ចូលចិត្តព័ត៌មាន “Hello គ្រូពេទ្យ” សូមចូលរួមស្ទង់មតិនៅទីនេះ។ មតិអ្នកទាំងអស់គ្នា ពិតជាមានតម្លៃសម្រាប់ “Hello គ្រូពេទ្យ” អាចកែលម្អព័ត៌មានឲ្យកាន់តែប្រសើរ!

ចំពោះម៉ាក់ៗថ្មីថ្មោង បញ្ហាដ៏គួរឲ្យធុញមួយក្នុងចំណោមបញ្ហាជាច្រើនដែលត្រូវជួបប្រទះនោះគឺ បញ្ហាគេងមិនដែលបានឆ្អែតភ្នែកដូចមនុស្សធម្មតា។ យើងច្បាស់ជាយល់ហើយថា ទារកទើបនឹងកើតឆាប់ឃ្លាន ទាររកបៅញឹកញាប់ មិនដឹងពេលថ្ងៃ ឬពេលយប់ទេ។ កត្តានេះហើយទើបធ្វើឲ្យម៉ាក់ៗរកពេលសម្រាកមិនបានគ្រប់គ្រាន់ ចុះមានវិធីណាដែលអាចជួយសម្រួលបញ្ហានេះបានអត់?

ទាក់ទងនឹងបញ្ហានេះ លោកវេជ្ជបណ្ឌិត ចាន់ ស៊ីណេត ប្រធានផ្នែកសម្ភព និងរោគស្ត្រីនៃមន្ទីរពេទ្យមិត្តភាពកម្ពុជា-ចិន សែនសុខ បកស្រាយឲ្យដឹងថា ឪពុកម្ដាយថ្មីថ្មោងស្ទើរតែគ្រប់រូបទៅហើយ ដែលត្រូវហត់កម្លាំងដោយសារប្រឹងមើលថែកូនយ៉ាងដិតដល់ទាំងថ្ងៃ ទាំងយប់។ ប៉ុន្តែមានវិធីមួយដែលជួយសម្រាលភាពនឿយហត់ពេលយប់របស់ម៉ាក់ប៉ានោះគឺ តិចនិកបំបៅដោះកូនក្នុងសុបិន (ភាសាបច្ចេកទេស Dream Feeding) ឬបើនិយាយឲ្យស្រួលស្ដាប់ គឺបំបៅដោះកូនពេលយប់។

តើ Dream Feeding ជាអ្វី?

Dream Feeding នេះជាការបំបៅដោះកូន នៅពេលដែលអាអូនគេងលក់តិចៗ (ពេលដែលកូនមើលទៅស្រិមៗ)។ ម៉ាក់ៗអាចប្រើតិចនិកនេះ១-២ ម៉ោងក្រោយដាក់ឲ្យអាអូនគេង និងមុនពេលដែលខ្លួនឯងផ្ទាល់រៀបចូលសម្រាក។ ការធ្វើបែបនេះគឺដើម្បីឲ្យអាអូនគេងលក់បានយូរ មុនពេលកូនឃ្លានម្ដងទៀត។ វាក៏អាចឲ្យម៉ាក់ប៉ាសម្រាកបានយូរដូចគ្នាដែរ។ វេជ្ជបណ្ឌិតរូបនេះបន្តថា យើងអាចចាប់ផ្ដើមប្រើតិចនិកនេះបាននៅពេលដែល៖

– កូនមានអាយុលើសពី ២ខែ

– មានម៉ោងចូលគេង និងម៉ោងបៅពេលយប់ទៀងទាត់

– លូតលាស់បានល្អ (ដោយបៅដោះម៉ាក់ ឬទឹកដោះគោ)

– ឆាប់គេងលក់វិញ ក្រោយភ្ញាក់ ជាដើម។

បើយើងចង់បំបៅដោះកូនពេលយប់ គួរធ្វើយ៉ាងម៉េច?

យើងអាចប្រើតិចនិកនេះបំបៅកូនបានដោយ៖

១. បំបៅកូន ដាក់ឲ្យកូនចូលគេងតាមម៉ោងធម្មតារបស់កូន

២.១-២ម៉ោងក្រោយ មុនពេលយើងរៀបចូលគេង ចាំសង្កេតមើលថា អាអូនមានកម្រើកខ្លួនតិចៗតែមិនទាន់ភ្ញាក់ពីគេងទេ និងឃើញគ្រាប់ភ្នែកកូនកម្រើកនៅពីក្រោមត្របកភ្នែក (ពេលភ្នែកកូននៅបិទ)

៣. ដាក់ចុងសុដន់ម្ដាយ ឬចុងកំប៉ុងដោះគោ នៅក្បែរមាត់កូន (កុំបង្ខំឲ្យកូនបៅ) ឲ្យកូនបៅដោយខ្លួនឯងរហូតទាល់តែកូនឆ្អែត

៤. ក្រោយកូនបៅឆ្អែត ហើយគេងលក់វិញ យើងអាចចូលសម្រាកដែរ

ប្រធានផ្នែកសម្ភពរូបនេះ បញ្ជាក់ថា ចំពោះតិចនិកបំបៅដោះកូននៅពេលយប់នេះ មិនមានប៉ះពាល់ទៅដល់កូនទេ ហើយជួយសម្រួលឲ្យអាអូន និងម៉ាក់ប៉ាមានម៉ោងគេងដូចគ្នា។ មិនតែប៉ុណ្ណោះ វាជួយឲ្យបានគេងបានឆ្អែតភ្នែកជាងរាល់ដង ព្រោះការគេងមិនបានគ្រាប់គ្រាន់អាចប៉ះពាល់ទៅដល់សុខភាពទូទៅរបស់យើងខ្លាំងដូច ធ្វើឲ្យប្រព័ន្ធភាពស៊ាំចុះខ្សោយ បង្កើនហានិភ័យជំងឺបាក់ទឹកចិត្ត ឬថប់បារម្ភ កម្លាំងក៏ចុះខ្សោយ។ល។

ស្របគ្នានេះ តិចនិក Dream Feeding អាចមានប្រសិទ្ធភាពលើទារកមួយចំនួន ហើយមួយចំនួនទៀត អាចមិនដំណើរការតាមការគិតរបស់ម៉ាក់ប៉ា ព្រោះទារកទាំងអស់មិនដូចគ្នាទេ ដូចនេះហើយ ម៉ាក់ប៉ាគួរស្វែងរកមធ្យោបាយដោះស្រាយយ៉ាងណាដែលផ្ដល់ភាពងាយស្រួលដល់យើង ហើយមិនប៉ះពាល់ដល់កូន។

តិចនិកបំបៅដោះកូនពេលយប់ ម៉ាក់ៗលែងបារម្ភរឿងគេងមិនឆ្អែត