ក្រោយឈានចូលដល់វ័យ៦៥ឆ្នាំ ការថែទាំសុខភាពគឺជារឿងសំខាន់ណាស់ ពីព្រោះនៅវ័យនេះ សុខភាពរបស់យើងងាយនឹងមានការចុះខ្សោយ និងទ្រុឌទ្រោម ប្រសិនបើមិនមានការថែទាំឲ្យបានដិតដល់។ យ៉ាងណាមិញ យើងអាចអនុវត្តតិចនិកកំពូលៗទាំងនេះ ដើម្បីធានាថាយើងទទួលបានសុខភាពល្អ និងរាងកាយរឹងមាំ។

១. អនុវត្តតាមកាលវិភាគឲ្យបានខ្ជាប់ខ្ជួន

ទោះបីជាយើងមានពេលទំនេរច្រើនក៏ពិតមែន ប៉ុន្តែប្រសិនបើយើងមិនសូវធ្វើអ្វីសោះ យើងអាចនឹងមានអារម្មណ៍អសកម្ម និងខ្ជិលច្រអូស។ ដូច្នេះហើយ យើងគប្បីកំណត់កាលវិភាគប្រចាំថ្ងៃឲ្យបានច្បាស់លាស់ និងធ្វើសកម្មភាពផ្សេងៗដែលយើងចូលចិត្តទៅតាមកាលវិភាគនោះ។

២. ណាត់ជួបជាមួយនឹងគ្រូពេទ្យជាប្រចាំ

នៅពេលដែលយើងមានវ័យកាន់តែច្រើន យើងងាយនឹងកើតជំងឺជាក់លាក់មួយចំនួន ដូចជាជំងឺបេះដូង និងជំងឺចាស់វង្វាន់ (Alzheimer’s)។ យ៉ាងណាមិញ ប្រសិនបើយើងធ្វើការណាត់ជួបជាមួយនឹងគ្រូពេទ្យជាប្រចាំ យើងអាចនឹងដោះស្រាយបញ្ហាសុខភាពធ្ងន់ធ្ងរបានទាន់ពេលវេលា ក៏ដូចជារក្សាសុខភាពឲ្យនៅរឹងមាំល្អ។

៣. តាមដានមុខងាររាងកាយឲ្យបានដិតដល់

ចូរកត់សម្គាល់នូវអ្វីដែលមានភាពខុសប្លែក ព្រមទាំងទៅជួបជាមួយនឹងគ្រូពេទ្យភ្លាមៗ ប្រសិនបើយើងមានរោគសញ្ញាមិនប្រក្រតីណាមួយ ក៏ដូចជាអនុវត្តវិធានការសុខភាពដើម្បីការពារខ្លួនយើងឲ្យមានសុខភាពល្អ។

៤. ញ៉ាំអាហារសុខភាពជាទៀងទាត់

ជាមួយគ្នានេះដែរ ការញ៉ាំអាហារដែលមានគុណភាពខ្ពស់ មានសារសំខាន់ណាស់ក្នុងការថែរក្សាសុខភាពរបស់យើង ក្រោយឈានដល់អាយុ៦៥ឆ្នាំ។ អាហារដែលសំបូរទៅដោយសារធាតុចិញ្ចឹមដូចជាផ្លែឈើ បន្លែ និងប្រូតេអ៊ីនគ្មានខ្លាញ់ អាចផ្ដល់ថាមពលដល់យើង ព្រមទាំងកាត់បន្ថយហានិភ័យនៃការកើតជំងឺនានា។ នៅពេលដែលយើងមានអាយុច្រើន ផ្លែឈើស្រស់ និងបន្លែគឺជាអាហារដែលផ្ដល់ជាតិសរសៃខ្ពស់ដែលយើងត្រូវការជាចាំបាច់។

សុខភាពមនុស្សចាស់២

៥. ធ្វើលំហាត់ប្រាណសរសៃឈាមបេះដូងឲ្យបានទៀងទាត់

ការធ្វើលំហាត់ប្រាណជំនួយដល់សរសៃឈាមបេះដូង ដូចជាការដើរ រត់ ហែលទឹក។ល។ អាចបង្កើតចង្វាក់បេះដូង ព្រមទាំងជួយឲ្យយើងមានរាងកាយសមសួនផងដែរ ប៉ុន្តែយើងគប្បីរៀបចំកម្មវិធីហាត់ប្រាណប្រចាំសប្ដាហ៍ ទើបជាការប្រសើរ។

៦. ធ្វើតាមតម្រូវការរបស់រាងកាយ

ទន្ទឹមនឹងនេះដែរ យើងគប្បីស្ដាប់តាមតម្រូវការរបស់រាងកាយ និងអារម្មណ៍។ ប្រសិនបើយើងមានអារម្មណ៍ហត់នឿយ ឬមិនចង់ធ្វើលំហាត់ប្រាណ យើងគប្បីសម្រាកមួយថ្ងៃសិន ពីព្រោះវាគឺជាផ្នែកដ៏សំខាន់ដើម្បីឲ្យយើងមានសុខភាពល្អ និងមានភាពរីករាយ។ បន្ថែមពីនេះ ចូរគេងយ៉ាងហោចណាស់៧ទៅ៩ម៉ោងក្នុងមួយយប់ ទើបជាការប្រសើរ។

​បង្កើត​ទម្លាប់​ល្អ​ៗ​ ក្រោយ​វ័យ​៦៥​ឆ្នាំ​ ជាមួយ​នឹង​វិធីសាស្ត្រ​ទាំង​នេះ​​​​​​​​​​​​​​​​​​

១. ​អនុវត្ត​តាម​កាលវិភាគ​ឲ្យ​បាន​ខ្ជាប់ខ្ជួន​

២. ណាត់​ជួប​ជាមួយ​នឹង​គ្រូពេទ្យ​ជា​ប្រចាំ​

៣. តាមដាន​មុខងារ​រាងកាយ​ឲ្យ​បាន​ដិតដល់​

៤. ញ៉ាំ​អាហារ​សុខភាព​​ជា​ទៀងទាត់​

៥. ធ្វើ​លំហាត់​ប្រាណ​សរសៃ​ឈាម​បេះដូង​ឲ្យ​បាន​ទៀងទាត់​

៦. ធ្វើ​តាម​តម្រូវ​ការ​​របស់​រាងកាយ​

បង្កើតទម្លាប់ល្អៗ ក្រោយវ័យ៦៥ឆ្នាំ ជាមួយនឹងវិធីសាស្ត្រទាំងនេះ