home

តើអ្នកបារម្ភពីអ្វី?

close
មិនត្រឹមត្រូវ
ពិបាកយល់
ផ្សេងៗ

ឬ​ចម្លង​តំណភ្ជាប់

ចេះតិចនិកងាយៗទាំងនេះ ការពារកុំឱ្យប្រេះកែងជើង

ចេះតិចនិកងាយៗទាំងនេះ ការពារកុំឱ្យប្រេះកែងជើង

ការប្រេះកែងជើងធ្វើឱ្យយើងពាក់ស្បែកជើងមិនសូវស្អាត ហើយអាចធ្វើឱ្យយើង​ឈឺកែង​ជើង​ពេលឈរ ឬដើរ។ ជាងនេះទៅទៀត មេរោគអាចចូលតាមរយៈស្បែកដែលប្រេះ ហើយបង្ករោគដែលធ្វើឱ្យហើម ឬរលាកកែងជើង។ អ៊ឹចឹង​យើងគួរធ្វើបែបណាដើម្បីការពារជើងកុំឱ្យប្រេះ?

ខាងក្រោមនេះជាគន្លឹះថែរក្សាកែងជើងប្រចាំថ្ងៃកុំឱ្យប្រេះ៖

១. រក្សាកែងជើងឱ្យមានសំណើម

កែងជើងយើងប្រេះដោយសារស្បែកកែងជើងស្ងួតពេក ឬចុះខ្សោយ។ ដូច្នេះ​បន្ទាប់​ពី​ងូត​ទឹករួច ឬមុនពេលចូលគេងយើងត្រូវឧស្សាហ៍លាបក្រែម​ផ្តល់សំណើមនៅកែងជើង និងបាតជើង បន្ទាប់មកពាក់ស្រោមជើងដើម្បីរក្សាសំណើម។

២. ប្រើសាប៊ូមានកម្រិតខ្សោយ

យើងអាចកាត់បន្ថយមិនឱ្យស្បែកកែងជើងស្ងួតដោយប្រើសាប៊ូដែលមានកម្រិតខ្សោយសម្អាតបាតជើង និងកែងជើង ព្រោះសាប៊ូដែលមានកម្រិតកាត់ខ្លាំង អាចបំផ្លាញ​របាំង​ការពារ​ស្បែក និងបណ្តាលឱ្យស្បែកកែងជើង​បាត់បង់ជាតិទឹកធ្វើឱ្យស្បែកស្ងួត និង​ប្រេះ។

៣. ខាត់កែងជើង

យើងគួរខាត់កែងជើងយ៉ាងហោចណាស់ម្តងក្នុងមួយសប្តាស៍ដើម្បីឱ្យស្បែក​កែងជើងទន់ និងរលោង។ ដំបូង​យើងត្រូវលាយអំបិលបន្តិចក្នុងទឹកក្តៅឧណ្ហៗ រួចត្រាំជើង​ប្រហែល ១៥ នាទី​។ បន្ទាប់មកខាត់កែងជើងនឹងថ្ម​ខាត់កែងជើង​ ដើម្បីជម្រុះស្បែក​ងាប់​ចេញ និងចុងក្រោយ​លាប​ឡេផ្តល់សំណើម។

ខាត់កែងជើង

ចង់គណនា BMR ចុចទីនេះ!

