ចំពោះប៉ាម៉ាក់គ្រប់រូបសុទ្ធតែមានតិចនិកក្នុងការចិញ្ចឹមបីបាច់កូនទៅតាមអ្វីដែលខ្លួនគិតថាត្រូវ រៀងៗខ្លួន ដោយខ្លះមិនប្រើហឹង្សា ខ្លះទៀតនិយមវាយកូន ព្រោះខ្លាចកូនខូច។ល។ ប៉ុន្តែបើតាមអ្នកជំនាញ នៅក្នុងសតវត្សទី ២១ នេះ ក្បួនចិញ្ចឹមកូនដែលម៉ាក់ប៉ាធ្វើរាល់ថ្ងៃ អាចមិនមែនតិចនិកល្អសម្រាប់ចិញ្ចឹមក្នុងសម័យទំនើបនេះទេ។
ជុំវិញបញ្ហាចិញ្ចឹមកូនក្នុងសម័យថ្មីនេះ លោកស្រី សរ ម៉ុន្ថា នាយិការ សាលាអប់រំកុមារតូច ស៊ីជីដា កម្ពុជា បានឲ្យដឹងថា ម៉ាក់ប៉ាត្រូវមើលទៅតាមនិន្នាការនាពេលអនាគតថាតើ នៅពេលអនាគតនឹងរីកចម្រើនផ្នែកណា ជំនាញអ្វីដែលសង្គមត្រូវការ ដើម្បីឲ្យយើងចាប់ផ្ដើមជួយតម្រង់កូនយើង លូតលាស់ដោយភាពឆ្លាតវ័យ ចូលក្នុងសង្គមចុះ និងអាចចូលរួមប្រកួតប្រជែងនៅលើទីផ្សារនៅថ្ងៃខាងមុខបាន។
ចុះសម្រាប់កូនលូតលាស់ល្អក្នុងសម័យថ្មីនេះ ម៉ាក់ប៉ាគួរជួយកូនបែបណា?
បើតាមតិចនិកចិញ្ចឹមកូនសម័យទំនើបនេះ ម៉ាក់ប៉ាអាចជួយកូនបានតាមរយៈ៖
ទី១. ជួយបណ្ដុះភាពច្នៃប្រឌិតរបស់កូន តាមរយៈការអប់រំផ្សេងៗ ដើម្បីឲ្យកូនមានការស្រមើស្រមៃច្រើន។
ទី២. កូនពូកែខាងទំនាក់ទំនង៖ កូនៗគួរមានជំនាញធ្វើការជាមួយមនុស្ស ឬចេះចូលចំណោមជាមួយអ្នកដទៃ និងចេះប្រើអ្នកបច្ចេកទេសធ្វើការឲ្យខ្លួនបាន។
ទី៣. បង្រៀនកូនឲ្យចេញគិតល្អិតល្អន់៖ ទាំងខ្លួនឯង និងមនុស្សជាតិ។ មានន័យថា នៅពេលធ្វើអ្វីមួយ កូនៗចេះគិតពីប្រយោជន៍ខ្លួនឯង និងប្រយោជន៍រួមសម្រាប់អ្នកដទៃដែរ មិនមែនគិតតែខ្លួនឯងម្នាក់នោះទេ។
“ការអប់រំដែលម៉ាក់ប៉ាគួរយកចិត្តទុកដាក់ ជាការអប់រំជួយកូនៗឲ្យរីកចម្រើនទាំងផ្នែក IQ និង EQ។ IQ គឺជាភាពវ័យឆ្លាតខាងប្រាជ្ញា ចំណែក EQ ជាភាពវ័យឆ្លាតខាងអារម្មណ៍។ សម្រាប់ភាពជោគជ័យរបស់កូននៅថ្ងៃអនាគត យើងជាម៉ាក់ប៉ា ត្រូវខំប្រឹងឲ្យកូនរីកចម្រើនទាំងពីរផ្នែកនេះឲ្យដើរទន្ទឹមគ្នា។ “
លោកស្រីបញ្ជាក់ថា សព្វថ្ងៃម៉ាក់ប៉ាច្រើន ផ្ដោតតែលើចំណេះដឹងរបស់កូនទេ ប៉ុន្តែសម្រាប់ការអប់រំកូនក្នុងសតវត្សទី ២១ នេះ មិនមែនផ្ដោតលើតែចំណេះដឹងតែមួយមុខទេ។ ម៉ាក់ប៉ាត្រូវផ្ដល់ឲ្យកូនលើសពីនេះទៀត ដើម្បីលូតលាស់នៅថ្ងៃអនាគត។
[embed-health-tool-vaccination-tool]
