ភាពសោកសៅច្បាស់ជាចៀសមិនផុតទេ ពេលមនុស្សជាទីស្រលាញ់ ឬសមាជិកគ្រួសារ ម៉ាក់ប៉ា អ៊ំៗ យើងមានជំងឺបេះដូង ត្រូវវះកាត់នោះ អារម្មណ៍នេះគ្រាន់តែគិតក៏ពិបាកចិត្តដែរ។ យ៉ាងណា គ្នាយើងត្រូវចាំថា អ្វីបម្រុងកើតគង់តែកើត អ្វីចាំបាច់ គួរត្រៀមខ្លួនបែបណាជួយពួកគាត់ក្រោយវះកាត់។ “Hello គ្រូពេទ្យ” ថ្ងៃនេះ នឹងប្រាប់វិធីសាស្ត្រពិសេសមួយចំនួនមើលថែមនុស្សជាទីស្រលាញ់ ជួយឲ្យមានសុខភាពល្អ និងបន្តជីវិតដោយសប្បាយរីករាយ។
១- ជួយការងារប្រចាំថ្ងៃ
គ្នាយើង និងសមាជិកគ្រួសារផ្សេងទៀតសុទ្ធតែមានការងារធ្វើផ្ទាល់ខ្លួនត្រូវធ្វើជាប្រចាំ ដោយឡែកសម្រាប់គ្នាយើងមានជំងឺ អាចធ្វើការងារដោយខ្លួនឯងត្រឹមមួយផ្នែកប៉ុណ្ណោះ មួយផ្នែកទៀត ច្បាស់ណាស់ត្រូវការពឹងពាក់អ្នកផ្សេង ទោះតិចក្តីច្រើនក្តី។ ហើយការងារប្រចាំថ្ងៃមួយចំនួន យើងគួរធ្វើជំនួសប្រពន្ធ ម៉ាក់ប៉ា បងប្អូន ទើបវះកាត់បេះដូងរួច មានដូចជា៖
– សម្អាតផ្ទះ
– រៀបចំថ្នាំ
– វាស់សីតុណ្ហភាព
– ទៅទិញម្ហូប ធ្វើម្ហូប
– ជួយជូនឡើងជណ្តើរ
– តាមដានសា្ថនភាពជំងឺ
– បើកបរជូនទៅណាទៅណី។
២- ជួយលើកទឹកចិត្ត
កម្លាំងចិត្ត ជាកត្តាសំខាន់បំផុត បំផុសឲ្យយើងចេះតស៊ូ ពុះពារឧបសគ្គ អំឡុងពេលនេះ យើងជាមនុស្សក្បែរខ្លួនសំខាន់បំផុតក្នុងគ្រួសារ អ្វីយើងគួរធ្វើរួមមាន៖
– លើកទឹកចិត្តមនុស្សជាទីស្រលាញ់ ម៉ាក់ប៉ា បងប្អូន មានទំនុកចិត្តលើខ្លួនឯងបន្តិចម្តងៗ។
– លើកទឹកចិត្ត និងជួយ (បើចាំបាច់) តឿនឲ្យហាត់ប្រាណស្រាលៗ ដូចជា ការងារក្នុងផ្ទះតិចតួច ជាដើម។ បែបនេះធ្វើឲ្យទាំងអស់គ្នាមានអារម្មណ៍ល្អ ទាំងផ្លូវកាយ និងផ្លូវចិត្ត។ បើបារម្ភថាការងារនោះធ្ងន់ពេក ត្រូវពិភាក្សាជាមួយពេទ្យសិន។
– ជូនទៅពេទ្យ អង្គុយជិត កត់ចំណុចសំខាន់ដែលគ្រូពេទ្យនិយាយ។ បែបនេះ មនុស្សជាទីស្រលាញ់របស់យើង នឹងគ្មានអារម្មណ៍ថាខ្លួនឯងឯកា អំឡុងពេលថែទាំសុខភាពនោះឡើយ។
៣- ថែខ្លួន
ចង់ជួយនរណាម្នាក់បាន ដរាបណាយើងអាចជួយខ្លួនឯងជាមុន។ រឿងនេះដូចគ្នា ការងារមើលថែអ្នកជំងឺបេះដូង អាចប៉ះពាល់ទាំងផ្លូវកាយ និងផ្លូវចិត្ត អ៊ីចឹងយើងខ្លួនឯងត្រូវមានសុខភាពល្អជាមុន ទើបអាចមើលថែទាំមនុស្សជាទីស្រលាញ់កាន់តែល្អ។ ខាងក្រោមនេះជាអ្វីយើងគួរធ្វើសម្រាប់ខ្លួនឯង៖
– ចេះស្វែងរកជំនួយ កុំទូលទំនួលខុសត្រូវតែម្នាក់ឯង ព្រោះនៅមានសាច់ញាតិបងប្អូនផ្សេងទៀត អាចជួយរំលែកការងារបាន ឬអាចសុំជំនួយពីគិលានុបដ្ឋាយិកាក៏បាន។
– មានពេលលំហែកាយ ព្រោះការងារនេះអាចធ្វើឲ្យយើងស្ត្រេសខ្លាំង ឆ្លៀតពេលខ្លះទៅធ្វើរឿងយើងចូលចិត្តក៏បាន។
– រកជំនួយផ្លូវចិត្ត ពេលណាយើងកំពុងប្រឈមអារម្មណ៍តានតឹង។ ព្រោះថា មើលថែអ្នកជំងឺបេះដូង គឺធ្វើឲ្យអារម្មណ៍យើងកាន់តែតានតឹង បើដឹងថាខ្លួនយើងមានបញ្ហា សូមទៅនិយាយជាមួយក្រុមគ្រួសារ ឬគ្រូពេទ្យឯកទេសផ្លូវចិត្តឲ្យបានឆាប់រហ័ស។
និយាយរួមទើបតែវះកាត់បេះដូង ពិតជាត្រូវការជំនួយពីគ្រួសារជាខ្លាំង អ៊ីចឹងសមាជិកគ្រួសារក៏ត្រូវពិគ្រោះជាមួយគ្រូពេទ្យ ឬអ្នកជំនាញដើម្បីទទួលបានការណែនាំពីរបៀបមើលថែឲ្យបានត្រឹមត្រូវ។
[embed-health-tool-heart-rate]
