ពិតណាស់ ម្រាមដៃ និងម្រាមជើងតូចៗរបស់ទារកទើបនឹងកើត ត្រូវការការយកចិត្តទុកដាក់ជាពិសេស នៅខណៈពេលដែលទារកកំពុងលូតលាស់ ហើយដើម្បីឲ្យស្បែកអាអូនមានសភាពទន់ល្មើយ ព្រមទាំងមានក្រចកកាត់តម្រឹមបានត្រឹមត្រូវ និងស្អាតល្អ ប៉ាម៉ាក់គប្បីចំណាយពេលបន្តិចក្នុងការថែទាំ។
តិចនិកថែទាំម្រាមដៃ និងម្រាមជើងទារក ប៉ាម៉ាក់ថ្មីថ្មោងគួរដឹង
ត្រួតពិនិត្យដោយ វេជ្ជ. ចាន់ ស៊ីណេត · មន្ទីរពេទ្យបង្អែកមិត្តភាពកម្ពុជា-ចិន សែនសុខ
១. កាត់តម្រឹមក្រចករបស់ទារកជាប្រចាំ
ចូរកាត់តម្រឹមក្រចកទារកឲ្យបានស្អាតល្អ ទោះបីជាក្រចកដៃពួកគេនៅស្ដើងក៏ដោយ ពីព្រោះទារកអាចនឹងក្រញៅ ឬខ្វាចមុខ ឬរាងកាយរបស់ខ្លួន។ ជាទូទៅ ក្រចកដៃទារកលូតលាស់លឿនណាស់ ដូច្នេះហើយ យើងគប្បីកាត់តម្រឹមពីរដងក្នុងមួយសប្ដាហ៍។ ចំណែកឯក្រចកជើងវិញមិនសូវមុតស្រួច ហើយក៏លូតលាស់យឺតដែរ ហេតុនេះ ប៉ាម៉ាក់អាចកាត់តម្រឹមក្រចកជើងម្ដង ឬពីរដងក្នុងមួយខែក៏គ្រប់គ្រាន់ទៅហើយ។ ជាមួយគ្នានេះដែរ ប៉ាម៉ាក់ត្រូវប្រើប្រាស់ប្រដាប់កាត់ក្រចក ឬកន្ត្រៃកាត់ក្រចកសម្រាប់ទារកដែលស្អាតល្អ និងមិនត្រូវកាត់ជិតនឹងស្បែករបស់ទារកពេកឡើយ។
២. ពិនិត្យមើលម្រាមដៃ និងម្រាមជើងជាញឹកញាប់
ប៉ាម៉ាក់អាចនឹងមានការភ្ញាក់ផ្អើលនៅពេលដែលមានអំបោះ ឬសក់នៅជាប់ម្រាមដៃ និងម្រាមជើងរបស់ទារក។ ពិតណាស់ ទារកទើបនឹងកើតចូលចិត្តចាប់កាន់របស់ផ្សេងៗ ដែលនេះគឺជារឿងធម្មតានៃការវិវត្តរបស់ពួកគេប៉ុណ្ណោះ។ ដូច្នេះហើយ ប៉ាម៉ាក់គប្បីពិនិត្យមើលដៃ និងជើងរបស់ទារក នៅរៀងរាល់ពេលដែលផ្លាស់ប្ដូរខោទឹកនោម និងប្រើប្រាស់ក្រណាត់សើមជូតសម្អាតដៃ និងជើងពួកគេឲ្យបានស្អាត។ ប្រសិនបើយើងកត់សម្គាល់ឃើញមានរបួសនៅត្រង់ម្រាមដៃ វាអាចនឹងជាសះស្បើយដោយខ្លួនឯង។ យ៉ាងណាមិញ ប៉ាម៉ាក់ត្រូវប្រុងប្រយ័ត្នចំពោះសញ្ញានៃការឆ្លងមេរោគ ដូចជាក្រហម ហើម ឬក្ដៅជាដើម។
៣. ពាក់ស្រោមដៃ និងស្រោមជើងឲ្យទារក
ស្រោមដៃ និងស្រោមជើងអាចការពារទារកពីការខ្វាច ឬក្រញៅខ្លួន និងមុខរបស់ពួកគេបានយ៉ាងមានប្រសិទ្ធភាព។ ប៉ុន្តែទារកតូចៗអាចនឹងធ្វើឲ្យរបូតស្រោមដៃ ឬស្រោមជើងទាំងនោះ ហើយក៏ចាប់ផ្ដើមក្រញៅខ្លួនឯងដដែល ហេតុនេះហើយ ការកាត់តម្រឹមក្រចកដៃ និងក្រចកជើងរបស់ពួកគេ គឺជារឿងដ៏សំខាន់មួយដែលប៉ាម៉ាក់មិនគួរធ្វេសប្រហែសឡើយ។
៤. ប្រើឡេលាបស្បែកសម្រាប់ទារក
ប្រសិនបើស្បែករបស់ទារកមិនស្ងួតទេនោះ ប៉ាម៉ាក់ក៏មិនចាំបាច់ប្រើប្រាស់ឡេលាបស្បែកនោះដែរ។ ការរបកស្បែកនៅរយៈពេលប៉ុន្មានសប្ដាហ៍ក្រោយពេលកើត គឺជារឿងធម្មតាប៉ុណ្ណោះសម្រាប់ទារក ហើយវាក៏មិនបង្កជាគ្រោះថ្នាក់ ឬការឈឺចាប់ណាមួយដែរ។ ប៉ុន្តែ ប៉ាម៉ាក់អាចប្រើប្រាស់ឡេលាបស្បែកឲ្យកូនបាន ប្រសិនបើចង់ឲ្យស្បែករបស់ពួកគេមានសំណើមល្អ និងទន់ល្មើយ ដោយលាបនៅក្នុងបរិមាណតិចតួច បន្ទាប់ពីងូតទឹករួច ដើម្បីរក្សាសំណើមនៅស្បែកឲ្យជាប់បានយូរ។
បដិសេធ
Hello Health Group និង “Hello គ្រូពេទ្យ” មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
ផ្សព្វផ្សាយពាណិជ្ជកម្មតើអត្ថបទនេះមានប្រយោជន៍ដែរទេ?
ផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្ម