កូនបៅទឹកដោះគោមិនត្រឹមមិនសូវល្អ និងនាំឲ្យកូនឈឺច្រើនដូចទឹកដោះម្ដាយប៉ុណ្ណោះទេ ថែមទាំងពិបាកក្នុងការលាងសម្អាតទៀតផង ដោយដបមួយចំនួនប្រើហើយមានក្លិនផ្អូមជាប់ដប ទោះជាបានលាងសម្អាតជាមួយសាប៊ូ និងទឹកក្ដៅហើយក៏ដោយ។

ចំពោះបញ្ហានេះវេជ្ជបណ្ឌិត ហ៊ាង រតនា បានឲ្យដឹងថា មានទារកជាច្រើនកើតជំងឺផ្សេងៗដោយសារតែការលាងសម្អាតដបទឹកដោះគោនេះ។ លោកបានបន្ថែមទៀត ការលាងសម្អាតមិនមែនលាងឲ្យតែរួចពីដៃដូចរបស់របរមនុស្សធំប្រើប្រាស់ឡើយ ព្រោះកូនក្មេងប្រព័ន្ធភាពស៊ាំសម្រាប់ការពាររាងកាយមិនទាន់រឹងមាំល្អ កាលណាតែដបមានក្លិនជូរផ្អូម ទារកអាចនឹងរាករូស ហើមពោះភ្លែត។

វេជ្ជបណ្ឌិតឯកទេសជំងឺទូទៅរូបនោះបញ្ជាក់ទៀតថា ការលាងសម្អាតដបត្រូវលាងទាំងបាត កដប កៀនដបខាងក្រៅ ក្បាលដប និងក្បាលដោះកូនបៅ សុទ្ធតែត្រូវការឧបករណ៍តូចផ្សេងៗគ្នា ទើបស៊ីទៅនឹងទំហំ អាចសម្អាតបានស្អាតល្អ និងមិននាំបញ្ហាដល់កូន។ កាលណាលាងមិនស្អាតធ្វើឲ្យបាក់តេរី ផ្សិត ឬវីរុសទៅបម្លែង និងបង្កជាក្លិនជូរ ផ្អូម។ មួយវិញទៀតការដែលបំបៅរួច ទុកដបផ្អាប់ចោលរាប់ម៉ោងមិនលាងភ្លាមៗ ជាហេតុនាំឲ្យបាក់តេរី ផ្សិត វីរុស អស់ទាំងនោះរស់នៅបានយូរ និងធន់ទៅវិញ ហើយពេលលាងគ្មានភាពផ្ចិតផ្ចង់ ទើបបានជាដបមិនស្អាត និងជាមូលហេតុនាំឲ្យកូនឈឺ។

លោកបញ្ជាក់ទៀតថា អាណាព្យាបាលភាគច្រើននិយាយថាបានលាងសម្អាតដបយ៉ាងស្អាតហើយ តែនៅតែផ្អូម ប៉ុន្តែការពិតលាងមិនស្អាតល្អគ្រប់គន្លាក់គន្លើន។ វេជ្ជបណ្ឌិតខាងលើណែនាំឲ្យយកចិត្តទុកដាក់ពីរបៀបលាងដុសម្ដងទៀត ទើបកូនគ្មានបញ្ហាឈឺពោះ រាករូស ហើមពោះអស់ទាំងនោះ ដោយអនុវត្តដូចខាងក្រោម៖

– ចាក់ទឹកដោះគោចាស់ចោល ហើយក្រឡុកឲ្យអស់ទឹកដោះគោសិន

– ដោះក្បាលដោះជ័រចេញពីគម្រប និងលាងម្ដងមួយៗ

– ប្រើសាប៊ូលាងសម្រាប់លាងដបទឹកដោះគោ ទើបអាចជម្រះសារធាតុខ្លាញ់

– ក្រោយលាងសម្អាតស្នាមប្រឡាក់ និងទឹកដោះគោជាមួយសាប៊ូ ត្រូវត្រាំរួចក្រឡុកដបទឹកដោះគោជាមួយនឹងទឹកក្ដៅឧណ្ហៗ

– ក្រោយចាក់ចោលទឹកក្ដៅឧណ្ហៗ ត្រូវរលាស់ទឹកឲ្យអស់ ហើយហិត បើនៅធុំក្លិនត្រូវលាងឡើងវិញ

– រួចយកទៅផ្កាប់ក្នុងប្រអប់បិតជិត កុំឲ្យមានធូលី និងសត្វទំលើ

– ទុកដបឲ្យស្ងួតសិន ចាំយកទៅឲ្យកូនបៅ

– ត្រូវចេះផ្លាស់ប្ដូរដបទឹកដោះគោតាមការកំណត់ ឬមុន

– ត្រូវចេះជ្រើសរើសផលិតផលមានគុណភាពខ្ពស់

– ត្រូវមានដបច្រើន សម្រាប់ផ្លាស់ប្ដូរ។

ក្រៅពីការលាងសម្អាតមិនល្អ ដបដែលគ្មានគុណភាព និងស្ដង់ដារត្រឹមត្រូវ ទោះជាលាងបែបណាក៏នៅមានធុំក្លិនជ័រចេញពីដបនោះដែរ។

ម៉េចដបទឹកដោះគោខ្លះ ប្រើរួចមានក្លិនជូរផ្អូម ទោះលាង-ស្រុះទឹកក្ដៅហើយក៏ដោយ?