បើនិយាយពីអនាម័យទ្វារមាសនារីមួយចំនួនប្រាកដជាជ្រើសរើសយកការប្រើទឹកអនាម័យមកជំនួស ដើម្បីបំបាត់បញ្ហាមួយចំនួនដូចជាធុំក្លិន និងរមាស់ជាដើម។ ប៉ុន្តែបើយោងតាមលោកស្រីវេជ្ជបណ្ឌិត ពឹង ជុតិមា នាយិកាសេវាកម្មគ្លីនិក រ៉ាក់ បានបញ្ជាក់ថា ទឹកអនាម័យគ្មានអ្វីពិសេសជាងទឹកធម្មតាឡើយ។
នាយិការូបនេះបានបន្តទៀតថា ការមានអនាម័យខ្លួនប្រាណស្ត្រីគ្មានអ្វីក្រៅពីងូតទឹក និងលាងសម្អាតជាមួយទឹកធម្មតានោះទេ។ ការប្រើទឹកអនាម័យច្រើនពេកមិនល្អចំពោះនារីទៅវិញទេ ដោយពេលខ្លះវាអាចបណ្ដាលឲ្យរលាក បាត់បង់បាក់តេរីល្អ ឬស្ងួតប្រដាប់ភេទទៅវិញ។ វេជ្ជបណ្ឌិតខាងលើក៏បានពន្យល់ពីវិធីធ្វើអនាម័យខ្លួនប្រាណ និងទ្វារមាសដោយមិនបាច់ពឹងផ្អែកលើទឹកអនាម័យ ដោយគ្រាន់តែងូតទឹក និងលាងសម្អាតធម្មតា ក្រោយបន្ទោបង់ត្រូវលាងសម្អាត ហើយក្រោយរួមភេទត្រូវទៅសម្អាត ព្រោះទឹកកាមបុរសអាចបង្កឲ្យមានក្លិន ប្រសិនបើមិនបានលាងសម្អាតត្រឹមត្រូវ។
