បញ្ហាសុខភាពពាក់ព័ន្ធប្រដាប់ភេទ ស្រីៗកើតមានច្រើនជាងប្រុស ប៉ុន្តែដោយសារស្រីៗខ្មាសអៀនច្រើន អត់ហ៊ានសួរ ឬអត់ហ៊ានទៅពេទ្យ នាំឲ្យបញ្ហាកាន់តែធ្ងន់ធ្ងរ ពិសេសរឿងបញ្ហាក្លិនមិនល្អនៅប្រដាប់ភេទ ច្បាស់ជាកាន់តែខ្មាសមិនខាន។ កុំខ្មាសអៀនច្រើនពេក គិតគូរបញ្ហាសុខភាពយើងជារឿងចាំបាច់ អត្ថបទ “Hello គ្រូពេទ្យ’ នឹងលម្អិតពាក់ព័ន្ធមូលហេតុមួយចំនួន ធ្វើឲ្យប្រដាប់ភេទស្រីៗមានក្លិនមិនល្អ។
១- ក្លិនធម្មតារបស់ទ្វារមាស
– ក្លិនដូចមានជាតិលោហៈ (Metallic)៖ ក្លិនដូចជាតិលោហៈ ជាក្លិនធម្មតា និងកើតច្រើនជាងគេបន្ទាប់ពីមករដូវ ឬមានប៉ះពាល់ជាមួយទឹកកាម។ មូលហេតុទាំងពីរនេះ សុទ្ធតែអាចធ្វើឲ្យមានបម្រែបម្រួលកម្រិត pH នៅក្នុងទ្វារមាស ដោយអាចទៅជាកើនអាស៊ីដ ឬប្រែទៅជាក្លិនផ្សេងទៀត។ ក្នុងករណីនេះ ធ្វើឲ្យទ្វារមាសអ្នកមានក្លិនក្នុងរយៈពេលខ្លីតែប៉ុណ្ណោះ បើក្លិននៅបន្តមានយូរ បន្ទាប់ពីមករដូវរួច ហើយយើងមិនបានរួមភេទទេនោះ បូករួមជាមួយទ្វារមាសមានរមាស់ ឬធ្លាក់ស ត្រូវតែទៅពិគ្រោះជាមួយគ្រូពេទ្យទៅ។
– ក្លិនផ្សាដូចក្លិន (Musky)៖ ក្លិនបែប Musky គឺជាក្លិនខ្លាំងមួយ ជាងក្លិនធម្មតារបស់ទ្វារមាស អាចបណ្ដាលមកពីបែកញើសច្រើនពេក ស្លៀកខោរឹបពេក ឬស្លៀកខោមានសាច់កំណាត់ហប់ មិនអាចឲ្យខ្យល់ចេញចូលបានគ្រប់គ្រាន់។ យើងអាចលាងសម្អាតទ្វារមាស ជាមួយសាប៊ូស្រាលៗ និងប្ដូរខោខៅប៊យរឹបចេញ បើគិតថា ទ្វារមាសមានក្លិនខ្លាំងពេក។ ហើយក្លិនបែបនេះ គឺមិនបានបញ្ជាក់អំពីបញ្ហាសុខភាពណាមួយកើតឡើងនោះទេ។
២- ក្លិនដែលមិនមែនជាក្លិនធម្មតារបស់ទ្វារមាស
– ក្លិនឆ្អាប៖ នៅពេលទ្វារមាសមានធំក្លិនឆ្អាប នោះអាចបញ្ជាក់ថា ក្នុងខ្លួនយើងកំពុងមានបញ្ហាណាមួយកើតឡើងមិនខាន។ ក្លិនឆ្អាបនៅតំបន់សម្ងាត់ អាចបញ្ជាក់ពីជំងឺឆ្លងបាក់តេរីពីរប្រភេទ គេឧស្សាហ៍ឃើញកើតមានលើទ្វារមាសស្រីៗ មានបាក់តេរី Vaginosis និង Trichomoniasis។ បាក់តេរី Vaginosis ជាការឆ្លងរោគទាក់ទងជាមួយបញ្ហាអតុល្យភាពបាក់តេរីក្នុងទ្វារមាស វាមិនមែនជាជំងឺកាមរោគទេ ប៉ុន្តែអាចបង្កឡើងដោយការរួមភេទជាមួយដៃគូថ្មីដូចគ្នា។
