យើងហើយថា ប្រព័ន្ធការពាររាងកាយក្មេងៗខ្សោយខ្លាំងណាស់ ងាយនឹងរងការវាយលុកពីពពួកបាក់តេរី ឬមេរោគផ្សេងៗ ដែលនេះជាក្តីបារម្ភរបស់ម៉ាក់ប៉ាទាំងអស់។ តើត្រូវធ្វើម៉េចខ្លះដើម្បីឲ្យប្រព័ន្ធការពារកូនរឹងមាំ មិនសូវប្រឈមនឹងជំងឺផ្សេងៗ?

បញ្ហានេះ លោកវេជ្ជបណ្ឌិតឯកទេសរោគកុមារ អ៊ុន យូ ឆ្លើយតបថា ដើម្បីឲ្យទារក ឬកុមារមានប្រព័ន្ធកាពារបានល្អ អាចប្រឆាំងជាមួយមេរោគផង និងដើម្បីសម្រួលដល់ការលូតលាស់នៃរាងកាយ បញ្ញាស្មារតីផង ទី១ ត្រូវឲ្យម៉ឹមទឹកដោះម្តាយ ព្រោះទឹកដោះម្តាយសម្បូរដោយសារធាតុចិញ្ចឹម វីតាមីន សារធាតុរ៉ែផ្សេងៗ មានទាំងព្រីបាយអូទិក ប្រូបាយអូទិក មីក្រូបាយអូតា ដែលអាចបង្កើន និងជំរុញឲ្យក្មេងមានប្រព័ន្ធការពាររាងកាយរឹងមាំល្អ។

ក្នុងនោះលោកវេជ្ជបណ្ឌិតសញ្ញាប័ត្រពីបារាំង និងកូរ៉េរូបនេះបានលើកឡើងថា ទឹកដោះដំបូងល្អបំផុតសម្រាប់ទារក ដោយសារតែវាមានប្រព័ន្ធការពារចេញពីម្តាយមក អាចការពារក្មេងពីជំងឺមួយចំនួនធំ ទម្រាំដល់វ័យមួយដែលអង់ទីករដែលបានពីម្តាយនោះសាបរលាបទៅម្តងបន្តិចៗ។

បន្ថែមពីការបំបៅកូនដោយទឹកដោះម្តាយ ទី ២ លោកវេជ្ជបណ្ឌិតបានណែនាំឲ្យម៉ាក់ប៉ាយកកូនទៅចាក់វ៉ាក់សាំងឲ្យបានគ្រប់មុខទៅតាមកម្មវិធីជាតិ ឬក៏ចាក់វ៉ាក់សាំងបន្ថែមផ្សេងទៀតទៅតាមលទ្ធភាពរបស់ខ្លួន ដើម្បីជួយឲ្យប្រព័ន្ធកាពាររបស់កូនកាន់តែមាំទៅៗ។

យោងតាមអង្គការសុខភាពពិភពលោក (WHO) ក្មេងដែលបៅទឹកដោះម្តាយតែមួយមុខគត់ អាចកាត់បន្ថយគ្រោះថ្នាក់នៃជំងឺធាត់ជ្រុល ជំងឺហឺត ជំងឺសរសៃឈាមបេះដូង និងជំងឺទឹកនោមផ្អែម ប្រភេទទី២។ ក្រៅពីកាត់បន្ថយគ្រោះថ្នាក់នៃជំងឺសំខាន់ៗទាំង ៤ មុខនេះ ការដែលឲ្យកូនម៉ឹមទឹកដោះម្តាយ អាចកាត់បន្ថយជំងឺរាករូស ជំងឺផ្លូវដង្ហើម ឯបញ្ញាស្មារតីក៏ឆ្លាតវាងវៃ និងទទួលបានភាពកក់ក្តៅពីម្តាយ ដែលបីថ្នាក់ថ្នមពេលបំបៅម្តងៗ។

ភស្តុតាងវិទ្យាសាស្ត្រថា ការបំបៅដោះកូនដោយទឹកដោះម្តាយភ្លាមក្នុងអំឡុងម៉ោងដំបូងបន្ទាប់ពីសម្រាល អាចទប់ស្កាត់ការស្លាប់របស់ទារកភ្លាមៗបានប្រហែល ២០%។ ចំណែកឯកុមារដែលទទួលបានការបំបៅដោយទឹកដោះម្តាយតែមួយមុខគត់រយៈពេល ៦ ខែ ដំបូង អាចកាត់បន្ថយជំងឺរាករូសបាន ១១ ដង និងជំងឺរលាកសួតបាន ១៥ ដង បើប្រៀបធៀបជាមួយកុមារដែលមិនបានបំបៅកូនដោយទឹកដោះម្តាយ។

ទឹកដោះម្តាយសម្បូរសារធាតុចិញ្ចឹម វីតាមីន អង់ទីករ និងពិសេសបែបនេះហើយ ទើបអង្គការសុខភាពពិភពលោក និងក្រសួងសុខាភិបាល ណែនាំឲ្យស្ត្រីដែលសម្រាលកូនរួច ត្រូវបំបៅដោះកូនឲ្យបានយ៉ាងតិច ៦ ខែ។

២ ចំណុចសំខាន់ ជួយប្រព័ន្ធការពាររាងកាយកូនតូចរឹងមាំ ជំងឺផ្សេងៗកម្រមកបៀតបៀន