ធ្លាប់ឆ្ងល់ទេថា បញ្ហាឈឺក្រពះ កើតមានច្រើនគួរឲ្យកត់សម្គាល់នៅលើមនុស្សសម័យនេះ បណ្តាលមកពីកត្តាអ្វីឲ្យប្រាកដ? អាចដោយសារការញ៉ាំអាហារមិនទៀងពេល ឬយ៉ាងណា? ទាក់ទងនឹងបញ្ហានេះ លោកសាស្ត្រាចារ្យមហាបរិញ្ញា អ៊ុង ចក្រាវុធ ឯកទេសជំងឺ ថ្លើម ក្រពះ ពោះវៀន បានណែនាំឲ្យដឹងពី កត្តាធំៗចំនួន៤ដែលបណ្តាលឲ្យងាយឈឺក្រពះ មានដូចជា៖

១.ប្រើប្រាស់ថ្នាំគ្មានវេជ្ជបញ្ជាត្រឹមត្រូវ

នៅពេលឈឺអ្វីមួយ មិនថា ផ្តាសាយ ឈឺឆ្អឹងឆ្អែងនោះទេ យើងតែងទៅឱសថស្ថានដើម្បីផ្សំថ្នាំលេប ដោយគ្មានវេជ្ជបញ្ជា។ លោកវេជ្ជបណ្ឌិត បានឲ្យដឹងថា ពេលដែលទៅផ្សំថ្នាំ ឱសថការីអាចផ្តល់ថ្នាំដើម្បីបំបាត់ការឈឺចាប់បាន តែផ្ទុយទៅវិញ ថ្នាំទាំងនោះអាចបណ្តាលឲ្យប៉ះពាល់ដល់ក្រពះ។

២.ផឹកគ្រឿងស្រវឹង

លោកវេជ្ជបណ្ឌិត ឲ្យដឹងថា តម្រូវការនៃការផឹកគ្រឿងស្រវឹង មានការកើនឡើងខ្លាំងមែនទែននៅក្នុងប្រទេសកម្ពុជាយើង។ សូម្បីតែនៅក្នុងឱកាសបុណ្យប្រពៃណីជាតិ ក៏មានការសេពគ្រឿងស្រវឹងដែរ។ នេះហើយ គឺជាកត្តាមួយដែលបណ្តាលឲ្យឈឺក្រពះ។ ក្មេងៗយុវវ័យសម័យនេះ ងាយនឹងឈឺក្រពះ ក៏ដោយសារតែការផឹកស្រាច្រើនដែរ ព្រោះឥលូវនេះ មិនថា ចាស់ ឬក្មេងទេ សុទ្ធតែចេះផឹកស្រា ដើម្បីបំពេញអារម្មណ៍សប្បាយមួយពេលៗ។

អត្ថបទពាក់ព័ន្ធ៖ ផឹករាល់ថ្ងៃប៉ះពាល់អីអត់? បើប៉ះកម្រិតណាដែរ ហើយមានបញ្ហាអ្វីខ្លះ?

៣.ជក់បារី

មានបញ្ហាឈឺក្រពះ ក៏អាចបណ្តាលមកពីការជក់បារីបានដែរ។ លោកវេជ្ជបណ្ឌិត បានបញ្ជាក់ថា “នៅពេលដែលយើងជក់បារី ឬផឹកស្រាតែឯងៗ វាធ្វើឲ្យយើងពុលល្មមៗ តែប្រសិនបើជក់ផង ផឹកផងក្នុងពេលតែមួយ វានឹងធ្វើឲ្យពុលក្រពះទ្វេដង។’

៤.ស្រេ្តសខ្លាំង

ក្នុងសង្គមមនុស្សសម័យសតវត្សទី២១នេះ ស្ទើរតែគ្រប់គ្នានៅលើពិភពលោកនេះ ទទួលរងប៉ះពាល់ពីកម្រិតនៃការកើតស្រេ្តស ដោយសារបញ្ហាជីវភាពរស់នៅ បញ្ហាការងារ ជាដើម។ ប្រសិនបើគ្មានការគ្រប់គ្រងត្រឹមត្រូវទេនោះ ការកើតស្រេ្តសអាចប៉ះពាល់ដល់សុខភាពច្រើន ប៉ុន្តែនៅក្នុងនោះដែរ វាក៏អាចប៉ះពាល់បណ្តាលឲ្យមានបញ្ហាក្រពះផងដែរ។

លោកវេជ្ជបណ្ឌិត អ៊ុង ចក្រាវុធ បានបញ្ជាក់ឲ្យដឹងថា បើប្រៀបធៀបនឹងជំនាន់មុនៗ កត្តាខាងលើនេះហើយដែលគួបផ្សំគ្នាបណ្តាលឲ្យយើងឆាប់រងបញ្ហាប៉ះពាល់ដល់សុខភាពក្រពះ។

អត្ថបទពាក់ព័ន្ធ៖

ពេលពោះទទេ ដាច់ខាតមិនគួរញ៉ាំអាហារទាំងនេះទេ
ផឹករាល់ថ្ងៃប៉ះពាល់អីអត់? បើប៉ះកម្រិតណាដែរ ហើយមានបញ្ហាអ្វីខ្លះ?
អាហារផ្អាប់ឱ្យជូរ គួរប្រយ័ត្ន ជាពិសេសចាស់ៗ និងអ្នកខ្សោយ
ចៀសបានប៉ុន្មានរឿងនេះ មិនព្រួយឈឺក្រពះ-ពោះវៀន
សញ្ញាសំខាន់ៗ បញ្ជាក់ថាយើងមានមេរោគក្នុងក្រពះ
ដំណឹងល្អ! វ៉ាក់សាំងរលាកក្រពះ ពោះវៀន កំពុងស្រាវជ្រាវផលិតហើយ
រឿងទាំងនេះ មិនគួរធ្វើទេ បើមិនទាន់ញ៉ាំអី (ពោះទទេ)
ផឹកកាហ្វេពេលព្រឹកទាំងពោះទទេ ប៉ះពាល់សុខភាពម៉េចខ្លះ?

ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕

កត្តាធំៗ៤នេះហើយ បណ្តាលឲ្យមនុស្សសម័យឥឡូវងាយឈឺក្រពះ