– ក្លិនមេដំបែ ឬក្លិននំប៉័ង៖ ជាធម្មតាមេរោគផ្សិត មិនបង្កឲ្យមានក្លិនទេ ភាគច្រើនអាចដឹងបានដោយរោគសញ្ញា ដូចជា ធ្លាក់សក្រាស់ពណ៌ស និងរមាស់ខ្លាំង។ ប៉ុន្តែក្នុងករណីខ្លះ មេរោគផ្សិត អាចបង្កើតឲ្យមានក្លិនស្រដៀងនឹងនំប៉័ង ឬមានក្លិនដូចរបស់ផ្អាប់ទុកយូរ។ មានធំក្លិន មិនមែនជារោគសញ្ញាតែមួយគត់នៃការឆ្លងមេរោគផ្សិតឡើយ ប៉ុន្តែអាចជួយយើងឲ្យបែកចែក រវាងការបង្ករោគដោយបាក់តេរី និងមេរោគដទៃផ្សេងទៀត ដែលផ្ដល់ការរំខានដល់ទ្វារមាសយើង។
– ក្លិនស្អុយ៖ បើទ្វារមាសស្រាប់តែមានក្លិនស្អុយភ្លាមៗ ត្រូវប្រញាប់ទៅជួបគ្រូពេទ្យជំនាញជាបន្ទាន់ ព្រោះអាចបញ្ជាក់ថា ក្នុងខ្លួនអ្នកកំពុងតែមានបញ្ហាហើយ អាចជាសញ្ញារុលចូលរបស់សំឡីអនាម័យតាំប៉ុង (សំឡីអនាម័យញាត់ចូលទ្វារមាស) ចូលទៅក្នុងទ្វារមាស នៅពេលយើងមករដូវលើកចុងក្រោយ បញ្ហាអាចកើតឡើងជាញឹកញាប់ លើសពីអ្វីយើងធ្លាប់គិត។ គ្រូពេទ្យឯកទេសខាងរោគស្ត្រី គាត់មានជំនាញ យកសំឡីដែលយើងភ្លេចក្នុងទ្វារមាសរយៈពេលយូរចេញបានយ៉ាងស្ទាត់ជំនាញ ដូចនេះមិនចាំបាច់ត្រូវអៀនខ្មាស់អ្វីឡើយ។
អត្ថបទពាក់ព័ន្ធ៖
- មូលហេតុចម្បងនាំឲ្យមានបញ្ហារោគស្ត្រី ស្រីៗគួរតែដឹង
- បញ្ហាពាក់ព័ន្ធកន្លែងសម្ងាត់ ស្រីៗចង់ដឹងបំផុត តែអត់ហ៊ានសួរ
៣- មូលហេតុផ្សេងទៀតបង្កឲ្យទ្វារមាសមានក្លិន
– ខ្វះអនាម័យ៖ មនុស្សស្រីមានកន្លែងសម្ងាត់សាំញ៉ាំច្រើនណាស់ ហើយការសម្អាតកន្លែងទាំងអស់នោះ ក៏មិនមែនជារឿងងាយស្រួលដែរ។ ភាគច្រើន ការបង្កឲ្យមានក្លិននៅទ្វារមាស បណ្ដាលមកពីខ្វះទម្លាប់អនាម័យ ហេតុនេះត្រូវប្រាកដថា យើងបានលាងសម្អាតតំបន់ទាំងអស់នោះឲ្យបានត្រឹមត្រូវជារៀងរាល់ថ្ងៃ ដោយប្រើសាប៊ូដែលមានក្លិនស្រាល និងមិនមានជាតិកាត់។ ត្រូវសម្អាតទ្វារមាសបន្ទាប់ពីចេញពីបន្ទប់ទឹក ដោយសម្អាតពីខាងមុខទៅក្រោយ (សម្អាតផ្ទៃខាងក្រៅទ្វារមាស) ប៉ុន្តែមិនត្រូវសម្អាតដោយបាញ់ទឹកចូលទ្វារមាសជាដាច់ខាត ហើយត្រូវប្ដូរខោក្នុងជាប្រចាំ រៀងរាល់ថ្ងៃ ទោះបីជាមិនត្រូវងូតទឹកក៏ដោយ។
