ដើរលេងអ៊ុំទូករួច ស្រាប់តែស្បែករលាក នេះជាវិធីព្យាបាលពិសេស

គ្រាន់តែឮកម្តៅអាចឡើងពី ៤០-៤២ អង្សារ ម្នាក់ៗច្បាស់ជាគ្មានអារម្មណ៍ចង់ចេញក្រៅដើរលេងទេ ប៉ុន្តែដោយសាររដូវចូលឆ្នាំ ត្រូវទៅស្រុកជួបជុំបងប្អូន ក្តៅយ៉ាងណាក៏ត្រូវបង្ខំចិត្ត។ យើងគួរប្រយ័ត្នរឿងស្បែកយើង ទោះគេចមិនផុតពីការរលាកស្បែកដោយកម្តៅថ្ងៃក៏ដោយ។ នេះជាវិធីព្យាបាលពិសេស៖

១- រលាកស្បែកដោយសារកម្តៅថ្ងៃ

រលាកស្បែដោយកម្តៅថ្ងៃ សំដៅលើការរងការប៉ះពាល់ធ្ងន់ធ្ងរពីកាំរស្មីអ៊ុលត្រាវីយ៉ូឡេ ឬ UV ពីពន្លឺថ្ងៃ អាចបង្កឲ្យស្បែកហើម ក្រហម និងឈឺចាប់ នាំឲ្យខូចខាតកោសិកាស្បែកស្រទាប់ក្រៅ និងកោសិកាមេឡាណូស៊ីត ក៏ដូចជា ការបាត់បង់បណ្តោះអាសន្ននូវកោសិកាប្រព័ន្ធប្រសាទស្បែក (Langerhans) បង្កដោយកាំរស្មីជះឥទ្ធិពលលើប្រូតេអ៊ីន និងនុយក្លេអូប្រូតេអ៊ីនរបស់កោសិកា។

ខែក្តៅរាល់ឆ្នាំ មនុស្សរាប់លាននាក់ជុំវិញពិភពលោក រងការរលាកដោយកម្តៅថ្ងៃ ខណៈកាំរស្មី UV ក៏សែនក្តៅ គឺអាស្រ័យលើមុំ និងរយៈទទឹងព្រះអាទិត្យ ហើយហានិភ័យកាន់តែខ្ពស់ គឺនៅពេលទីតាំងព្រះអាទិត្យស្ថិតនៅចំពីលើយើងតែម្តង ពិសេសអំឡុងម៉ោង ១២-១៣ ថ្ងៃត្រង់។

ជាធម្មតា ព្រះអាទិត្យបញ្ចេញរលកពន្លឺ UV ចំនួន ៣ ប្រភេទ មាន UVC, UVB និង UVA ប៉ុន្តែកាំរស្មី UVC មិនអាចជះឥទ្ធិពលមកដល់ផែនដី ដោយសារត្រូវស្រទាប់អូហ្សូនស្រូបយក។ ទោះយ៉ាងនេះក្តី កាំរស្មីពីរប្រភេទផ្សេងទៀត មាន UVA និង UVB អាចឆ្លងកាត់ផុតបរិយាកាស ហើយថែមទាំងជះឥទ្ធិពលដល់ស្រទាប់ស្បែកយើង ទាំងខាងក្រៅ និងស្រទាប់ក្នុងទៀតផង។ កាំរស្មី UV ទាំងនេះ នឹងធ្វើឲ្យស្បែកចាស់មុនកាលកំណត់ ប្រែជាជ្រីវជ្រួញ ប៉ះពាល់គំហើញ និងឈានទៅបង្កជាមហារីកស្បែកទៀតផង។

វិធីព្យាបាលរលាកដោយកម្តៅថ្ងៃ

ការរលាកដោយកម្តៅថ្ងៃ អាស្រ័យលើប្រភេទស្បែក ពន្លឺរបស់ព្រះអាទិត្យ និងរយៈពេលយើងទទួលរងកាំរស្មី។ បើយើងឲ្យស្បែករងប៉ះពាល់ក្រោមពន្លឺព្រះអាទិត្យហួសហេតុ ឱកាសរបកស្បែកកាន់តែខ្ពស់។ យ៉ាងណា ស្បែកយើងនឹងជាសះស្បើយដោយខ្លួនឯង ក្រោយរបក ដោយកោសិកាងាប់ទាំងនោះ ប៉ុន្តែអាចបង្កជាស្នាម ករណីខ្លះអាចបង្កជាមហារីកទៀតផង។ ដើម្បីចៀសវាងហានិភ័យទាំងនេះ យើងគប្បីត្រូវដឹងពីវិធីព្យាបាលមានប្រសិទ្ធភាពមួយចំនួន។

អត្ថបទពាក់ព័ន្ធ៖

ក្តៅចង់ឆេះអ៊ីចឹង ថែស្បែកម៉េចកុំឲ្យខ្មៅ ខ្លោច?
អ្នកជំនាញប្រាប់វិធីការពារ ខ្យល់គរ និងសន្លប់ ពេលអាកាសធាតុកាន់តែក្តៅខ្លាំង

