថា ការសាកល្បងនេះបង្ហាញថាថ្នាំ Asciminib មានប្រសិទ្ធភាពខ្ពស់ ទោះបីជាអ្នកជំងឺដែលធ្លាប់បរាជ័យក្នុងព្យាបាលដោយក្រុមថ្នាំ TKIs មួយចំនួនក៏ដោយ។ គុណភាពស្មើរគ្នា គឺជារឿងសំខាន់ ហើយវាក៏បានបង្ហាញថាមានផលប៉ះពាល់រយៈពេលវែងតិចតួចប៉ុណ្ណោះ បើធៀបជាមួយនឹងការព្យាបាលថ្នាំដទៃទៀតនាពេលបច្ចុប្បន្ននេះ។ អ្នកវិទ្យាសាស្ត្រ ក៏លើកឡើងដែរថា ថ្នាំនេះនឹងសង្គ្រោះជីវិតអ្នកជំងឺរាប់ពាន់នាក់ ពីផលរំខានរបស់ថ្នាំ ដោយសារតែថ្នាំនេះមិនមានឥទ្ធិពលប្រឆាំងនឹងកោសិកាដែលមានសុខភាពល្អនៅពេលព្យាបាលឡើយ។
អត្ថបទពាក់ព័ន្ធ៖
- ព្យាបាលមហារីក ប្រើថ្នាំពេទ្យផង ថ្នាំបុរាណផង បង្កគ្រោះថ្នាក់ខ្លាំង
- កូនក្មេងអាចកើតជំងឺមហារីកទេ?
- រោគសញ្ញានៃជំងឺមហារីកសុដន់ ដឹងកាន់តែលឿន ឱកាសនៃការព្យាបាលជាកាន់តែខ្ពស់
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយគ្រូពេទ្យជំនាញ។ Hello Health Group មិនចេញវេជ្ជបញ្ជា ធ្វើរោគវិនិច្ឆ័យ ឬព្យាបាលជូនទេ៕
Hello Health Group និង “Hello គ្រូពេទ្យ” មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
ផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្ម