– បាក់តេរី vaginosis៖ បញ្ហាមួយនេះ កើតឡើងនៅពេលបាក់តេរីល្អក្នុងទ្វារមាសកើនឡើងហួសកម្រិត ហើយការធ្លាក់ស ជារោគសញ្ញាមួយបញ្ជាក់ពីបញ្ហានេះ ប៉ុន្តែក៏ធ្វើឲ្យទ្វារមាសមានក្លិនដូចគ្នា ប៉ុន្តែមានស្រីៗជាច្រើនមានបញ្ហានេះ តែមិនបង្ហាញរោគសញ្ញាអ្វីឡើយ។ យើងត្រូវទាត់ចោលការបង្ករោគដទៃផ្សេងទៀត មុនពេលព្យាបាលបាក់តេរី Vaginosis ខណៈការព្យាបាល មានដូចជា លាបជែល និងលេបថ្នាំផ្សះ។ ទោះបីការព្យាបាលបានជោគជ័យក្ដី ប៉ុន្តែបញ្ហាមួយនេះ នៅតែអាចកើតឡើងម្ដងទៀតនៅពេលក្រោយ។
– ជំងឺ Trichomoniasis៖ ជាជំងឺកាមរោគ បង្កឡើងដោយប៉ារ៉ាស៊ីត និងកើតទាំងមនុស្សប្រុស និងមនុស្សស្រី ដែលជាទូទៅ គ្នាយើងកើតបញ្ហានេះ មិនសូវមានរោគសញ្ញាអ្វីឡើយ ប៉ុន្តែមួយចំនួនអាចមានបញ្ហាធ្លាក់សតាមទ្វារមាស ឬរន្ធបង្ហូរនោម ដោយមានពណ៌បៃតង ឬមានពពុះ និងមានអាការៈផ្សាក្រហាយពេលនោម ឈឺចាប់ពេលរួមភេទ រមាស់នៅក្នុងតំបន់ប្រដាប់ភេទជាដើម។ រោគវិនិច្ឆ័យ ធ្វើឡើងដោយការវិភាគប៉ារ៉ាស៊ីតនៅតំបន់ប្រដាប់ភេទ ហើយគេប្រើថ្នាំផ្សះ ដើម្បីព្យាបាលការបង្ករោគ ខណៈបញ្ហាមួយ អាចកើតឡើងម្ដងទៀត បន្ទាប់ពីព្យាបាលរួច។
– មេរោគផ្សិតក្នុងទ្វារមាស៖ បញ្ហាមួយប្រភេទនេះ បង្កឡើងដោយមេរោគផ្សិតមួយប្រភេទ មានឈ្មោះថា Candida។ ការបង្ករោគនេះ ភាគច្រើន ធ្វើឲ្យមានក្ដៅ ឈឺ រមាស់ ធ្លាក់ស និងឈឺចាប់ពេលរួមភេទ។ មេរោគផ្សិត អាចឆ្លងរវាងមនុស្សប្រុសជាមួយមនុស្សស្រី ប៉ុន្តែគេអាចព្យាបាលដោយប្រើថ្នាំសម្លាប់រោគផ្សិត ដោយលាបនៅកន្លែងរលាក ឬលេបថ្នាំតាមមាត់។
– ជំងឺកាមរោគ៖ មេរោគប្រមេះ (Chlamydia) និង មេរោគស្វាយ (Gonorrhea) ជាមេរោគចម្បងនៃជំងឺកាមរោគ អាចធ្វើឲ្យមានក្លិនស្អុយនៅក្នុងទ្វារមាស។ មេរោគទាំងពីរ កើតឡើងច្រើនណាស់ប៉ុន្តែការព្យាបាលក៏ងាយស្រួលដូចគ្នា។ យ៉ាងណា អាចបង្កគ្រោះថ្នាក់ដល់សុខភាព បើមិនព្យាបាលត្រឹមត្រូវ។ ដោយសារតែអាចបញ្ចេញរោគសញ្ញា ឬមិនបង្ហាញឲ្យឃើញ ដូចនេះយើងអាចឆ្លងមេរោគពពួកនេះឡើង។ បើមានឈឺចាប់ពេលនោម ឬមានហូរខ្ទុះ គួរតែប្រញ៉ាប់ទៅជួបគ្រូពេទ្យឲ្យបានឆាប់រហ័ស ហើយដើម្បីការពារខ្លួនពីជំងឺមួយនេះ មិនត្រូវរួមភេទ ឬត្រូវប្រើប្រាស់ស្រោមអនាម័យគ្រប់ពេលរួមភេទ។