២- វិធីព្យាបាលបែបសាមញ្ញៗ

– ប្រើជាតិទឹក៖ ពេលយើងរលាកដោយកម្តៅថ្ងៃ ស្បែកនឹងចាប់ផ្តើមរបកនៅប៉ុន្មានថ្ងៃក្រោយ។ ការរបកនេះ នឹងឈប់ នៅពេលស្បែកជាសះស្បើយ ហើយវិលត្រលប់ទៅកាន់ភាពដើមពេញលេញទាំងស្រុង។ យ៉ាងណា ដើម្បីកាត់បន្ថយហានិភ័យបន្សល់ស្នាមលើស្បែក មួយក្នុងចំណោមវិធីដើម្បីព្យាបាលស្បែករបក គឺផឹកទឹកឲ្យបានច្រើន ដើម្បីជួយសែ្បកមានសំណើម ឆាប់ជាសះស្បើយ ដោយយើងបានបង្គ្រប់ជាតិទឹកដែលស្បែកត្រូវការ។

– ក្រមួន ក្រែម៖ យើងអាចលាបផលិតផលផ្តល់សំណើម ដូចជា ចាហួយចម្រាញ់ពីប្រទាលកន្ទុយក្រពើ ឬក្រែម ក្រមួន (Vaseline ឬ Petroleum Jelly) ដើម្បីផ្តល់សំណើមឲ្យស្បែក។

– ងូតទឹកក្តៅ៖ ងូតទឹកក្តៅឧណ្ហៗ ក៏ជួយបានដូចគ្នា អាចជួយឲ្យកោសិកាស្បែកដែលងាប់ ងាយរបកអស់ ប៉ុន្តែត្រូវថ្នមដៃ ពេលសម្អាតកោសិកាស្បែកងាប់ទាំងនោះ ព្រោះស្បែកថ្មី មានសភាពស្បែក ហើយទន់ មិនទាន់រឹងមាំ។

– ស្អំស្បៃត្រជាក់៖ វិធីផ្សេងទៀត ព្យាបាលបញ្ហារបកស្បែកដោយសារកាំរស្មី UV អាចស្អំដោយស្បៃត្រជាក់។ យើងអាចដាក់ស្បៃត្រជាក់ និងសើមនៅលើស្បែករបក ឲ្យបាន ២០-៣០ នាទី ដើម្បីសម្រាលការរលាក។ ចៀសវាងដាក់ស្អំទឹកកកដោយផ្ទាល់ទៅលើផ្ទៃស្បែក ព្រោះអាចបណ្តាលឲ្យស្បែកឈឺក្រហាយ។

– ស្លៀកពាក់ជិតៗ៖ អ្នកជំនាញណែនាំថា អាចគ្របស្បែកកំពុងរបក ឬស្នាមស្បែកឲ្យត្រលប់ដូចដើមវិញបាន ដោយប្រើសម្លៀកបំពាក់ណាមួយ ឬលាបឡេការពារកម្តៅថ្ងៃ មានសមត្ថភាពការពារកម្តៅថ្ងៃ (SPF) ៤៥ ឬខ្ពស់ជាងនេះ ដើម្បីចៀសវាងការខូចខាតបន្ថែមទៀតដោយសារកម្តៅព្រះអាទិត្យ។

– ផលិតផលផ្តល់សំណើម៖ ករណីស្បែករលាកថ្ងៃរបកទាំងអស់តែម្តង គេណែនាំឲ្យលាបផលិតផលផ្តល់សំណើម ដែលមានបរិមាណអាស៊ីដអាល់ហ្វាហាយដ្រុកស៊ី បន្តិចបន្តួច។ ផលិតផលទាំងនោះ នឹងជួយសកជម្រុះចោលស្បែកងាប់ នឹងមិនធ្វើឲ្យប៉ះពាល់កោសិកាស្បែកថ្មីឡើយ។

៣- ការពារ ប្រសើរជាងព្យាបាល

ដូចពាក្យចាស់លើកឡើង “ការពារ ប្រសើរជាងព្យាបាល” ហេតុនេះព្យាយាមចៀសឆ្ងាយពីកាំរស្មីព្រះអាទិត្យផ្ទាល់ ជាពិសេសនៅពេលព្រះអាទិត្យកំពុងរះឡើងខ្ពស់ ប៉ុន្តែបើមិនអាចចៀសរួច ត្រូវពាក់សម្លៀកបំពាក់ការពារថ្ងៃ គ្របដណ្តប់ផ្ទៃស្បែកឲ្យបានគ្រប់តំបន់ទាំងអស់។

លាបឡេការពារកម្តៅថ្ងៃដែលមាន SPF ចំនួន ៣០ ឬខ្ពស់ជាងនេះ ប្រមាណ ៣០នាទី មុនពេលទៅក្រៅ អាចការពារស្បែកអ្នកពីកាំរស្មី UVA និង UVB ខណៈមួក និងវ៉ែនតា ក៏សំខាន់ដូចគ្នា អាចការពារស្បែកមុខ និងភ្នែកកុំឲ្យខូចខាតដោយសារកាំរស្មី។

ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬការព្យាបាលជូនទេ៕

ត្រួតពិនិត្យដោយ

វេជ្ជ. ចាន់ ស៊ីណេត

ឯកទេសសម្ភព និងរោគស្ត្រី · មន្ទីរពេទ្យបង្អែកមិត្តភាពកម្ពុជា-ចិន សែនសុខ

អត្ថបទដោយ Meng Vatana · កែ 08/11/2024

ដើរលេងអ៊ុំទូករួច ស្រាប់តែស្បែករលាក នេះ​ជា​វិធី​ព្យាបាល​ពិសេស

ដើរលេងអ៊ុំទូករួច ស្រាប់តែស្បែករលាក នេះជាវិធីព្យាបាលពិសេស