៤. ពាក់ស្បែកជើងមានទំហំប៉ុនជើង

ការពាក់ស្បែកជើងដែលមានទំហំធំ ឬតូចជាងជើងក៏អាច​បណ្តាលឱ្យយើង​​ប្រេះ​កែង​ជើង​ដែរ ដោយសារស្បែកកែងជើងកកិតនឹងស្បែកជើង។ ដូច្នេះ យើងគួរពាក់ស្បែក​ជើងដែល​មាន​ទំហំប៉ុនជើង និងត្រូវជ្រើសរើស​ស្បែកជើងណា​ដែលអាចឱ្យខ្យល់​ចេញ​ចូ​លល្អ និងមិន​ធ្វើ​ឱ្យ​ជើង​ហប់។

លើសពីនេះ ដើម្បីការពារកុំឱ្យស្បែកកែងជើងក្រិន ពេលពាក់ស្បែកជើង​បិទជិតដូចជា ស្បែកជើងប៉ាតាជាដើម យើងគួរពាក់ស្រោមជើង​ដើម្បីការពារកែងជើងពីការកកិត​នឹង​ផ្ទៃខាងក្នុងរបស់ស្បែកជើង។

៥. រក្សាទម្ងន់

អ្នកដែលលើសទម្ងន់ ងាយនឹងក្រិន ហើយប្រេះកែងជើងណាស់ ដោយសារ​កែងជើង​ត្រូវ​រង​សម្ពាធខ្លាំងពីការទ្រទម្ងន់ ដែលធ្វើឱ្យស្បែក​កែង​ជើងក្រិន និងប្រេះ។ ដូច្នេះ​យើង​ត្រូវ​​រក្សា​ទម្ងន់កុំឱ្យធាត់​ដោយ​ញុំាអាហារដែលមាន​កាឡូរី​ទាប ខ្លាញ់​ទាប ស្ករទាប និង​ហាត់​ប្រាណ​ជាប្រចាំ។ ​ជាពិសេស​យើងត្រូវញុំាបន្លែ និង​ផ្លែឈើឱ្យបានច្រើន​ដើម្បី​ទទួល​បានជាតិសរសៃ វីតាមីន និង​សារធាតុចិញ្ចឹម​គ្រប់គ្រាន់។

៦. ញុំាទឹក

ការញុំាទឹកបានគ្រប់គ្រាន់ជួយឱ្យរាងកាយយើងមានសុខភាពល្អ ធ្វើឱ្យស្បែកមាន​សំណើម និងស្អាត។ លើសពីនេះទៅទៀត ទឹកជួយកម្ចាត់ជាតិពុលចេញពីស្បែក និង​ខ្លួនរបស់យើង ជួយបើករន្ធញើស និង​ជួយរក្សាភាពយឺតរបស់ស្បែក។

ប្រសិនបើយើងធ្វើការថែរក្សាកែងជើងជាប្រចាំ ហើយយើងនៅតែប្រេះ​កែងជើងទៀត យើងគួរទៅជួបពេទ្យសើស្បែក ព្រោះពេលខ្លះការប្រេះ​កែង​​ជើងអាច​បណ្តាលមកពីជំងឺ​សើស្បែកដូចជាជំងឺត្រអក ឬទឹកស៊ីជើង​ជាដើម។

Hello Health Group និង “Hello គ្រូពេទ្យ” មិន​ចេញ​វេជ្ជបញ្ជា មិន​ធ្វើ​រោគវិនិច្ឆ័យ ឬ​ព្យាបាល​ជូន​ទេ៕

ប្រភព

Mayo Clinic Q and A: Take steps at home to manage dry, cracked heels
https://newsnetwork.mayoclinic.org/discussion/mayo-clinic-q-and-a-take-steps-at-home-to-manage-dry-cracked-heels/

How to Prevent Cracked Heels
https://beauty.onehowto.com/article/how-to-prevent-cracked-heels-536.html

7 Possible Causes Of Cracked Heels
https://curejoy.com/content/causes-of-cracked-heels/

What Causes Cracked Dry Heels?
https://www.wise-geek.com/what-causes-cracked-dry-heels.htm

រូបថត​របស់​អ្នក​និពន្ធbadge
ដោយ សុខ វណ្ណ កែសម្រួល​ចុងក្រោយ 3 សប្ដាហ៍​កន្លងទៅ
ត្រួតពិនិត្យដោយ វេជ្ជ. ចាន់ ស៊ីណេត