យើងជាម៉ាក់ប៉ាត្រូវដឹងថា ទារកតូចៗដែលទើបកើតមកទាំងរាងកាយ និងសរីរាង្គ គឺនៅខ្ចីនៅឡើយ។ ជួនកាល ទោះបៅដោះម្ដាយ ឬបៅទឹកដោះគោ អាអូនងាយនឹងប្រឈមបញ្ហារាក ឬទល់លាមកជាដើម តែបើទារកតូច មិនទាន់គ្រប់៦ខែ ពេលទល់លាមក យើងអាចឲ្យញ៉ាំទឹកក្រូចបន្តិច ដើម្បីសម្រួលដល់អាអូនទេ?
កូនអាយុក្រោម ៦ ខែ ឲ្យញ៉ាំទឹកក្រូចច្របាច់ពេលទល់លាមកបានអត់?
ត្រួតពិនិត្យដោយ វេជ្ជ. ចាន់ ស៊ីណេត · មន្ទីរពេទ្យបង្អែកមិត្តភាពកម្ពុជា-ចិន សែនសុខ
ជាធម្មតា ទារកដែលមិនទាន់គ្រប់៦ខែ ពេទ្យមិនណែនាំឲ្យអាអូនញ៉ាំអ្វីផ្សេង ក្រៅពីបៅទឹកដោះម្ដាយ ឬទឹកដោះគោទេ ព្រោះប្រព័ន្ធរំលាយអាហារទារកនៅខ្ចី។ នេះបើតាមការបកស្រាយរបស់លោកវេជ្ជបណ្ឌិត ឃួន សុវណ្ណារិទ្ធ ឯកទេសផ្នែកសម្ភព និងរោគស្រ្តី។
ផ្ទុយទៅវិញ ក្នុងករណីដែលអាអូនមានបញ្ហាទល់លាមក យើងត្រូវមើលទៅតាមទារកថាតើអាអូនបៅដោះម្ដាយសុទ្ធ ឬបៅទឹកដោះគោ។ ម៉្យាងវិញទៀត ម៉ាក់ប៉ាត្រូវប្រាកដថា អាអូនមានបញ្ហាទល់លាមកមែន ឬគ្រាន់តែពិបាកជុះចេញមក។ បើអាអូនធ្លាប់បៅទឹកដោះគោ ឬទឹកដោះពពែ ក្រៅពីទឹកដោះម្ដាយ ហើយកូនមានបញ្ហាទល់លាមក យើងអាចឲ្យអាអូនញ៉ាំទឹកក្រូចច្របាច់ ឬទឹកក្រូចពោធិ៍សាត់អ៊ីនឹងបាន ដោយត្រូវបន្តក់តិចៗឲ្យអាអូនញ៉ាំ ឬអាចឲ្យអាអូនញ៉ាំពី១-២ស្លាបព្រាកាហ្វេបាន ដើម្បីជួយសម្រួលអាការៈអាអូន។
ប្រសិនបើអាអូនបៅដោះម្ដាយសុទ្ធមិនមានលាយឡំជាមួយទឹកដោះគោទេ ពេទ្យមិនណែនាំឲ្យផ្ដល់ទឹកក្រូច ឬអ្វីផ្សេងឲ្យអាអូនញ៉ាំទេ ក្រៅពីទឹកដោះម្ដាយ ពោលគឺថា បើអាអូនបៅដោះម្ដាយក្ដៀន ពេទ្យអាចប្រាប់ឲ្យម៉ាក់ៗបន្តបំបៅដោះកូន រហូតទាល់អាអូនស្រួលឡើងវិញ។ វេជ្ជបណ្ឌិតរូបនេះ បញ្ជាក់ថា ចំពោះការបន្តក់ទឹកក្រូច ឲ្យអាអូនញ៉ាំនោះ វាមិនមែនមានប្រសិទ្ធភាពគ្រប់ក្មេងទេ មានក្មេងខ្លះអាចជួយសម្រួលបញ្ហាកូនបាន ខ្លះទៀតអាចកាន់តែធ្វើទុក្ខឲ្យកូនលើសដើមវិញ។
លោកបន្ត ក្នុងករណីដែលអាអូន ដាក់ទឹកក្រូច ឬបៅដោះម្ដាយនៅតែមានបញ្ហាទល់លាមកទៀតនោះ ម៉ាក់ប៉ាគួរតែយកកូនទៅពិគ្រោះជាមួយគ្រូពេទ្យ រកមូលហេតុឲ្យច្បាស់ថាអាអូនទល់លាមកដោយសារអ្វីឲ្យប្រាកដ។
បដិសេធ
Hello Health Group និង “Hello គ្រូពេទ្យ” មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
ផ្សព្វផ្សាយពាណិជ្ជកម្មតើអត្ថបទនេះមានប្រយោជន៍ដែរទេ?
ផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្ម