ករណីកូនបៅទឹកដោះគោម្សៅម៉ាក និងលេខតែមួយតាំងពីដើមមក បែរជាបៅលែងត្រូវនៅអំឡុងពេលណាមួយទៅវិញ រហូតម៉ាក់ប៉ាព្យាយាមស្វែងរកម៉ាកទឹកដោះគោផ្សេង។ លោកវេជ្ជបណ្ឌិត ហ៊ាង រតនា ឯកទេសទូទៅបានឲ្យដឹងថា ករណីបែបនេះលោកជួបច្រើនមកហើយ ដោយអាការៈដែលអាណាព្យាបាលតែងលើកឡើងមានដូចជា៖
– បៅមិនសូវឡើងគីឡូ
– ទល់លាមក
– រាករូស
– ក្អួតចង្អោរ
វេជ្ជបណ្ឌិតរូបនោះបានបន្តថា ករណីទារកទើបកើតរហូតដល់ ១០ ខែ ឬ ១ ឆ្នាំគីឡូឡើងលឿនណាស់ ហើយបន្ទាប់ពីចូលដល់វ័យនោះកូនក្មេងលែងសូវឡើងគីឡូតទៅទៀតហើយ។ លោកបន្ថែមទៀតថាជាទូទៅក្មេងចាប់ពីកើតដល់ ៤ ខែ ជាមធ្យមមួយសប្ដាហ៍ឡើង ២០០-៣០០ ក្រាម ដូចនេះពេលកូនធំដល់វ័យ ១ ឆ្នាំគីឡូឡើងកាន់តែយឺតទៅៗ។ ព្រោះតែបែបនេះហើយ ទើបពួកគាត់សន្និដ្ឋានថា កូនបៅទឹកដោះគោប្រភេទតែមួយ លេខតែមួយនោះលែងត្រូវតទៅទៀត តែតាមពិតនោះគឺជាធម្មជាតិរបស់ក្មេងប៉ុណ្ណោះ។
ចំណែកករណីមានរាករូស ក្អួតចង្អោរ ទល់លាមកវិញ មកពីជំងឺ ការបង្ករោគ ឬរលាកក្រពះពោះវៀនដោយខ្លួនឯងទៅវិញទេ។ ជាចុងក្រោយលោកណែនាំឲ្យម៉ាក់ប៉ានាំកូនទៅជួបជាមួយគ្រូពេទ្យ ដើម្បីស្វែងរកមូលហេតុពិតប្រាកដ ជាជាងសន្និដ្ឋាន និងបញ្ច្រកថ្នាំកូនដោយចិត្តឯង។
[embed-health-tool-vaccination-tool]
