ស្រីៗយើងភាគច្រើនយល់ថា ការបង្ករោគនៅលើទ្វារមាស អាចកើតឡើងបាន លុះត្រាតែឆ្លងកាត់ការរួមភេទ។ ដើម្បីជម្រះមន្ទិលសង្ស័យនេះ “Hello គ្រូពេទ្យ” នឹងផ្ដល់ជាព័ត៌មានឲ្យកាន់តែច្បាស់ជុំវិញការបង្ករោគនៅលើទ្វារមាសចំពោះស្រីៗយើង។
១- ការបង្ករោគលើទ្វារមាស
រោគសញ្ញាបង្ករោគនៅលើទ្វារមាស មាន រមាស់ ក្ដៅ ព្រមទាំងឈឺចាប់ជុំវិញទ្វារមាស ឬធ្លាក់ស មានសភាពមិនប្រក្រតី។ បើសិនជាស្រីៗឧស្សាហ៍រួមភេទ ឬក៏ទើបនឹងរួមភេទរួចថ្មីៗ ហើយមានរោគសញ្ញាដូចខាងលើ នោះពិតជាប្រឈមខ្លាំងនឹងការឆ្លងជំងឺកាមរោគ។
ប៉ុន្តែ ការបង្ករោគនៅលើទ្វារមាស មិនបានកំណត់ថា អាចចម្លងបានតែចំពោះអ្នកឧស្សាហ៍រួមភេទនោះទេ សម្រាប់អ្នកដែលមិនរួមភេទ ក៏អាចកើតបានដែរ។ ត្រូវចាំថា ពេលមានរោគសញ្ញាដូចខាងលើ សូមប្រញាប់ទៅពេទ្យជំនាញ ដើម្បីការពារផលវិបាកនៃជំងឺនេះនៅថ្ងៃក្រោយ ព្រោះយើងអាចប្រឈមខ្ពស់នឹងឆ្លងរោគនៅលើទ្វារមាស។
២- ប្រភេទរោគនៅទ្វារមាស
– Bacterial vaginosis (BV)៖ ការបង្ករោគដោយបាក់តេរី កើតឡើងដោយសារការកកើតប្រភេទបាក់តេរីម្យ៉ាងនៅទ្វារមាស ហើយរោគសញ្ញាជំងឺនេះ រួមមាន ធុំក្លិនឆ្អាបចេញពីទ្វារមាស ធ្លាក់សច្រើនជាងធម្មតា ឬក៏រមាស់ជុំវិញទ្វារមាស។ ការបង្ករោគដោយបាក់តេរីនេះ អាចកើតឡើងលើអ្នកធ្លាប់រួមភេទ និងអ្នកអត់ធ្លាប់រួមភេទ។
– Yeast infections៖ ការបង្ករោគដោយផ្សិត កើតឡើងដោយសារការកកើតប្រភេទមេរោគផ្សិតម៉្យាងនៅលើទ្វារមាស ហើយរោគសញ្ញាជំងឺនេះ រួមមាន រលាកទ្វារមាសឡើងក្រហម ឬក៏ហើមទ្វារមាស ឈឺចាប់ពេលរួមភេទ ឬពេលនោម ធ្លាក់សខុសប្រក្រតី និងមានកន្ទួលរមាស់ជុំវិញទ្វារមាស។
៣- ធ្វើម៉េចទើបអាចកាត់បន្ថយហានិភ័យបាន?
– លាងសម្អាតទ្វារមាស និងរន្ធគូទឲ្យបានស្អាតជាប្រចាំ ព្រោះជាកាតព្វកិច្ចរបស់ស្រីៗគ្រប់រូប ដោយប្រើសាប៊ូដែលបានណែនាំត្រឹមត្រូវពីឱសថការី។ ត្រូវចាំថា រាល់ពេលចូលបន្ទប់ទឹក ត្រូវជូតសម្អាតកន្លែងសំខាន់ទាំងពីរនេះ ពីមុខទៅក្រោយ ហាមជូតសម្អាតពីក្រោយមកវិញ។
– រក្សាទ្វារមាសយើងឲ្យនៅសីតុណ្ហភាពត្រជាក់ និងមានផាសុកភាព។ កម្ដៅកាន់តែខ្ពស់ បាក់តេរីអាចកកើតកាន់តែច្រើន និងរស់នៅបានយ៉ាងសុខស្រួលនៅបរិស្ថានក្ដៅ ហើយសើម។ ចៀសវាងសម្លៀកបំពាក់គ្មានផាសុកភាព ដូចជា កំណាត់ផលិតពីសរសៃ rayon និងសរសៃ polyester។ សម្លៀកបំពាក់បែបនេះ អាចឃាំងកម្ដៅទុកនៅម្ដុំក្រលៀន។ ដូច្នេះ គួរពាក់ខោក្នុងទន់ និងផលិតពីកប្បាស។
– ចៀសវាងការពាក់ខោក្នុងសើម ព្រោះបាក់តេរីអាចកកើតបាននៅក្នុងមជ្ឈដ្ឋានទាំងពីរនេះ គឺក្ដៅ ហើយសើម។ គួរផ្លាស់ប្ដូរខោក្នុងស្ងួតថ្មី ជំនួសឲ្យខោក្នុងដែលពាក់ហែលទឹករួច។
– ផឹកទឹកឲ្យបានគ្រប់គ្រាន់។
– ប្ដូរខោក្នុងរៀងរាល់ថ្ងៃ ឬលើសម្ដង បើចាំបាច់ ឬបើបែកញើស។
បើសង្ស័យ ថាមិនស្រួល ឬមានការបង្ករោគនៅទ្វារមាស សូមប្រញាប់ទៅពិគ្រោះជាមួយគ្រូពេទ្យជំនាញឲ្យបានឆាប់រហ័ស ដើម្បីទទួលបានការធ្វើរោគវិនិច្ឆ័យ និងការព្យាបាលត្រឹមត្រូវ។ ចាំកាន់តែយូរ ស្ថានភាពក៏កាន់តែអាក្រក់ឡើងមិនខាន។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
[embed-health-tool-ovulation]
