ក្មេងៗមួយចំនួនពេលបៅរួច មិនព្រមឲ្យដកដបទឹកដោះគោចេញនោះទេ នៅបៀមជញ្ជក់ទាល់តែដេកលក់ ខ្លះដេកលក់ហើយមិនព្រមឲ្យដកចេញទៀត។ កាលបើម៉ាក់ៗទម្លាប់ឲ្យបៀមដបទឹកដោះបែបនេះ មិនល្អនោះទេ លោកវេជ្ជបណ្ឌិត អ៊ុន យូ បម្រើការងារនៅមន្ទីរពេទ្យកុមារជាតិ ផ្នែកប្រដាប់រំលាយអាហារ អះអាងថា បញ្ហាប្រឈមធំ ២យ៉ាង ដែលក្មេងជួបញឹកញាប់នោះ គឺខូចធ្មេញ និងរលាកបំពង់ក។

“បើសិនជាកូនគាត់ម៉ឹមម្សៅទឹកដោះគោរួចហើយ គាត់អត់ព្រមសម្អាតឲ្យកូន ពេលដែលញ៉ាំហើយក្មេងចូលចិត្តបៀមដបទឹកដោះគោហ្នឹង សូម្បីតែយប់ឡើងគាត់ឲ្យបៅទឹកដោះគោ ជួនកាលកូនគាត់បៅអត់អស់ ឲ្យកូននៅបៀមដប ទី១ ធ្មេញក៏ខូច ទី២ អាចឲ្យរលាកបំពង់ក”។

លោកវេជ្ជបណ្ឌិតថា បញ្ហាខូចធ្មេញបណ្តាលមកពីការបៀមដបទឹកដោះគោនៅជាប់នឹងមាត់រហូតនេះ អាចឲ្យធ្មេញកូនខូចខ្លាំងជាងការញ៉ាំស្ករកៅស៊ូ ឬស្ករគ្រាប់ទៀត។

ចំណែកការបៀមដបទឹកដោះគោយូរអាចឲ្យរលាកបំពង់កនោះ នាយករងមន្ទីរសម្រាកព្យាបាល Maxicare រូបនេះ ពន្យល់ថា មេរោគរលាកបំពង់កកើតឡើងដោយសារមានចំណីអាហារនៅជាប់នឹងបំពង់ករហូត ធ្វើឲ្យមេរោគងាយកកើត មានន័យថា ទឹកដោះគោនៅដក់នៅបំពង់ក្មេងរយៈពេលយូរតាមការបឺតជញ្ជក់ដបទឹកដោះគោ។

ក្រៅពីទម្លាប់បៀមដបទឹកដោះគោ ក្មេងៗដែលចូលចិត្តញ៉ាំចំណីអាហារ-ភេសជ្ជៈផ្អែមៗ រួមទាំងអាហារមានជាតិខ្លាញ់ ហើយមិនបានញ៉ាំទឹកតាមក្រោយ ក៏ងាយនឹងរលាកបំពង់កដែរ។

បៅរួច ទម្លាប់ឲ្យកូនបៀមដបទឹកដោះ អាចប្រឈមបញ្ហាធំ ២ យ៉ាង