ការដែលស្ត្រីកើតមានទឹកនោមផ្អែមនៅពេលពពោះ គឺបណ្ដាលមកពីសរីរាង្គរបស់កូន បញ្ចេញអ័រម៉ូនម៉្យាងដែលទៅប្រឆាំងនឹងអាំងស៊ុយលីនរបស់ម្ដាយ ដែលធ្វើឲ្យជាតិស្ករនៅក្នុងឈាមរបស់ម្ដាយឡើងខ្ពស់ខុសពីធម្មតា។ ម៉្យាងវិញទៀត វាអាចបណ្ដាលមកពីចំណីអាហារដែលម៉ាក់ៗញ៉ាំនៅពេលពពោះ ក៏អាចប្រឈមនឹងកើតទឹកនោមផ្អែមពេលពពោះដែរ។ នេះបើតាមការឲ្យដឹងរបស់លោកវេជ្ជបណ្ឌិត ឃួន សុវណ្ណារិទ្ធ ឯកទេសផ្នែកសម្ភព និងរោគស្ត្រី។
កើតទឹកនោមផ្អែម ម្ដាយអាចបំបៅដោះកូនបានទេ?
វេជ្ជបណ្ឌិតរូបនេះឲ្យដឹងថា ចំពោះម៉ាក់ៗដែលកើតទឹកនោមផ្អែម គឺនៅតែអាចបំបៅដោះកូនបានធម្មតាដដែល មានន័យថា វាមិនបង្កជាហានិភ័យអីប៉ះពាល់ទៅដល់កូនតូចនោះទេ។ ស្របគ្នានេះ ទោះបីជាម៉ាក់ៗប្រើប្រភេទថ្នាំគ្រាប់ ឬថ្នាំចាក់ ក៏នៅមិនទាន់មានការស្រាវជ្រាវណាមួយបានបញ្ជាក់ថា អាចប៉ះពាល់ទៅដល់កូន ប្រសិនបើម្ដាយកើតទឹកនោមផ្អែមហើយបំបៅដោះកូននៅឡើយទេ។
ជាទូទៅ អំឡុងពេលមានផ្ទៃពោះ ខាងគ្រូពេទ្យគឺតែងយកចិត្តទុកដាក់ទៅលើសុខភាពម្ដាយ បើពេទ្យរកឃើញថាកើតទឹកនោមផ្អែមមុន ឬអំឡុងពេលពពោះ ត្រូវទាមទារឲ្យម្ដាយតាមដានសុខភាពដូចជា កម្រិតជាតិស្ករនៅក្នុងឈាមឲ្យបានទៀងទាត់ ដើម្បីការពារ និងថែទាំសុខភាពឲ្យបានល្អកុំឲ្យជំងឺកាន់តែធ្ងន់ធ្ងរ។ ក្នុងករណីដែលស្ត្រីកើតជំងឺទឹកនោមផ្អែមនៅអំឡុងពេលពពោះ អាចបង្កជាផលប៉ះពាល់ច្រើនដូចជា៖
– កូនអាចលើសទម្ងន់ (ពិបាកសម្រាលធម្មជាតិ)
– ទឹកភ្លោះច្រើន អាចធ្វើឲ្យកូនស្លាប់ក្នុងពោះ
– ម្ដាយអាចធ្លាក់ឈាមច្រើនពេលសម្រាល ។ល។
លោកវេជ្ជបណ្ឌិត បានបញ្ជាក់បន្ថែមថា ទោះយ៉ាងណាក៏ដោយ ម៉ាក់ៗដែលមានជំងឺទឹកនោមផ្អែម គ្រូពេទ្យនៅតែជំរុញទឹកចិត្តឲ្យបំបៅដោះកូនធម្មតាដដែល ពីព្រោះទឹកដោះម្ដាយមានផលប្រយោជន៍ច្រើនចំពោះទារក។
[embed-health-tool-vaccination-tool]