– ជំងឺរលាកអាងត្រគាក៖ ជំងឺរលាកអាងត្រគាក (PID) ជាជំងឺកាមរោគ ដូចពពួកមេរោគស្វាយ (Gonorrhea) ឬប្រមេះ (Chlamydia ) ដែរ។ ជាការរលាកនៅក្នុងស្បួន ដៃស្បូន អូវែ និងបំពង់ដៃស្បូនស្រីៗ ហើយរោគសញ្ញាជំងឺ មានដូចជា ក្ដៅខ្លួន ធ្លាក់ស ឈឺក្នុងពោះ ឬក្នុងតំបន់អាងត្រគាក ឈឺពេលរួមភេទ និងឈឺពេលនោម។ គេអាចព្យាបាលដោយប្រើថ្នាំផ្សះ ហើយបើមិនព្យាបាលត្រឹមត្រូវ អាចធ្វើឲ្យប៉ះពាល់ដល់សុខភាពធ្ងន់ធ្ង ដូចជា អត់អាចមានកូនជាដើម។
– ជំងឺមហារីកមាត់ស្បូន៖ មេរោគ HPV ជាមូលហេតុចម្បងនៃជំងឺ មហារីកមាត់ស្បូន។ ជំងឺមហារីក កើតឡើងនៅផ្នែងខាងក្រោមស្បូន ដែលជាកន្លែងភ្ជាប់គ្នារបស់ស្បូន និងទ្វារមាស។ រោគសញ្ញា ជំងឺមហារីកមាត់ស្បូន ក្នុងដំណាក់កាលធ្ងន់ធ្ងរ អាចមាន ហូរឈាមពេលរួមភេទ មានធ្លាក់សក្លិនអាក្រក់ពីក្នុងទ្វារមាស និងឈឺអាងត្រគាក។ យើងអាចប្រឈមកើតជំងឺមហារីកមាត់ស្បូនកាន់តែខ្ពស់ បើមានដៃគូររួមភេទច្រើន ឆាប់ប្រឡូកក្នុងការរួមភេទទាំងវ័យក្មេង មានប្រព័ន្ធការពារក្នុងខ្លួនខ្សោយ ជក់បារី ឬកើតជំងឺកាមរោគដទៃផ្សេងទៀត។ គេព្យាបាលជំងឺនេះទៅតាមដំណាក់កាលជំងឺ ដូចជា ការវះកាត់ បាញ់កាំរស្មី និងប្រើថ្នាំគីមី។
– ជំងឺមហារីកទ្វារមាស៖ ជំងឺមហារីកទ្វារមាសជាជំងឺកម្រកើតខ្លាំងណាស់ ភាគច្រើនគេឃើញវានៅលើកោសិកាផ្នែងខាងលើទ្វារមាស និងអាចព្យាបាលបានយ៉ាងងាយស្រួល សម្រាប់ដំណាក់កាលដំបូង។ ក្នុងដំណាក់កាលដំបូង យើងប្រហែលជាមិនអាចកត់សម្គាល់ឃើញរោគសញ្ញាជំងឺមួយនេះឡើយ។ នៅពេលកោសិកាវិវត្តទៅមុខ យើងនឹងចាប់ផ្ដើមមានហូរឈាមខុសធម្មតា ឈឺចាប់ពេលនោម ឈឺក្នុងត្រគាក និងទល់លាមក ហេតុនេះត្រូវប្រញ៉ាប់ទៅជួបគ្រូពេទ្យ បើប្រទះឃើញរោគសញ្ញាទាំងអស់នេះ។ គ្រូពេទ្យមិនទាន់ច្បាស់ថា តើអ្វីជាមូលហេតុជំងឺនេះនៅឡើយទេ ប៉ុន្តែវានឹងរាលដាលទៅមុខ បើព្យាបាលទាន់ពេលវេលា។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយគ្រូពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
[embed-health-tool-ovulation]
